1Nikiɗi woyissa Musaa ne : « Fu hey rape fu hay ɗiskiŋ ngo ŋ tangoori ; huna na Aaruna, Nadab, Abihu, na yakak ndaŋkiyaah-yasna-kanak (70) ŋ ɓiŋ Israayel. Ɗu hay ɗah, nikaat ŋ ɗisik usiɗ, ɗu ƴek nga.2A fu dong na hee reɓe nga so, waaye ɓinooɓi heyɗi ree te mboolndi rapanɗi na ɗu ŋ ɗafuk tangoori. »3Musaa kaɗta woosa mboolnda in ci Nikiɗi woo na ci a nakoh jen. Mboolnda hunnda jen loffa ne : « Ɓoo hey tume in ci Nikiɗi woo jen. »4Musaa fiissa woo ciŋ Nikiɗi jen. Wa Kooh wiis, a kurukka na ɓaaɓa teel, a haɓiɗta seeƴkoha ŋ tas tangoora, a yippa atoh ndaŋkiyaah na kanak (12) wuu cuuɓ ci ndaŋkiyaah na kanak (12) ciŋ Israayel.5A nakka ɓi komaaki ƴaar ɓaah ŋ Israayel ci ne ɓeem seeƴuk na ɗoopaat ci hoomɗassan wuu Nikiɗi, te ɓa hoos ɓi naar ne ɓa seeƴuk seeƴki ɓa na seeƴke wuu jam ŋ harmban ɓa na Nikiɗi.6Ŋ ineem Musaa ɓayya cambanaŋ ñif maŋ ɗoopaat ca, a tummbaa ŋ inaa, wa tas, a lissaa ŋ ɗafuk seeƴkohaana.7Ƴutta, a ɓayya woo ci fiisu wuu Ambtiɗohi, a jangɗeeɗa mboolnda ca ŋ ɗafka. Ɓa woosa ne : « Ɓoo hey tume in ci Nikiɗi woo jen te ɓoo hey ɗe kerhiɗe. »8Musaa ɓayya ñif ma a ɗaake, a liseeɗaa ŋ mboolnda, a woyeeɗa ne : « Wii weɗ ñif mi aamu wuu ambtiɗohi Nikiɗi tufkiɗ na ɗu ŋ woo ci a woo cii jen. »9Wa ɓa ƴut seeƴuk, Musaa rappa ŋ tangoora, a yi na Aaruna na Nadab na Abihu na yakak ca ndaŋkiyaah-yasna-kanak (70) caŋ Israayel.10Ɓa hotta Koohiŋ Israayel ; ŋ ooɓ kot ciŋ ɗe, mandee haa wa dungohu peme bulo koceet findi eel ci.11Waaye Nikiɗi tumɗi yakak caŋ Israayel miskiɗ, ɓa hoteen ɗe, ƴutta, ɓa ñammba, ɓa annda.
Musaa ŋ ɗiskaŋ Kooh ngaŋ tangoora
12Wa in ceem coot, Nikiɗi woosa Musaa ne : « Rapa po ŋ ɗafuk tangoori ŋ ɗiskiŋ ngo, fu nik nga. Ŋ hey ɗa eɗe atoh ci ɗapas ci, ɗiski ŋ fiis waasi na nakoh ci ne fu jangiɗ ɓooɓi ca. »13Musaa hunnda na dagiŋ ɗe Yosuwe, a rapeeɗa tangooraŋ Kooh.14Waaye bala a rapan ɗah, a woosa yakak ca ne : « Sekaat ɓoo ndii po mbaɗna ɓoo hayan. Aaruna na Hur hey tase na ɗu, in nu ɓo' raak woyaah ɗah, a woyaata na ɓa. »15Musaa rapeeɗa tangoora, ɗuukra tumee eel ullaa.16Yaki Nikiɗi yak siñaarɗeeɗa ŋ ɗafuk tangooraŋ Sinaay. Israayel ci hotee nga po haa wa koraaɓ yakak kaɓ ŋ ɗafuk tangoora. Eela ulla tangoora ini ree neeh yasna-yino. Ŋ neeha yasna-kanakɗoh, Nikiɗi ɓeeɗkohha Musaa ŋ ɗooƴ eela.18Musaa aassa ŋ eela, a rapeeɗa po ŋ ɗafuk tangoora. A nikka nga neeh ndaŋkiyaah-nikiis (40).