RAFUDOO AKARAFA15bjr_wbt

Mooseena Idi.

1Mikari Mooseefa faqa Isaraee maqannaa faqa maaqi qimasee Yaaweena amooqira idi raqau.Qinee Yaaweenara idi raanauranoo.Mifa rakiranaki uriqarainara miqianaura.Mifa qoosauqa faqa qoosasaa marusa faqa ooruku nammariki mara aqinara idi raanaura.2
Yaaweefa qini afeeka ititarafa maridanoo.Mifa qini asumu maroofa maridanoo.Mifa qini Anutufa marifaqa qinee mina amooqianaura.Qini qikoona Anutunafa marifaqa qinee mina afeekara idi raanaura.3
Yaaweefa afeeka rakira fasiqa maridanoo.Mina auqu Yaaweefa maridanoo.4
Mifa Isipa maqanna sundiauqa faqa misa qoosa karauqa faqa rafusu ooruku nammariki aqinoo.Mina uriqarara sundiauqa Taatuqee Ooruku Nammariki ukuqneea.5
Ooruku nammari faruma fannoo misa rafaaqa fusaifaqa misa ooniara foora meemaqoo maqasaa ooqu maridaqa.6Oo Yaawee ani asauku uqannai asauku fannoo naaquqara afeeka maridanoo.Mi asaukufa namuqaa naruseenoo utitiqeenoo.7Aneenna firaa uriqararanannai aneenna namuqaa rafusu aquananoo.Ani aanoo qirafa ida dudaaqasaaqari qeera foora mannimaqaananoo.8
Anee ooruku nammari fuaqasaananoo nammari mandi mareenoo aaqanara foora ooru finoo.Nammari dinni dinni innooqa maree safasara foora ooru finoo.Nammari dinni dinni raina fufanoo maqa meemaqoo afeekaika minoo.9Namuqaauqa maaqi qiqau.Maasa misa nifaqasee qumaraanauranoo.Misa qumaraseeqa misa amiqira ainaina maasa didimarina aiqama maraanaura.Maasa qeeqa rakira paipanannai naruseeqa misa aiqama ainaina mararee qia.10
Miqi qiafana anee Yaaweefa moodaannai aidoo fuaqasaananoo Isipa maqannaasa ukuqneea.Miqimma saifaqa misa ooniara foora firaa difukunaki ooqu fia.11
Yaawee, yafee unna anutusakiqari ani fooqaafa maridanoo fee. Sia moo fannoo.Yafee ani amana maridanoo kaaqa naaquqara andeeqarafa maridanoo fee.Yafee faiqí sia amana auqaaqaa ira ainaina faqa afeeka ainaina anee imarianandee masee auqaannoo fee.12
Aneenna asauku uqannannai uqeera saananoo maqa fannoo namuqaa nambiqeenoo.13Aneenna qima afeekaikiranasaa mapukusee maridana faiqí anaasee mandainainaki mariusa nifiqa maree fimariananoo.Aneenna afeekannoo misa indaarunni kamma nimaqa maree aneenna naaquqara andeeqara maqasaa quqanni seennaranoo.14Anaamuru minara irifanoo naaquqeenoo naindiri raannoo,Firistia maqannaasa iriafanoo maparaairafa misa qumareenoo.15
Idooma maqannaa karaambaiqauqa faqa iriafanoo naaquqeenoo.Mooapa maqannaa afeeka fasiqauqa faqa naindiri raidanoo.Kannaana maqannaasa afeeka faqa nammari kidanoo.16
Maparaa irafa faqa firaa rufiarafa faqa misaki maridanoo.Misa ani Yaaweena afeeka qafamasee naaquqaifaqa kaqi muquriqa mariafaqa ani faiqí anaasee karabusakinaana iduku saanausa misa nifusaa fiqaraidaqa.17
Anee misa nifiqa maree aneenna aaqanasaa munuseenana asumu ainainara foora ummaqu saananoo.Anee Yaaweefa aneennara utaaqama qaanna maqusanaki munusaananoo.Amaana maqa aneenna usakaqaanna maqusanaki munusaananoo.18
Anee Yaaweefa naaru naaru uriqarara karaambaiqa marinnaranoo.

Miriamma nammarina idi.

19Isaraee maqannaasa ooruku nammari qambaana aadana maqasaa taqaqau. Fitaqafufaqa Isipa maqannaasa qoosa kara faqa nári qoosauqa faqa nári daraiwaauqa faqa mi ooruku nammarinaki ooqu roofanoo Yaaweefa kaifaa nammariara qufanoo quminoo misa rafaaqa finau.20Aaroona anasaafa Miriama nammarifa Anutuna tamummaqara anaasee marufa marinau.Isipa maqannaasa nammariki kuqutaika fufanoo dukaanaa qumareenoo aridanoo idi ranau.Anaasee aiqama qafamaseeqa nári dukaanaa maree mina faqa oonuree aridaqa niqoori raqee mariqau.21
Miriamma nammarifa maaqi qimasee idi ranau.Yaaweenara idi raaqa.Mifa rakirana firaaqoo uraaqareenoo,mifa qoosauqa faqa qoosasaa nimariasa faqa ooruku nammariki rafusu aqinoo.

Sukaqee mari nammarifa.

22Mooseefa Isaraee maqannaa taatuqee ooruku nammarindaraana nifiqeenoo Suraa aadana maqa maaqaki quqanau. Qaaramoo faasaanasaa aadana maqa maaqaki fidaqa sia nammari paquriqau.23Misa Maraa maqa maaqaki oonureeqa nammari moo paqurimasee noofanoo suka narufaqa sia naqau. Minara mi maqa maaqana auqu Maraa fee qiqau. Mi auquna oosana sukaqee mari fee qiqau.24Isaraee maqannaasa Mooseena aanoo qimamaqaidaqa qiqau. Maasa nana nammari fee naanauree.25Mooseefa iriseenoo afeekaika maseenoo Yaaweenara innaaru qinau. Innaaru qufanoo Yaaweefa Mooseena saqari moo uqafiqoofanoo Mooseefa mi saqarina nammariki aqusoofanoo nammari amiqinau. Miqoo Yaaweefa narí sanda ufa mi mau fuaqeera nimiseenoo miqoo misa nimana masee qafanau.26Yaaweefa qimanniminoo qinau. Innee qini ufa qaidusiqa qinee andeeqara ainainee qimarunnana auqeeqa kafaa qini sanda ufa mau fifaqa qinee sia manda aupurarana Isipa maqannaa nimiafannandee iqa inni nimianaura. Qinee Yaaweesa inni aurirana taikannisee marunausa maridaqa.27Miqooqari Isaraee maqannaasa fifiiufaqa Eerimma maqa maaqaki oonuraqau. Miqoo qisaukuqara taikasee qikunni ooqu qaara marasee 12 nammari maqakiqari ururee maruna faqa fasaafana fooqaa ira saqari moomoo 70 marinau. Miqoo nammari afainni misa uiqaana maqa usakasee mariqau.
expand_more
Search