1E tomotayadi Yaubada ilatuwokoidi ame nakae, idigo kana,2‘Yau Yauwe imi Yaubada da Itipita idi kasa goi akalaoduwemi. Boi komi da Itipita idi pakonayao go, Yau ataligeimi.3Tauna taabu basaleliuyao goi kokaatuvēkwana matagu goi.4Taabu tokwalu koomadāgi bego dogoi tayamo yábana goi o poyapoya yatana goi o négwasa sinaena goi ana tapata nakae bego imi basaleliu.5Basaleliuyaoyadi yaidi taabu kovaatugūyala kokanakabobo be taabu kosaakulūlu yaidi. Yau Yauwe imi Yaubada moe Tovakavavágana vakookoligu. Avatau neta nakae iguinuwe moe ikaolilivegu, tauna tauna bei aliune go, niga neta natunao be tubunao ina tapepeko sivatotowone, tauyadi nakae bei aliunedi.6Go avatauwa neta simatakooiyegu be nakae guna lovina sikabikaaonedi, e amo tauyadi be nakae mlidi idi bodao badabadaidi simamaima yaidi goi alokatedi.7Taabu Yau Yauwe imi Yaubada yoigu kokaigoyāi. Avatau neta yoigu ikaigoyai, amo tauyana bei aliune.8Maliyalina aba waiwasi konuwookavāte kokimasābe umagu.9Maliyalina ainima tayamo goi koopaisēwa be imi paisewa madabokidi koguuinuwēdi.10Go maliyalina ainima aiyuwoina moe aba waiwasi Yau Yauwe imi Yaubada umagu. Amo maliyalinayana goi taabu koopaisēwa; komi, natumiyao, imi pakonayao koroto be vevina, imi bulumakauyao be nakae tomalatonikasa yaimi sikaaiyaka, paisewa geya.11Maliyalina ainima tayamo goi Yau Yauwe yábana be poyapoya be négwasa be nakae kaga liliuna sinaedi amadagidi go, maliyalina ainima aiyuwoina goi awaiwasi. Tauna maliyalina ainima aiyuwoina aba waiwasi Yau Yauwe bogina akaipakuye be nakae akimasabe umagu.12Tamamiyao be sinamiyao kowowooinēdi, e bei yawoimi simamanao poyapoya Yau Yauwe imi Yaubada bei aavinimi goi.13Taabu kokaaumāta.14Taabu korooerāta.15Taabu kovaaināwana.16Taabu kotalavaita poolapōla semiyao yaidi.17Semiyao idi vada be monediyao be idi pakonayao koroto o vevina be idi bulumakauyao o idi aseyao o ava kónana tayamo taabu koyaalagāudi.’
Isileli tubunao Yauwe simaatoite tetelina
18E kidi go tomotayadi palapala sinovenove be ávila sigitegite, nakae síula sinovenove be aubowo sigitegite, tuwo wowodi sitatátava go, sibala sina masigava goi siitáoya.19Tuwo silatuwokoigu sidigo kadi, ‘Kom toinim kuvadigōima bei kanovem. Go taabu Yaubada ivaadigōima, govila bei kakámasa.’20Go yau adigo kagu, ‘Taabu koomatōita! Yaubada ima bego Tauyana koyagoidoko, e bei kowowoinevatae be nakae goyo geya koguinuweyeta.’21Tuwo tomotayadi masigava goi siitáoya go, yau ana gaota kalaabadaina kikina goi atáoya. Gaotayana sinaena moe Yaubada ikaaiyaka.
Yauwe ina kanasíuna bukina
Lovina aba kasala manuna
22E Yauwe ilatuwokoigu idigo kana, ‘Ame nakae Isileli tubunao kulatuwokōidi, kudīgo kam, “Komi toinimi bogina konove bego yábana goi avadigoimi. Geya kogiteguta, go sem konovegumo.23Tauna geya tayaamo basaleliu ana tokwalu siriba goi o goura goi koomadāgi bego dogoiyana be Yau taiyao kavavasa, e yaima kosakululu geya.24Go sem guna kaba kasala poyapoya goi komadāgi. Aba kasalayana goi imi yoguyoguyao moe imi sipiyao nakae imi bulumakauyao kokasalēdi yaigu. Yoguyoguyadi maniyedi bei kovakasavēdi go, maniyedi abivekoveko manuna kogabudīmo kokāika. Ava kasava goi neta atagona komi kosakululu yaigu, e amo asayadi liliudi goi bei awokoimi, e akaipakuyemi.25Go aba kasala gurewa goi neta kokaudakodako, taabu gurewayadi kokauvisivisīdi. Neta turu goi kokauvisivisidi, e gurewayadi bogina kokibaibailidi sakululu yaigu manuna.26Taabu aba kasalayana manuna aitámana koomadāgi, govila bei komwera, e bisosoimi sobuyekoidi moe aba kasalayana ikaaiyaka,e bei sikibaibāili.”’