1Allabatala ka a fɔ Musa yɛ ko:2«I ye a fɔ Isirayɛlikailu yɛ ko ii ye ii kɔsɛ ka wa ii daa makɛ Pihahirɔti so dala, Mikidɔli so ni kɔɔji tɛma. Ii ye wa ii daa makɛ ye le, ka ii ɲabɛn Bahali-Sɛfɔn so la kɔɔji dala.3Ni ii ka wo kɛ, Ferawuna ri a fɔ ko: ‹Ii ra kɔndafili wula kɔndɔ, wadiya tɛ ii la wo kɔ.›4N di a kɛ Ferawuna jusu ri a ragbɛlɛya. A ri wuli wo rɔ ka ii kɔsaran, kɔni n di se Ferawuna ni a la kɛlɛdenilu la. Mɔɔilu ri n tando wo rɔ. N wa se woilu la, Misirankailu ri a lɔn ko nde le Allabatala ri.» Isirayɛlikailu ka a kɛ ikomin Allabatala ka a fɔ ii yɛ ɲa mɛn ma.5Awa, a fɔra Ferawuna yɛ tuma mɛn na ko Isirayɛlikailu ra wa, a ni a la ɲɛmɔɔilu miriya yɛlɛmanda. Ii ka a fɔ i ɲɔɔn yɛ ko: «An da nfen de kɛ ɲin di? Nfenna an sɔnda ii ye wa? Ii tɛ an bolo jɔnya la butun wo rɔ.»6Ferawuna ka a la sowontoroilu ni a la kɛlɛdenilu rabɛn Isirayɛlikailu kɔsaran kanma.7A ka sowontoro ɲuma kɛmɛ wɔɔrɔ ta ka woilu la Misiran sowontoro tɔilu bɛɛ kan. A ka kɛlɛden kuntii lasii sowontoroilu kelen kelenna bɛɛ kɔndɔ.8Allabatala ka a kɛ Ferawuna jusu a ragbɛlɛyanin de tɛrɛ. Wo rɔ, a ka Isirayɛlikailu kɔsaran. Wo tuma, ii ye bɔla Misiran jusulatɛɛ rɔ.9Misirankailu la sowontoroilu ni sofadenilu ni kɛlɛdenilu bɛɛ wara Isirayɛlikailu kɔ, ka woilu kɔsaran fɔɔ ka wa sudunya ii daa makɛ diya rɔ i kɔrɔ kɔɔji dala. Yɔrɔ wo ye Pihahirɔti so tɔrɔfɛ, ka ɲabɛn Bahali-Sɛfɔn so ma.10Isirayɛlikailu ka ii ɲa lɔ ka Ferawuna ni a la kɛlɛdenilu natɔla yen ii kanma. Woilu tun da sudunya ii la i kɔrɔ! Wo rɔ, Isirayɛlikailu silanda kojuuya ka ii makasi Allabatala yɛ ko a ye ii dɛmɛn.11Ii ka a fɔ Musa yɛ ko: «An su don yɔrɔ le tun tɛ sɔrɔnna Misiran wa? I nani an di an faa diya le wula kɔndɔ yan wo rɔ wa? Ni wo tɛ, i ka an nabɔ Misiran nfenna?12Ka an to Misiran, an ma a fɔ i yɛ ba ko ni an bɔra ye, ko su ɲin di an sɔrɔn? An ka a fɔ i yɛ ko i ye an to ten, ko an di to Misiran ye ka kɛ Misirankailu la jɔnilu ri, baa jɔnya wo ka fisa an na saya ri wula kɔndɔ yan.»13Musa ka ii jabi: «Ai kana silan. Ai ye makɔnɔni kɛ ikɔ tuun! Allabatala ri ai kisi ɲa mɛn ma bi, ai ri wo yen. Ai ɲa ye Misiranka mɛnilu la ɲin, ai tɛ woilu yen butun fewu.14Allabatala ri woilu kɛlɛ ai nɔ rɔ. Ai ye i sabari ka wo ragbɛ ikɔ tuun.»15Awa, Allabatala ka a fɔ Musa yɛ ko: «I ye i makasila n yɛ nfenna, ko n ye ai dɛmɛn? I ye a fɔ Isirayɛlikailu yɛ ko ii ye i wuli ka wa.16I ye i la gbeleke kɔrɔta kɔɔji kun na ka kɔɔji fara i ɲɔɔnna, sa Isirayɛlikailu ri tamin duu jaran ma kɔɔji nɔ rɔ.17Nde ri a kɛ Misirankailu jusu ri a ragbɛlɛya. Wo rɔ, ii ri don ai kɔ. Wo wa kɛ, n di se Ferawuna ni a la kɛlɛdenilu ni a la sowontoroilu ni a la sofadenilu bɛɛ la. Mɔɔilu ri n tando wo rɔ.18N wa se Ferawuna ni a la sowontoroilu ni a la sofadenilu bɛɛ la, ka n na gbiliya yiraka, Misirankailu a ri a lɔn ko nde le Allabatala ri.»19Alla la mɛlɛka mɛn tun ye wala Isirayɛlikailu ɲɛfɛ, wo taminda ii kɔfɛ. Sanfinnama fanan bɔra ii ɲɛfɛ ka tamin ii kɔfɛ.20Wo bilara Misirankailu ni Isirayɛlikailu tɛma. Su wo bɛɛ rɔ, dibi donda Misirankailu wara fan fɛ, kɔni kɛnɛ bɔra Isirayɛlikailu wara fan fɛ. Wo rɔ, Misirankailu ni Isirayɛlikailu ma ii madon i ɲɔɔn na su wo rɔ.21Musa ka a bolo kɔrɔta kɔɔji kun na. Allabatala ka fɔɲɔ ba lana ka bɔ telebɔ fan fɛ. Wo tɛɛra su muumɛ rɔ. Fɔɲɔ wo ka kɔɔji ta fɔɔ ka a tɛɛfara fila ri ka duu jaran bɔ a tɛma.22Isirayɛlikailu taminda ji tɛɛfaranin wo tɛma duu jaran kan. Ji layɛlɛnin tɛrɛ i ɲɔɔn kan ka kɛ ikomin jin ii bolokinin fan fɛ ni ii bolomaran fan fɛ.23Misirankailu ka ii kɔsaran. Ferawuna a la sofadenilu ni a la sowontoroilu bɛɛ donda kɔɔji tɛfaranin tɛma ka wa Isirayɛlikailu kɔ.24Suba ma, Allabatala tora tamɛlɛnnama ni sanfinnama a rɔ ka a ɲa lɔ Misiran kɛlɛdenilu rɔ. Ale ka a kɛ Misiran kɛlɛdenilu kɔndafilira piripara fɔɔ ka ii silan!25A ka ii la sowontoroilu sen bɔla. Ii wa ko gbɛlɛyara wo rɔ. Misirankailu ka wo yen tuma mɛn na, ii ka a fɔ i ɲɔɔn yɛ ko: «Allabatala ye an kɛlɛla Isirayɛlikailu yɛ. An ye an bori ka an bɔ yan, an ye ii to ye.»26Allabatala ka a fɔ Musa yɛ ko: «I ye i bolo kɔrɔta kɔɔji kun na, sa ji ri kadi ka jii Misirankailu ni ii la sowontoroilu ni ii la sofadenilu kan.»27Musa ka a bolo kɔrɔta kɔɔji kun na. Bandakada le tɛrɛ, kɔɔji ka a kɔsɛ a nɔ rɔ. Misirankailu tɛrɛ ye a fɛ ka ii bori ji ɲɔ rɔ, kɔni Allabatala ka a kadi ii kan.28Kɔɔji ka a kɔsɛ a nɔ rɔ ka sowontoroilu ni sofadenilu bɛɛ mira, Ferawuna a la kɛlɛdenilu bɛɛ kɔnin. Mɛnilu bɛɛ donda kɔɔji rɔ Isirayɛlikailu kɔ, woilu bɛɛ tora ji rɔ. Hali mɔɔ kelen pe ma bɔ a rɔ.29Isirayɛlikailu kɔnin tun ka ii taama duu jaran kan ka tamin kɔɔji tɛɛfaranin tɛma. Ji tun nayɛlɛra i ɲɔɔn kan ka kɛ ikomin jin de ii bolokinin fan fɛ a ni ii bolomaran fan fɛ.30Nba, Allabatala ka Isirayɛlikailu kisi Misirankailu ma wo lon. Isirayɛlikailu ka Misirankailu fureilu lani yen kɔɔji da la ye.31Allabatala ka fanka ba mɛn be Misirankailu kan, Isirayɛlikailu ka wo yen ii ɲa la. Wo rɔ, ii silanda Allabatala yɛ. Ii lara ale la, ka la a la jɔncɛ Musa fanan na.