Éxodo27cuk_nvs

Ibmar-ogumakar-ukleged-aila-soblegoed

1Bab-Jehová Moisésʼga sogdebalid:“Anga-ibmar-ogumakar-ukleged-aila, be imakbaloed.A-aila, urgo-acaciaʼye-nugadgi emarbi yaa-dungu be imakoed.E-sugued, daligwen-gaka-achabo,e-matardungued, daligwen-gaka-achabobar.E-nibgueddi, bisgipaa.2Degine, moli-bebegii aila-e-dikar-abingunanaid-birgi be ogwisbaloed.We-moli-bebegiidmala, ailagi bato eba-mese-sobale be imakoed.Anga-ibmar-ogumakar-ukleged-aila-birgi, esgoro-gordikid be nasikoed.3”Deginbali, bela ibmarmar-we-ailagi-ebuleged esgoro-gordikidgi be soboed:Buru-simalad-bormomar.Buru-weemalad-wesar-dummagan,Abe-bomied-nog-dummagan.San-obin-obin-saed-iko-dummagan.Soo-seed-bormomar.4Deginbali, esgoro-gordikidgi san-nared-saki-sakid be sobbaloed.A-saki-sakidga, e-uaya, e-dikar-abingunanaidgi esgoro-gordikidgi be sobbaloed.5Degine, san-nared-saki-sakid anga-ibmar-ogumakar-ukleged-ailagi, negabaladgi be nasikoed.6Deginbali, anga-ibmar-ogumakar-ukleged-ailaga, suar-warakwagana be imakbaloed.We-suar-warakwaganaga urgo-acaciaʼye-nugad be ebugoed.We-suar-warakwagana-birgi esgoro-gordikid egi be nasikoed.7Suarmar we-aila-e-oluaduk-dummagan-nanaid-yaba be odogegalad.We-suarmar, anga-ibmar-ogumakar-ukleged-aila seledsokalile, dikarba-nai guoed.8Anga-ibmar-ogumakar-ukleged-aila be ollor imakoed, degine, we-aila urgomargi be soboed.Ar igi bega yar-birgi oyolesa, deyob dakle be soboed.”

Bab-Dummadse-goled-neg-sunna-seleged-neg-imba-nasiklegoed

9Bab-Jehová Moisésʼga sogdebalid:“Deginbali, anse-goled-neg-sunna-selegedga neg-imba be nasikbaloed.Dali-dulagwen-gakatar-sugu (25) guoed,dad-nakwed-argan-nuedsik be nasikoed.Degine, we-neg-imba-e-galugi lino-mor-nued naguoed.10E-buarmardi, waladulagwen (20) nikuoed,degi, e-buar-sigmalad, amba gwadulagwenbar (20).Bela wemar-sobegala, esgoro-gordikid be ebugoed.E-gamalad-sobegala, degi, buar-e-nonomar-sobegala, mani be ebugoed.11Amba deyob anse-goled-neg-sunna-seleged-imba dad-nakwed-argan-sapiledsik,lino-mor-nued dali-dulagwen-gakatar-sugu (25) be nasikbaloed.E-buarmardi, dulagwen (20),degi, e-buar-sigmalad amba dulagwenbar (20).E-buar-sigmalad-imakegala, esgoro-gordikid be ebugoed.E-mor-gamaladgardi, degi, e-buar-nonomargardi, mani be ebugoed.
12”Anse-goled-neg-sunna-seleged-imba dad-argwanedsik,mor-dummad daliambe-gakabo-gaka-abala-matardungu (12½), be nasikoed.E-buarmardi, warambe (10),degi, e-buarmar-sigmalad, gwaambebar (10).13Anse-goled-neg-sunna-seleged-imbadad-nakwedsikid e-matardungued,daliambe-gakabo-gaka-abala (12½) guoed.14Yawagak-doged-dikarba mor-dummad naguoedi,dalipaa-gaka-bisgipaa, doged-e-dikar-gwensaksik sugu naguoed.E-buarmardi, walapaa, degi, e-sigmalad amba gwapaabar.15Degine, doged-e-dikar-baidsiki,mor-dummad, dalipaa-gaka-bisgipaa nagubaloed.E-buarmardi, walapaa, degi, e-sigmalad amba gwapaabar.
16”Yawagak-dogedgi mor-dummad daliatar be nasikoed.We-mor-dummad be imakoedi,nirbadub-aradgi be imakoed,nirbadub-suir-akwagiidgi be imakoed,nirbadub-ginnidgi be imakoed,linoʼdub-nuedgi, ise-nue-sobar,bela-bela-nue-yeerdakle be imakoed.Degine, e-buarmardi, walabake,degi, e-sigmalad amba gwabakebar.17Bela we-neg-imba-e-buarmar-ebiroedi, e-buar-nonomar, manigi soblegoed,e-gamalad, manigi soblebaloed.E-sigmaladdi, esgoro-gordikidgi soblegoed.
18”Neg-imba dali-dulagwen-gakatar-sugu (25) guoed,e-matardungued, daliambe-gakabo-abala (12½) guoed.E-mor-naguoed, daligwen-bisgise sugu naguoed.We-mor-dummagan-naguoedi, lino-mor-nued guoed.E-sigmaladdi, esgoro-gordikidgi soblegoed.19Anse-goled-neg-sunna-selegedgi belagwapa-ibmarmar-ebulegoedi, bela esgoro-gordikidbi guoed.Degine, we-a-neg-bargamalad, degi, e-galumar-bargamalad, bela esgoro-gordikidmarbi be imakbaloed.”

Gwallu-dii-ebulegoed

20Bab-Jehová Moisésʼga sogdebalid:“Israel-dulemarga be sogo:‘Olivo-e-gwallu ibmar-baidba-oburarsuli be sedamalo,adi, gwallu-ogamalagar.Degisadegu gwallu gasii guegar.21Aarón, degi, e-machimala, gwallu guakwaa simaloed,adi, gwallu gasigu oibodagegar.We-gwallu Bab-Jehová-dulemarbo-ambikued-neggi,mor-dummad-Bab-Ulu-irwa-naid-magaba sigoed.We-igar-an-ukedi, Israel-dulemarga, degine, e-waganga, degisadegu guoed.’ ”
expand_more
Search