Ekisodas15soq_wbt

Moses wadaposiwa sasawa

1Tane Moses ita Israel apanawa wadapos sasawa Iawe God mampe sasantone wane waienase,“Ne sasa mampe Iawe God wadaposisadina,ipawa me emalawoa apanawa oasiu ita turakau pue mampe teiteinalado owa bedewe noanamone nanaumon.2Iawe God ipa ne mukanaita sasantepina mampe me wadaposisapinaipawa me ne inanen.Me ipa ne Godna sa baiwa ne me wadaposisapinaita me ipa ne mamana Godiwa sa baiwa ne me wadaposisapine ebowa debamasapina.3Me ebowa ipa Iawe God;Me ipa apana onawaa.4Me warere turakawa ita sorodiawaita do me nolawa uwantoia apanawa eubuOwa Bumawa bedewe noanamon.5Mo seu rua owa bedewe ieieno owa numamon.
6O Iawe God, e witaa on ipa mukamukauaida,witaa sa mampe wadamoe mususamoe aimoana.7E mukaa ionoidoleno emalawoa apanawa nanaumoe aimoana.E nuakadia ia ina idituwadia rua iene mo ituiamon.8E nonaua owa tepaleidia suno badolen,ita owa einpue bela rua enen,ita owa makolene badolen.
9Tane emalawoa apanawa asowawalene wanase,‘Ne mo tanamope anteapa, ita ne mo wadaitumopa,tane mo puraiwau eubu uduudu ne menanedia otamopatuapi,ita isimana teinepaaubepe mo bomopa.’10Tane e nonaua mampe owa suano wisene apana numamon,ita mo seu rua owa bedewe monuntone iane anton.
11Iawe God, god isiwa e rua waimoi, ba? Diaida!E dea os ipa ulaipa kakaiwaida,mukaa debamaidalen no saantitana,e ginasa pokawaa dewalala wainiana.12E witaa on wadaaposideno tawo moawaawane emalawoa apanawa numamontuan.13E nuawadawadaa debama mampe e apanaa inamoanaemalawoau apanawa mampoe banlamoano nomoiena.E mukaa debama mampe mo banlamoee bolaa kakaiwa bedewe teamoana.14Bola daitada apanawa e dima dewasaanaumanawa etane uwauwabobontone saidanton.Pilisitia apanawa saidantone nuau pokaida wadie;15Tawo Edom apanawa uauntoia memesaidantone saidanton;Moab apanawa debamau santoie etepu uwedie;Kanaan apanawa uduudu santone guribubuntoie.16Apana uduudu saidantoie.O Iawe God, e mukaa debamaia mo ewaneseu rua badontone eneie,no emalawoamba apanawa mampo inaneanadanauwointa winene anten.17Iawe God, e apanaa banlamoe wieanae wadia iwa osowe teamowo wampu,bola sa e sonabeana e wanempa bolawa,bola sa ipa kakaiwaida e eba witaawo dewasana.18Iawe God, e apana uduudu onapoitone warerekasaitona.”19Israel apanawa owa bedewe tawo makowa asiasi anton. Tane Isibt warerewa oasiwa ita turakawa pue mampe teiteinala ita turaka wadeia apanawa owa bedewe antono numamon. Ipawa Iawe God owa dewasano leulene wisene apana sa numamon.

Miriam sasawa

20Aron weanapa Miriam, me ipa peroweta. Me sino kerauda wadene ioto isiwa do nomone antone sinou epeie biantoie.21Miriam sasalene wane wanase,
“Ne sasa mampe Iawe God wadaposisadina,ipawa me emalawoa apanawa nanaumone aimon,me oas ita turaka pue mampe teiteinala wadeia apanawanoanamono owa bedewe anton.”

Esa sigasigaua leulentue euda segalen

22Mape Moses Israel apanawa banlamone Owa Bumawa enee Sua sala makowa bedewe anton. Mo walama natadea bedewe sala makowa bedewainta antoie mai esa da donsapona, dia.23Tane mo bola Marabedewe wimone esa donsaiena, esa sa sigasigaua mai napona rua, dia. Ipawa sa baiwa mo bola sa ebowa Mara wane ituiena.24Tane apana Moses mampe momoduntone waienase, “Tauma no esa dainea nata?”25Sa baiwa Moses Iawe God mampe sau baiwa rauparileno ia kampa euwasan. Ita Moses ia sa wadene esa bedewe aubeno leulentue esa euda nanala segalen. Ita sape Iawe God apana anaana wanamona ruawantompe waimompa, sa ipa mo wadaetamodia me aiawa ruawantompa ba, dia.26Me wanase, “Naita ne aiana deaitopa asisudewaitonune ita ne emanawo dewa dodomana dewasanuna ita anaanana ruawaitonuna, ne mai kero enalepa Isibt apanawa wanamona rua, dia. Ne Iawe God e inalepina apanawa, inaledino inawaa wainilana.”27Ema aupe mo bola Elim bedewe wimoiena. Bola sa bedewe maneu uduudu 12 ita notonkela iawa uduudu 70 eneie. Mo sape saradountone waimoie.
expand_more
Search