Anutu Ikamke Zin Israel15mna_png

Mboe ta Mose ipakur Merere pa

1Mose ziŋan zin Israel timbo mboe ti pa Yooba.
“Nio ko aŋbo mboe pa Yooba,pa ni imaŋga mi ikam uraata biibi, tana ikam zaana biibi.Ni igiibi zin hos mi karisma tisula len tai.
2“Yooba ipombolmbol yo, tana aŋbo mboe pini.Ni ulaaŋa tio mburaanaŋana.Anutu tio, ni ta kembeiŋana.Tana nio ko aŋpakuri pa mbulu kini ndabokŋana.Muŋgu tamaŋ imbesmbeeze pini.Mi nio tomini aŋwidit uruunu isala kor.
3Merere, ni irao kat pa malmal.Ni zaana Yooba.
4“Zin malmal kan ki king ramaki karis kizin na,Yooba igiibi zin ma timap tisula len tai.Mi zin bibip kizin malmal kan ta king itunu ipeikat zin na,zin tisula len tomini.
5Tai ilol zin ma timon kembei ta pat.Tisula len ta mozo lukutuunu a.
6O Yooba, nomom woono na, mburaanaŋana.Pa nu pun koyam koi bizin ma timap.
7Nu ta biibi ma lip.Pa zin wal ta timaŋga be tizooru na, nu pundu zin sula tai.Ketem ibayou kat pizin.Tanata pambiriizi zin ma timap, kembei ta you ikan rie.
8Nu ketem malmal kat, tana pei miiri biibi ma imaŋga.To tai imet ma iwe ru,mi pakaana ru tana timender kembei ta siiri.Duubu tiur nin ma timbot.Mi tai leleene iwe zaala ma imbol.
9“Koyam koi bizin tiso ta kembei:‘Niam ko amketoto zin Israel mi amse kizin.Ko amyo mburu kizin ma irao yam.Ko amkas zin ma timap lup. Naso leleyam ambai.Buza tiam isombe itaara tomtom pakan.Niam ko amkoto zin pa mburoyam.’
10“Tamen nu kam miiri ku ma imar mi iwi tai,to ilol zin ma timap lup.Tisula mozo leleene kembei ta pat.
11“O Yooba, nu kadom sa som.Pa merere toro sa irao u na som. Som kat!Nu potomŋom mi ndabokŋom.Mi nu kamam uraata bibip ta ipa ndel kat.Tabe tomtom timototo u, mi tipakurkuru.12“Nu giibi nomom woono mi kas koyam koi bizin.Toono kwoono ikaaga mi iwon zin ma timap lup.
13“Pa nu toto sua ku mbukŋana mi urur lelem pa wal ku.Tanata tatke zin pa pataŋana kizin, mi kamam peeze pizin.Nu mbolkeŋkeŋŋom.Tanata yaaru zin, mi kam zin ma tila tipet murim potomŋana.14Zin karkari tileŋ uraata ku uruunu na, timurur mi timoto.Zin Pilistia kan tileŋ na, motoŋana biibi ikam zin ma tiseŋeeŋe.15Zin bibip ki Edom tileŋ na, timoto ma mburan imap.Mi zin peeze kan ki Moap timurur mi motoŋana ikam zin.Mi zin wal ki Kanaan na, mburan imap kat.16O Yooba, zin tileŋ urum pa mburom biibi,tanata motoŋana biibi ikam zin ma mburan imap kat.Pa tirao be tikam kosa sa som.Nu itum ta kam yam Israel ma ampet, bekena amwe lem.Tana zin karkari ko timendernder sorok kembei ta ke tuntun,mi tirre yam mi amlela amkam toono kizin.17O Yooba, nu ko kam yam ma amar ambot ambai su abal ku.Abal tana na, murim potomŋana.Pa nu pamender urum ku isala.
18“Yooba, ni ta king biibi ŋonoono.Peeze kini ko iseeŋge iseeŋge ma ila.”

Mboe ki Miriam

19Tana Yooba ipomon zin malmal kan ki king raama zin hos mi karis kizin ma tisula len tai. Tamen ikam ma toono raraazaŋana ipet pizin Israel. Tabe tiwwa ma tilae pakaana mbaaga.20To Aron toono moori Miriam ta Anutu kwoono na, ziŋan zin moori ta boozomen tikam kakaaba kizin, mi tirak.21Mi Miriam imbo mboe tiŋgi:“Kombo mboe pa Yooba.Pa ni imaŋga mi ikam uraata biibi, tana ikam zaana biibi.Ni igiibi zin hos mi karisma tisula len tai.”

Yok pakpakŋana

22To Mose iso pizin Israel ma timaŋga mini pa pai. Tizem Tai Siŋsiŋŋana, mi tiwwa pa lele bilimŋana ta zaana Sur na ma irao aigule tel. Mi tindeeŋe kan yok sa som. To tipet lele Mara. Lele tana yok imbotmbot. Tamen yok tana pakpakŋana. Tabe zin Israel tirao be tiwin som. (Uunu tina ta tipaata lele tana zaana be Mara.)24To zin Israel timaŋga mi tikam sua boozo pa Mose. Tiso: “Waii, iŋgi ko amwin koyam yok iŋgoi?”25Tana Mose itaŋroro Yooba be iuuli. To Yooba iso i pa ke ta. Mi Mose ikam ma ipiri sula yok, to yok tana itoori ma iwe ambaiŋana. Timbotmbot tina, mi Yooba iur tutu pakan pizin bekena itoombo zin pa.26Iso: “Nio Yooba ta Anutu tiom. Kozo keleŋ la kalŋoŋ, mi kakam mbulu ta indeeŋe men pa nio motoŋ. Sombe motoyom iŋgalŋgal tutu tio mi koto kat, inako aŋseeze motoyom pa pataŋana sa kembei ta aŋur pizin Aikuptu na som. Pa nio Yooba ta aŋurpewe mete tiom ma niyom ndabok.”27To zin Israel tipa ma tila tipet lele Elim. Lele tina na, ka yok bukbukŋan laamuru mi ru, mi ka ke det tomto tel laamuru. Ke tana ŋonoono ambai pa kanŋana. Tana tila tipet tina, to tipun su be timbot kolouŋana pa yok.
expand_more
Search