18:1–12
13Ga ŋuliŋuruyinydja dhurrwaraŋuru ŋayi Mawtjitj marrtjina, bala ŋayi nhinanana guŋga'yunarawuna yolŋu'‐yulŋuwuna, djarr'yunarawu marrtjinyarawu nhäku malanyŋuwu, liŋgu guḻku' mirithirri ŋuli yolŋu walala marrtjinya yukurranha nhanukala Mawtjitjkala guŋga'yunarawunydja, beŋuru liŋgu goḏarr'ŋuru ga yana liŋgu‐u‐u ga munhakuyinya.14Bala ŋayi Mawtjitjkalanydja ŋapipi'mirriŋuyu nhäŋalana ŋanya, ŋunhi ŋayi yukurrana djäma mirithirri yindi, wirrki wal'ŋu ŋayi yukurrana djäma. Bala ŋayi waŋana ŋanya Mawtjitjnha bitjarrana, “Nhäku warray nhe yukurra nhinanydja nhepinydja waŋganydja dhuwala, guŋga'yun yukurra yolŋu'‐yulŋunhanydja bitjan liŋgu walu‐ŋupan?”15Ga ŋayinydja waŋana Mawtjitjtja bitjarrana, “Bitjan muka liŋgu walala ŋuli yukurra marrtjinydja dhuwala ŋarrakala. Ŋunhi walala ŋuli ŋarrtjunmirrinydja, marinydja walala ŋuli djäma, ga ŋunhi walala ŋuli djälthirri Godkalaŋunydja romgu, walalanydja ŋuli marrtji ŋarrakalana, märr yurru ŋarra ŋäŋ'thun Godnha, ga ḻakarama walalaŋgu marŋgikuma walalanha marrtji yuwalkku wal'ŋu dhukarrwu.”17Ga ŋayinydja waŋana ŋunhi ŋapipi'mirriŋunydja nhanŋu bitjarra, “Yakana dhuwaliyinydja ŋamakurru'; dhuwaliyinydja djäma nhuŋu ŋonuŋnha mirithirrina, nhe yurru djawaryunna ŋuriŋiyi djämayunydja märr‐yawaryunna,18ga yolŋu'‐yulŋunydja yurru djawaryundhi galkunarayunydja. Yakana nhe yurru djäma gänanydja dhuwaliyi.19Ŋäka ŋi', mäkiri'‐witjurra, ŋarra nhuŋu yurru wekama dhäruktja, ga ŋayi yurru Godtja nhokala.20Manymak warray nhuŋu, nhe yurru marŋgikuma yukurra Godkalaŋunydja romgu, waŋa marrtji raypirri'yun nhaltjanarawu nhinanharawu Godkalaŋunydja romgu.21Ga bitjandhi nhe yurru djarr'yun wiripuŋunha yolŋu'‐yulŋunha, bala nherraṉ walalanha ŋurruŋukumana, märr yurru walalanydja ŋurru'‐ŋurruŋu miṯtjiwu ga miṯtjiwu ga miṯtjiwu, bitjan yurru bala. Djarr'yurranydja nhe yurru ŋunhinha yolŋunha ŋunhi ŋayi yukurra borrk‐beyaṉiyirri Godku ga dhäruk märranharamirri Godku, ŋunhinha walalanha ŋunhi nhe yukurra märr‐yuwalkthirri walalanha, ŋunhi walala yurru yaka yukurra rrupiya gombuma ŋurikiy djämawuy.22Walala yurru yolŋu'‐yulŋunydja marrtji ŋurikalayi walalaŋgala ŋurru'‐ŋurruŋuwala guŋga'yunarawunydja, märr walala yurru ŋuriŋiyi walalay djarr'yun marrtji yumurrkuny'tja malanha, ga ŋunhi yurru ŋula ḏälthirrinydja, wirrkinydja wal'ŋu ḏälthirri yurru, ŋunhiyinydja walala yurru gäma nhokala, ga nhe yurru walalanha guŋga'yun nhepina.23Ga bitjandhi walalanydja yurru ŋuriŋi ŋurru'‐ŋurruŋuyunydja yukurra gurrukamayi ŋonuŋnha nhokala muka dhambay, märr yurru nhenydja yaka muka ganydjarr‐winya'yun ŋuriŋiyi, märr yurru yolŋu walala yaka muka djawaryunmirrinydja galkunarayunydja.”24Bala ŋayi Mawtjitjtja mäkiri'‐witjurrunana ŋurikiyi dhärukku, bala ŋayi bitjarrana waŋana, “Manymaknha dhuwaliyinydjayi guyaŋinyara nhokuŋu.”25Bala ŋayi djarr'yurrunanydja ŋunhiyinha yolŋu'‐yulŋunha ŋuliŋuruyina miṯtjiŋuru Yitjuralpuyŋuwalana, bala ŋayi nherra'‐nhirraranydja marrtjina walalanha miṯtjilili ga miṯtjilili ga miṯtjilili bitjarrana, märr yurru walala ŋuriŋi walalay ŋurru'‐ŋurruŋuyu marrtji djarr'yun yumurrku' malanha rom, ga mari ŋuriki yolŋu'‐yulŋuwu. Ga ŋuli yurru ŋula ḏälthirrinydja rom, ŋayinydja yurru ŋayipi Mawtjitjthu djäma ŋunhiyi romnha djarr'yun.27Ga ŋuliŋuruyinydja dhurrwaraŋuru, bala ŋayi ŋunhi ŋapipi'mirriŋuyunydja gonha'yurrunana ŋanya, bala marrtjina wäŋalilina.