1Zaꞌe Badiꞌa zamarone ubugaubuga, eꞌanoꞌo Badiꞌa haḡai hegote radoꞌi.2Kerisoꞌa emeḡe zamaradu emeḡe veize ane bare dibuꞌiro. Aꞌe Badiꞌa haroteꞌe ḡahunoneḡa hohoḡa zu dibuꞌoḡa hohoḡa. Kerisoꞌa ꞌouge haḡairoteꞌe teige, zae zuni zamarotiteꞌenaꞌa, radoꞌi.3Zaꞌe Badiꞌa mone azaḡa ꞌahine, daro fuꞌa ga haḡai toraga nunu ga ununu haḡaiḡa moneo ḡoere ꞌahoga zuni hebeonoꞌo ago rae furenoꞌi.4Ḡoere toraga, ḡoere kauriḡa zu ḡiriho ḡoeꞌa sauꞌaꞌe zae veize mene manoḡa. Zaꞌe Badiꞌa mazao manoḡa tauḡi rae roꞌi.5Za ꞌadi faine ederoꞌi. Daro fuꞌa ga haḡai toraga ga ununu vazeḡa mazaoꞌe Keriso zu Badiꞌaꞌa zuhiꞌaziꞌeteꞌe zamaḡano hiditeꞌe manohugaḡaꞌe oꞌoꞌa. Hadi ubumaḡaꞌe ḡuriro badiꞌaḡa mazao kurauꞌeteꞌe vazeḡa.
Agaḡano Radoꞌi
6Vazeꞌa huga oꞌoꞌa ḡoeꞌa hina zae soꞌozeꞌeteꞌe gararoꞌi. Mazaḡa eꞌe uꞌano, Badiꞌa zama ḡugiḡaniꞌa ani mene egohauꞌeteꞌe azaḡa mazao fureruꞌohe.7Eꞌanoꞌo ꞌuguḡa haḡaiḡa haḡaeꞌeteꞌe azaḡa teite tiburanadu haḡai sauꞌa ago haḡaoꞌi.8Mazaḡa zaꞌe ibite uzabo zamaḡano radiunu, rehano izidiꞌe Zuhiꞌa Boro teite tiburanadu agaḡa zamaḡano radiuꞌohe. Eꞌanoꞌo zaꞌe agaḡa ubugaubuga teige radoꞌi.9Agaḡa hugaꞌe haḡai manoḡano, haḡai duduḡano zu hugano haḡaeꞌeteꞌe haḡaiḡa niduꞌa zamaḡano fureruꞌohe.10Zaꞌe Zuhiꞌa Boroꞌa matuꞌiteꞌe haḡaiḡa faine ederoꞌi.11Uzabo zamaḡano huga oꞌoꞌa haḡaiḡa haḡaeꞌeteꞌe azaḡa gauze teite ago ꞌauḡoꞌi, rehano haḡaize veꞌoḡaꞌe rae furenoꞌi.12Emeꞌe ze nagini sifu haḡaeꞌeteꞌe haḡaiḡa moneo rouga zuni mazagarofeꞌohe.13Rehano agaḡaniꞌa aganadu ḡau niduꞌa furenine, eꞌe huga horoneꞌohe.14Mazaḡa agaḡaniꞌa ḡau huga niduꞌa fureneꞌohe. Eꞌanoꞌo eme ꞌahige raꞌohe,“Bazeꞌeteꞌe vazeḡa, evatoꞌi,ebu rune azaḡa boꞌaḡano iḡunoꞌi,ꞌougine, Keriso agaḡaniꞌa ḡae rana agaraꞌuma.”15Eꞌanoꞌo zaꞌe nougenouge raditeꞌe moneo faifaine ḡianoꞌi. Vaze kauriḡa teige ago radoꞌi, rehano vaze huhuzaḡa teige radoꞌi.16Haḡai manoḡa haḡaiteꞌe madaḡa niduꞌa ago mode tauḡoꞌi, mazaḡa izidi madaḡaꞌe sauꞌaniꞌa ufeta fureruꞌohe.17Eꞌanoꞌo kauriḡa vazeḡano ago roꞌi, rehano Zuhiꞌa Boroꞌa zae mazaonoꞌo nagini urateꞌetaꞌaꞌe ederoꞌi.18Vaini vuḡa ago ufeta gagoꞌi. Ufeta gagine, ḡaboneze sausaune huniꞌuma. Rehano Vine Zaḡoḡaꞌe zae zamao iriꞌavifine umidoꞌi.19Salamo zu Badiꞌa niguneꞌeteꞌe badaḡa zu vine mone badaḡa hina ḡoretitoꞌi, ebu zamaze niduꞌa hina bada maꞌenaꞌa Zuhiꞌa Boro nigunoꞌi.20Ḡau niduꞌa moneo iḡaiḡa emeḡe Zuhiꞌa Boro Iesu Keriso niḡano Badiꞌa emeḡe Mama mazao manoḡa tauḡi roꞌi.Ize zu Inudeze
21Zaꞌe Keriso gubaneꞌenaꞌa egohauꞌe ꞌahine, nabudizeta zuni egotitoꞌi.22Hahu roḡaeḡaroḡaeḡa, zaꞌa Zuhiꞌa Boro ḡoere egohauꞌeteꞌe teige, ize ḡoere egozenoꞌi.23Mazaḡa Kerisoꞌa ekalesia vadiga raꞌeteꞌe teige, izeꞌe inudeze vadiga raꞌohe. Ekalesiaꞌe Keriso ahiri ebu Kerisoꞌe ekalesia ḡaboziroteꞌe vazeḡa.24Eꞌanoꞌo ekalesiaꞌa Keriso ḡoere egohauꞌeteꞌe teige, inudezeꞌe ḡau niduꞌa moneo ize ḡoere egozini huniꞌuma.25Hahu ohozeḡaohozeḡa, Kerisoꞌa ekalesia zamaradu ekalesia veize ḡaboneḡa ahetiroteꞌe teige, inudeze zamare borofoꞌi.26Kerisoꞌa ḡaboneḡa ahetirotaꞌaꞌe ekalesia dehezadu ze mae zaḡozaḡifine raꞌohe. Aꞌe vu hina vuzuꞌeteꞌe heuḡa, ebu Kerisoꞌa ane ḡoere hina ze deheziro.27Aneꞌa torare ga sauꞌa ga veꞌoḡani ꞌahoga oꞌoꞌa rae raꞌeteꞌe ekalesiaḡa manoḡa tauḡi ane zamao mae ohonifine, ḡaboneḡa ahetiro. ꞌOugadu ekalesiaꞌe Badiꞌa ubumao zaḡoḡa zu veꞌoḡa oꞌoꞌa rouga uratiro.28Kerisoꞌa ekalesia zamaradu zeḡe veize ḡaboneḡa ahetiroteꞌe teige, hahu ohozeꞌe ahirize zamare borofeꞌeteꞌe teige inudeze zamare borofiꞌuma. Inuga zamare borofeꞌeteꞌe ohozeḡaꞌe ane bare zamare borofeꞌeteꞌe heuḡa.29Iniu aneꞌa bare ahiꞌa heꞌeheꞌeneꞌeteꞌe vazeḡaꞌe oꞌoꞌa. Vaze niduꞌa ahirize ḡubuneꞌohe zu taufeꞌohe. Aꞌe Kerisoꞌa ekalesia veize ꞌouge haḡaeꞌeteꞌe teigeꞌohe,30mazaḡa emeꞌe Keriso ahiri iꞌaḡaiꞌaḡa.31Buka Zaḡoḡano ꞌahige raꞌohe, “Eꞌanoꞌo ohozeꞌe viꞌa moga modadu inuga teite tiburaꞌuma ebu anianineꞌe ahiri tiba reꞌuma.”32Uꞌuru tiroteꞌe ḡoeꞌa eꞌe hugaꞌe ufeta boro ꞌahine, ederogaꞌe riḡa. Rehano e Keriso zu ekalesia moneo eꞌe ḡoeꞌa ziꞌohe.33Rehano hahu ohozeḡaohozeḡa, zae tibatibaꞌe zae bare zamare borofeꞌeteꞌe teige, inudeze zamare borofoꞌi, ebu inudeze zuni ize gubazoꞌi.