1Kon nikaat ɓooɓi na altiɗkohe Kooh, findi kuɓuuciŋ ɗe a keeñkoh,2te pesaat ŋ waaɗoh, findi Kiristaani waaɗoh ɓoo, po a eɗohha haf ce wuu ɓoo, wa nikka findi seeƴuk eeñiɗ ngaŋ Kooh.3Faankoh sangohuuɗ na hoolaaɗi nu wa min nik ɗah wala waaɗ kopor, ca kinaat sah kerhu nga ɗu, findi wa joy nikoh ŋ ɓo'-Kooh ci.4Woo moɗaaɗi kinaat kerhu nga ɗu wala woo naandoha, wala woo añndoh baahaaɗi, in ceem moɗɗi ; waaye woo ciŋ ɗu nikaat corkiɗoha Kooh.5Inhaat baahiɗ ne, ali ɓo' ŋ ɓi na faankohe faankoh sangohuuɗ wala hoolaaɗiici wala waaɗiɗ kopor ci - maanaam ñaamkoh kooh nikaaɗi - ali ɓo' nga ɓa heyɗi ɓaahe ŋ Nguuriŋ Kiristaani na Kooh.
Nikaat ŋ siñaari
6Ali ɓo' kinaat ɗu ñaañoh na woo raakaaɗi ; laam ineem weɗ na tahe po ayrukiŋ Kooh keenee ŋ sangiɗ ciŋ ɗe.7Kon kinaat ɓaah ŋ in ci ɓa na haɓɗe.8Ɗeɓgaan ɗu nikee kuɓu ñuus, waaye kotii, ɗu siñaar ŋ niki ɗu nik ŋ Heɗi. Kon pesaat findi kuɓu siñaar.9Siñaari na rime nga ɗu in baahiɗ nu nik na yurhiɗ na keeh.10Jeemaat inhisoh ini neɓ Heɗi ;11kinaat ɓaah ŋ tumohaaɗ ciŋ ñuusi, ca onɗi ɓo' ali in, ɗu kay, teeɓohaat ca teeɓoh.12In ci ɓa na tume ŋ ɗasɗuk, wa kaci ne ca woysee sah.13Waaye in nu teeɓohu ɗah, wa hotuk baahiɗ ŋ siñaar,14laam e siñaari na teeɓohe in ci jen. Weɗ tah wa fiisuuɗ ne :« Yunka, fu yi na neehe,hulta,Kiristaani hey ɗa siñaarɗe. »15Kon markaat baahiɗ ŋ findi ɗu na pesohe ; kinaat nik ɓo' naandiɗ, nikaat ɓo' raakiɗ liiɓohaaɗ moɗiɗ.16Tondkaat ŋ jamanooni Kooh on ɗu ne ɗu haɓiɗ in ci ɗu min, laam jamanooni woti baahɗi.17Kinaat nik ɓo' naandiɗ, jeemaat inhisoh ini Heɗi waaɗ.18Kinaat laar ŋ sangara, wa na ɓekohe ŋ mbalay, ɗu kay, riifaat na Fuuɗsi Hoolohngaani,19ɗu woyee ŋ harmban ɗu na ƴeek ciŋ Sabuur na ƴeek corkiɗoha Kooh, na ƴeek ci puloh ŋ Fuuɗsi Hoolohngaani jen ; ƴeekaat ɗu yakɗee Heɗi na keeñ ciŋ ɗu jen.20Genaat corkiɗ Kooh Baabi ŋ in nu nik, taamboh ŋ tiikiŋ Heɗ ɓoo Yeesu Kiristaa.
Ƴaar na ɓitiice
21Yaa nu nga ɗu ɗah teyɗukɗaat morom ce sagu nupi ɗu nup Kiristaani.22Ɓitiɓ ci, teyɗukɗaat ƴaar ciŋ ɗu, findi ɗu teyɗukɗoh Heɗi.23Laam ƴaar a yi yilif ɓitiice, findi Kiristaani yilfoh ɓi Janguuni, ɓeɗ ɓi faaniŋ ɗe te a nikka Mucɗohiŋ ɓa.24Kon, findi Janguuni teyɗukɗoh Kiristaani, ɓitiɓ ci joy teyɗukɗoh ƴaar ciŋ ɓa ɗaa, ŋ in nu nik.25Ƴaar ci, waaɗaat ɓitiɓ ciŋ ɗu, findi Kiristaani waaɗoh Janguuni na findi a eɗoh haf ce wuu Janguuni,26ne a tuma wuu Kooh taamboh ŋ hoolɗi a hooliɗa ŋ ɓooki a ɓooka na masuɓ na Woo ki.27Weɗ a tum ne a ɓay Janguuni ŋ fikiice findi ɓitiice, a hota, na moɗkiŋ wa, raakaaɗi didim, wa ñugurɗukohuu, wa raakuu ali in mand ɗaa, wa hool fec, te wa raakuu ali sikka.28Ƴaar ci joy waaɗoh ɓitiɓ ciŋ ɓa ɗaa, findi ɓa waaɗoh faan ciŋ ɓa haf ɓa. Yaa nu waaɗ ɓitiice ɗah, a waaɗ haf ce.29Laam ali ɓo' moosɗi sangoh faaniŋ ɗe haf ce ; a na pesɗee wa pesiɗ, a taambkohee wa, findi Kiristaani na tume na Janguuni,30weɗ faaniŋ ɗe, te ɓoo jen cir nga.31Fiis ci woo ne : « Weɗ tah ƴaar hey saɓsukohe na paamu, na ndaamu, a ŋoɗ ŋ ɓitiice, jaar ɓa kanak ɓa nik faan yino. »32Woo keem, wa in nooɗiɗ nik nga ; ñam woo ne ineem na woye ŋ ini kaɗ ŋ Kiristaani na Janguuni.33Ini wir te wa woorra, weɗ ne yaa nu nga ɗu waaɗaat ɓitiice findi a waaɗoh haf ce, te ɓitiɓ eɗ ƴaar ce cir.