Nnwẹr kw'Orenga15mfo_lis

Emọng cha Mosẹs ọmaana Miriyam akkọhni

1Mẹ wọ, Mosẹs ọmaana anọng p'Israẹl akkọhn ẹmọng nda anang Ọvaar Ibinọkpaabyi aben bi,“Kaam ńkkọhn nnang Ọvaar Ibinọkpaabyiokhuri k'ekhema-barada chẹ.Kẹ okk'ẹnyanyaang, ọmaana ọyaar-ẹnyanyaang,otzini otzem k'ọraanga kw'ideden.2“Ọvaar Ibinọkpaabyi wọ ode ẹfa chaam, ọmaana ẹmọng cha kaam nkkọhni,Kẹ wọ ode ẹnaanga chaam.Kẹ wọ ode Ibinọkpaabyi kwaam. Kaam ńnang-ẹ ẹtzọhnga,kaam ńdini Ibinọkpaabyi kw'otte kwaam okpobh k'ẹrọng.3Ọvaar Ibinọkpaabyi wọ ode okkenggitza,kẹ okpen Ọvaar Ibinọkpaabyi.4Kẹ okk'akpaar pa Phero pa nnyanyaang mindọr, ọmaana agbongnọng pẹ,ọtzọkha otzem k'ọraanga kw'ideden.Ọtzọkha akhaan-nọng pa Phero p'abari odik ọtzam,odimi k'Ẹraanga-khora.5Asi donga-dong mba akk'bẹ abhọri,bẹ atzem k'esiwọr mach'ọtza.6“O Ọvaar Ibinọkpaabyi, odimbọhk kwọ,ode ẹfa ch'ideden.O Ọvaar Ibinọkpaabyi, atzim ẹfa ch'odimbọhk kwọ asi,ọttattaanga-nọng araami.
7“K'ededen ch'ẹvaar chọ,akhem anọng p'attaang anang-ọ.Kọ atte ittemdọkhiji sọ ọbọhk,ikwọmi attattaanga-nọng pọ mach'araraari-bukhi.8Agwum ọwọhng kwọ,asi atzobha, abe bi pyir,asi p'abhobh-obhobh an-arimi agaangi, mach'echumi,k'esittem asi an-abhakhi arim-orimi.9“Ọttattaanga-nọng ọsi ẹmma, oben bi,‘Kaam ńgubh bẹ ka nnam, mbiri ńgọbha bẹ.Kaam ńchi ọgbọm k'ekpo pyabẹ;Kaam ńchi pyẹ ttara agwọriji paam.Ọkkangkkaang kwaam wọ kwa ńdima mfhu bọng,ńdima ọbọhk kwaam ńdimi bẹ.’10Agwum ọwọhng kwọ,asi anwa akpori bẹ,bẹ atzem k'esiwọr,mach'opo otzemi k'esiwọr.
11“O Ọvaar Ibinọkpaabyi, k'ottem kw'idik s'anọng akpobh biphyir, mbọng vọ obeng-ọ abẹ?Anyi wọ obeng-ọ abẹ?K'ẹvaar, awurada pọ ayọhng bẹ biphyir,bẹ akhaam ojora fọ, k'ikpokpobha sa bẹ anang-ọ,kọ asi idik s'ipe anọng for.12Kọ anemi odimbọhk kwọ kw'ẹfa,irerek imyi attattaanga-nọng pọ.
13“K'idadaakha sọ s'ini ottotto ikhaam,átzima anọng pa kọ akk'abhekha eden,átzima bẹ eden k'ẹfa chọ,achina k'irukhabe sọ s'awurada.14Idibhon íbhaanga idik nna, opoma osi bẹ,ojora ọ́bọkha anọng pa Philistiya.15Ojora ọ́bọkha avaarnọng p'obhon kw'Edom,opoma ọ́nwa adabhi pa Moab.Ẹfa ẹha avaarnọng pa Kenaan;16opoma ttara ojora ọ́nwa bẹ.K'ẹfa chọ,bẹ amun k'ibe rani, mach'ẹtzakpamatzẹmaa anọng p'akk'akkaana, akwọbha afona, O Ọvaar Ibinọkpaabyi,matzẹmaa anọng p'akk'abhekha akwọbha afona.17Kọ átzima anọng mba adim kẹ, abira attima bẹ aranga k'egbegbeho ch'ede chọ.O Ọvaar Ibinọkpaabyi, ibe sa kọ asi mach'irukhabe sọ,ide owurada-họhm kw'asi ttara mbọhk sọ, o Ọvaar Ibinọkpaabyi.18Ẹvaar ch'Ọvaar Ibinọkpaabyi éwobha,matzẹmaa ogbe ode.”19Mada nnyanyaang sa Phero, ọmaana akpaar pẹ pa nnyanyaang mindọr, ọmaana ayari-nnyanyaang pẹ adimi k'asi, Ọvaar Ibinọkpaabyi osi asi p'ọraanga kw'ideden anwa akpori bẹ. Yina, osi anọng p'Israẹl arenga k'irerek k'ottem kw'ọraanga.20Mẹ wọ, Miriyam, kw'iwa ode ọsẹ-jaakhi kw'Ibinọkpaabyi, obiro ode ọgbaanọkka kw'Aarọn, ọtzọkha ebin ekhirachẹ, otzima panọng p'Israẹl eden bẹ akhir mbin, abira atzubh.21Miriyam ọkkọhn ọnang bẹ, oben bi;“Bọng kkọhn anang Ọvaar Ibinọkpaabyi,okhuri ekhema-barada chẹ,Kẹ okk'ẹnyanyaang, ọmaana ọyaar-ẹnyanyaang,otzini otzem k'ọraanga kw'ideden.”

Asi p'ajobh-ojobhi

22Mẹ wọ, Mosẹs otzima anọng p'Israẹl eden bẹ abina aji Ẹraanga-khora, achina k'ibe s'anọng an-arukhi sa Shur. Bẹ arenga k'iwu ittaan k'ibe s'anọng an-arukhi, bẹ asi kare.23Mada bẹ apyiri ka Mara, bẹ asi pa Mara kafha agwo, okhuri da asi mba ajobh-ojobhi. Kẹ wọ iwa osi bẹ ayeri ibe nna Mara.24Mẹ wọ, anọng p'Israẹl anwọhni anang Mosẹs, aben bi, “Mbọng fa mogwo o?”25Mẹ wọ, Mosẹs obhom ọkpẹkhi Ọvaar Ibinọkpaabyi, Ọvaar Ibinọkpaabyi ọkhọhkh-ẹ ommenkpakpa, kwa Mosẹs odungi ọbhari k'asi, asi p'ajobh-ojobhi an-abhakhi adam-ọdam. Ma Mara, Ọvaar Ibinọkpaabyi ọnang anọng p'Israẹl aphaangi, ọmaana ndọhna k'odem kwa bẹ aruk, obiro oyoma bẹ, ifha ore s'ode na bẹ afha ahok aphaangi pẹ.26Oben bi, “Idikha bọng afha átzọhkha ogbe áyong-m itzọhng, asi idik s'itzor-otzor ka chen paam, bọng abira ahok aphaangi paam, kaam bọng ikhọmmana sa nnangi anọng p'Ijip kínang. Kaam wọ nde Ọvaar Ibinọkpaabyi, kw'ode Ibinọkpaabyi kwabọng, kw'obin bọng k'ikhọmmana.”27Mẹ wọ, anọng p'Israẹl atte Mara ọbọhk achina k'Elim. M'Elim, akhekhaho jobh obhiri afa, ọmaana aji arọbh attaan obhiri jobh awobh mẹ. Wa anọng p'Israẹl akwu abhing abaanga ngekha nnuma.
expand_more
Search