Pula15sav_wbt

Israayel ca ƴeekiɗ Kooh

1Weɗi Musaa na Israayel ca ferɗoh Nikiɗi ƴeekii :
« Nikiɗi ƴeekaah ƴeeku nee !Ŋ hey ɗe ƴeeke.Ndamiŋ ɗe teeɓohiɗ neeA yi min ee !A kooɗkiɗ panis na rapoh panis,A julla ŋ cookma.
2Nikiɗi a yi hatiliŋ ngo nee !A yi Heɗ ƴeekiŋ ngo.A yi hirip po nee !Ŋ hey ɗe ƴeeke.Nikiɗi a yi Koohiŋ ngo nee !Ŋ hey ɗe ɗaape.A yi Koohiŋ baabiŋ ngo nee !Ŋ hey woye yakkiŋ ɗe.3Nikiɗi jalmba ngaŋ hiñoh !Nikiɗi weɗ tiikiŋ ɗe.
4A juliɗ wotiir caŋ FirawnaNa hiñohoh caŋ ɗe.Ɓa adgoh ɓa sah muuhiɗ nga eeŊ Cookmaŋ-Hapeel-ca.5Ginaah ca ulla ɓa neeNgaŋ ɗooƴ cookma.Ɓa diigiɗ nga haa ne atohŊ dungaŋ cookma.
6Nikiɗi ! Ñaahmiŋ ɗa nee !Eey hatiliŋ wa !Nikiɗi ! Ñaahmiŋ ɗa nee !Weɗ ɗumb ɓi sang ɗa.7Yaki fu yak Nikiɗi neeFu saahiɗ ɓi sang ɗa.Fu fuuɗsiɗ ayrukiŋ ɗa nee !Eey dohɗiŋ wa !Wa hoomɗiɗ ɓa findi mbaang ee !Eey dohɗiŋ wa !
8Nikiɗi ! Iikiŋ ɗa neeNangɗohiɗ masuɓ ca.Ginaah ca tufkiɗ saɗ eeFindi miir ee !Masma sah namiɗ ndeng eeWaŋ dungaŋ cookma.9Sangiɗa woyeeɗa neeŊ hey ɓa taambɗe.Sangiɗa woyeeɗa neeŊ hey ɓa ambe.Sangiɗa woyeeɗa neeŊ paysoh in ciŋ ɓa.Sangiɗa woyeeɗa neeŊ raak ini ŋ waaɗ jen.Sangiɗa woyeeɗa neeŊ fuur ndangiŋ ngo.Sangiɗa woyeeɗa neeŊ hey ɓa sooƴɗe.10Nikiɗi fu fuuɗissa rek ee,Cookma ulla ɓa.Ɓa ɗiigga nga haa ne beteehŊ ɗooƴ-ɗooƴ cookma.
11A yinde kooh mand na ɗa neeŊ kooh caŋ ɓooɓa ?A yinde na siñaarɗe sagu hool ?A Nikiɗi nee !A yinde Kooh neƴƴohu nee ?A Nikiɗi nee !Po a carra ƴeeku nee ?A Nikiɗi nee !A tumee in feyohiɗ eeFindiifu nee ?12Nikiɗi fu raɗis ñaahmiŋ ɗa nee ;Kehƴi onnda ɓa.
13Nikiɗi waaɗohaaɗiŋ ɗa neeWa na ɓoƴsukeeɗi.Fu yurhiɗiɗ cuuɓiŋ ɗa fu tosNa hatiliŋ ɗa nee !Fu yii ɓay ɓa Nikiɗi neeƊiskaŋ ɗa hoolɗa.14Cuuɓ ci kerhiɗa nee ;Ɓii saakɗoheeɗa.Filistiici neƴƴohiɗ lool ee,Ɓii ngaŋ tiis.15Kilifaacaŋ Edom Nikiɗi neeIiƴiɗ dic ee.Te ɓa adgoh MowabƁii kot-kotɗeeɗa.Ɓi Kanaan jen Nikiɗi neeJaahɗiɗ lool ee.16Neƴƴoh na tiit Nikiɗi neeAasiɗ ɓa jen ee !Ɓa hot hatiliŋ yaahiŋ ɗa nee ;Ɓa minɗi yoond.Ɓa mandiɗ nga haa ne atoh.Eey Nikiɗi nee !Po cuuɓiŋ ɗa wii taamb ee.Eey Nikiɗi nee !Po cuuɓi fu tos wii taamb ee.Eey Nikiɗi nee !17Fu hey ɓa genɗe Nikiɗi neeŊ tangoora fu raakoot,Ɗiska fu haɓiɗ kahan fu nee !Eey Nikiɗi nee !Ngaŋ ɗiskaŋ ɗa hoolɗa nee !Eey Nikiɗi nee !Wa fu haɓiɗ na yaah ciŋ ɗa nee,Fu yi Heɗ ɓoo.
18Nikiɗi a yi nikan buur eePo faw ee ! »
19Ɗaa, panis ca na wotiir caŋ Firawna, na ɓooɓa rapee ca aaseen ŋ cookma. Nikiɗi dokinnda masma ŋ ɗafuk ɓa. Israayel ci taammba ŋ merhey ma suyɗa, ŋ ɗooƴ cookma.20Maryam, woosuuɗa ɓitɓa, taambɗoh Aaruna, ɓayya haan. Ɓitiɓ caŋ Israayel jen ñaakiɗta ɗe, ɓa tipeeɗa, ɓa mbeceeɗa.21Maryam dokkissa ŋ ƴeeka an :« Nikiɗi ƴeekaah ƴeeku neeŊ hey ɗe ƴeekeNdamiŋ ɗe teeɓohiɗ neeA yi min eeA kooɗkiɗ panis na rapoh panisA julla ŋ cookma. »

Masmaŋ Mara

22Musaa adgiɗta Israayel ca, ɓa pulohha Cookmaŋ-Hapeel-ca, ɓa yurahha kehƴa hulangaŋ Suur. Ɓa tiinnda neeh kaahay, ɓa hotɗi masmi ɓa anan.23Wa ɓa kaɗ po ɓa reesa ɗiska na woyse Mara, masuɓ raakeen nga, waaye ɓa mineeɗaa an, wa nikee aayiɗ hak weɗ tah ɗiska teekuusa Mara (aay).24Ŋ ineem, mboolnda lahtukeeɗa ŋ Musaa, ɓa woosa ne : « Ɓoo na hee ye ane ? »25Musaa kiimmba Nikiɗi na leehuk. Nikiɗi teeɓpa ɗe ndooɗ, a ɓekkaa ŋ masma, wa hannda min anu. Ŋ ndaam, Nikiɗi eɗta Israayel ca nakoh ciŋ ɗe na haɓɗaah. A nammba ɓa markisuk.26A woosa ɓa ne : « Ɗu kerah keeh-keeh woo kiŋ ngo, mi yi Nikiɗi Koohiŋ ɗu, te ɗu haɓɗee in ci ŋ amb ne ceɗ yurah ɗah, ɗu ɓekoh nof in ci ŋ nakoh, te ɗu haɓiɗ haɓɗaah ci jen ɗah, ŋ heyɗi yipkiɗe kosaay nga ɗu findi ŋ tumoh na ɓi Misra. Laam ñam Nikiɗi yi na wirɗee ɗu. »27Israayel ca kaɗeeɗa po ɓa reesa Elim, ɓa raakka cul masuɓ ndaŋkiyaah na kanak (12) nga, na tas tandarma ndaŋkiyaah-yasna-kanak (70), ɓa dalla nga, ŋ sero masma.
expand_more
Search