ካዋ ግብራ
1ካዎይ አርፀክስስ ህንደ ቢታፈ ቶጰ ቢታ ጋካናዉ ደእያ፥ ፄታነ ላታማነ ላፑን ቢታ አይስያ ዎደ ሀንዳባ።2ካዎይ ባ አራታን ኡትድ አይስያ ዋና ካታማይ ሱሳ ጌተቴስ።3እ ካዎትዳ ሄን ላይን፥ ባፐ ጋርሳራ ዳይናታስነ ቢታ አይሰይሳታስ ግታ ግብራ ጊግስስ። ሄ ግብራ በሳን ሜዶናነ ፋርሰ ቶራ ሞጮናት፥ ቢታ ሃረይሳትነ አይሰይሳት በንትዶሶና።4ካዎይ እስ ፄታነ ሆስፑን ታሙ ጋላስ ኩመ ባ ካዎተ ዱረተነ ባ ያሽያ ቦንቹዋ ኡባ ኤንታ በስስ።5ሄ ጋላሳታፐ ጉየ፥ ካዎይ ቃስ ሀራ ላፑን ጋላስ ጋምእያ ግብራ፥ ሱሳ ካታማን፥ ዱረፐ ማንቆ ጋካናዉ ደእያ አሳ ኡባስ ጊግስስ። ሄ ግብራይ ካዎ ጋይ ደእያ አታክልተ በሳን ጊግስ።6ሄ በሳን ደእያ ዳባባይ፥ ሊኖፐ ኦሰትዳ ቦነ ካሎሰ ገሸታን አሌቅስ። ገሸት ኦቻ ቴራ ዳንያ አልኦ ሊኖ ክረን አን፥ እብነባራደ ጌተትያ ሹቻፈ ኦሰትዳ ቱቅያ ቦላ ደእያ ብራ ምግዶታን ካቀትድ ኡትዶሶና። ቃስ ዎርቃፈነ ብራፐ ኦሰትዳ አርሳት፥ ዱማ ዱማ ማል ደእያ አልኦ ሹቻታፐ ኦሰትዳ ባሱዋን ማራን የገትዶሶና።7እሶይ እሱዋፈ ዱማ ግድዳ ዎርቃ ቡርጩኮን ዎይነ ኡሽ አሳ ኡባስ እመትስ። ካዎይ ዳሮ ኬሀ ግድዳ ግሾ፥ ዎይነ ኡሻስ ዛው ባዋ።8እስ እስ አስ ባ ኮይዳ መላ ኡዬስ፤ ሄሳ ካዎይ ኮይሮትድ ባ አይለታስ ኦድስ።9ሄ ዎደ ካውያ አስፂና ማጫሳ ኡባስ ግብራ ካዎ ጋን ጊግሳሱ።10ግብራይ ዶመትዳ ላፑን ጋላስ፥ ካዎይ አርፀክስስ ዎይነ ኡሻ አልድ ኡፋይትዳ ዎደ፥ ባ አይለታ መሁማና፥ ብዝታ፥ ሀርቦና፥ ብግታ፥ አባግታ፥ ዛታራነ ካርካሳ ጌተትያ ላፑን ሹፋታ ፄግድ፥11“ካውዉ አስፂኖ ካዎተ ካላቻ ዎድ ሃ ኤክድ ዪተ” ያግድ ኪትስ። እያ ዳሮ ማላ ሎኦ ግድያ ግሾ፥ ሀላቃትነ አሳ ኡባይ እዮ በአና መላ ካዎይ ኮይስ።12ሽን ካዋ ኪታ እዉ ኦድን፥ ካውያ አስፂና ካዋ ስን ዮና እፃሱ። ሄስ ካዋ ዳሮ ሀንቀስ።13ሄ ቢታ ህግያነ ደኦ ዎጋ ኤርያ አሳ ዞረ ኦይሾይ ካዋ ማታን ሜዘትዳባ ግድያ ግሾ፥ ዎድያባ ሻክድ ኤርያ ጭንጫ አሳታራ ኦደትስ።14ካዎይ ግታ ማት ደእያ ላፑን ፋርሰነ ሜዶና ሹማታ፥ አርቀስዮሳ፥ ሸታራ፥ አድማታ፥ ታርሸሻ፥ ማሬሳ፥ ማርሳናነ መሙካና ፄግስስ።15ካዎይ ኤንታ፥ “ታኒ፥ ካዎይ አርፀክስስ፥ ታ ሹፋታ ኪትን፥ ካውያ አስፂና ታ ኪታ ፖሎና እፃሱ። ሄሳ ግሾ፥ ህገይ ኦድያ ማራን እዮ ዋታናዉ በሲ?” ያግድ ኦይችስ።16ኤንታፈ እሶይ፥ መሙካን ካዋ ስንንነ ሀላቃታ ስንን ሀይሳዳ ያግስ፤ “ካውያ አስፂና ካዋ ፃላላ ግዶናሽን፥ እያ ሀላቃታ ኡባነ እያ ካዎተ ግዶን ደእያ አሳ ኡባ ናቃሱ።17ሀ ካዎተ ግዶን ደእያ ማጫስ ኡባይ ካውያ አስፂና ኦዳይሳ ስእድ፥ ባንታ አዝናታ ካ ዶማና። ኤንቲ፥ ‘ካዎይ አርፀክስስ ባኮ ያና መላ ፄግስን፥ ካውያ አስፂና እፃበከዬ?’ ያጋና።18ሄሳ ፃላላ ግዶናሽን፥ ፋርሰነ ሜዶና ሀላቃታ ማጫሳይ ሄሳ ስእዳ ዎደ፥ ሀች አው ዉላና ጋካናዉ ባንታ አዝናታ ሄሳዳ ግድ ካና። ሄሳ ጋሶን ማቸታ ግዶንነ አዝናታ ግዶን ኦሽ ከያና።19ሄሳ ግሾ ካዋዉ፥ ኔኒ ዶስኮ፥ ካውያ አስፂና ናምአን ነ ስን አና መላ ተቅያ አዋጆ ከሳ። ሄ አዋጆይ ናምአን ላመቶና መላ ፋርሰነ ሜዶና ህግያ ግዶን ፃፈቶ። ሄሳፈ ጉየ፥ ካዎተ ቦንቹዋ ኢፐ ኤካዳ ሀራ ሎኦ ማጫሳስ እማ።20ሀ ኔኒ አዳ አዋጆይ ሀ ግታ ካዎተ ኡባን ኦደትያ ዎደ እስ እስ ማጫስ ዱረ ግድን ማንቆ ግድን፥ ሻኮና ባ አዝና ቦንቻና” ያግስ።21ካዎይነ እያ ሀላቃት ሀ ዞርያን ኡፋይትዶሶና። ሄሳ ግሾ፥ መሙካን ግዳይሳዳ ካዎይ ኦስ።22እ ባ ካዎተ ግዶን ደእያ ዱማ ዱማ ቢታታስ ኤንታ ፕዳለንነ ኤንታ ዶናን ፃፍድ፥ ዳብዳበ የድስ። ሄ አዋጆይ፥ እስ እስ አዝን ባ ኬ ኬ አይስያ ሀላቃ ግደይሳ ኦዴስ።