1Kon ineem weɗ tah, mi yi taƴu ŋ kaso sagu Heɗi, mi yii ñaah ɗu keeh-keeh, ne ɗu pes pes huniɗ na ɓeeɗki ɗu ɓeeɗku,2ɗu gen eɗfiɗ, ɗu nik ɓo' soosiɗ, ɗu min muñ ɗu seke, yaa nu nga ɗu ɗah teyɗukaat morom ce ŋ waaɗoh.3Te ɗu ndengɗuk ɗu amb baahiɗ niki ɗu nik yino, wi Fuuɗsi Hoolohngaani eɗ ɗu, taamboh ŋ jami ambsoh ɗu.4A faan yino dong raak, wa nikka kosiɗ ci, a Fuuɗis yino dong raak ; wa yaakaar yino dong nam raak, te yaakaareem, Kooh ɓeeɗuk ɗu ne ɗu rahasa.5A Heɗ yino dong raak na kos yino na ɓoktuk yino.6A Kooh yino dong nam raak, Baabiŋ ɓooɓi jen, yi na nguurke ŋ ɓooɓi jen, a yi na pangke taamboh ŋ ɓooɓi jen te a yi nik ŋ ɓooɓi jen.7Waaye yaa nu nga ɓoo ɗah, na onohi Kooh baahoh ɗe findi Kiristaani ɓeesɗoh ɗe wa.8Ineem weɗ Fiis ci woo an :« A rapiɗ ŋ ɗafka ɗafka,a ɓayndohha feruuɗ ci a deg yaahte raakka in ci a on ɓo' ci. »9"A rapiɗ" wa tokis ye ? Wa joy tokis ne a ruhseen po ŋ kehƴi haa e ?10Yi ruhus, a yi nam rap ŋ ɗafuk Eel ci jen, ne a riif adinaani jen.11Ŋ ineem, a onnda ɓum, ɓa nikka Apootar, ɓum, a onnda ɓa ne Kooh woyee taamboh nga ɓa, ɓum, a onnda ɓa ne ɓa yegɗohee Yegɗohiŋ Muci, ɓum, a onnda ɓa ne ɓa niiɗee ɓooɓiŋ Janguuni, ɓum, a onnda ɓa ne ɓa min jangɗoh.12A oniɗ ɓooɓeem ne ɓa ɓaatɗoh ɓooɓiŋ Kooh po ɓeem min pangkiɗ Kooh baahiɗ, ne faaniŋ Kiristaani min kaɗ fiki.13Ŋ ineem, ɓoo jen ɓoo hey kaɗe po ɓoo nik yino, ɓoo ɓaah kos te ɓoo ɓaah inah Kuɓkiŋ Kooh, ɓoo hey kaɗe po ɓoo nik yakak jameet, ɓoo hend na Kiristaani ŋ miti a mit.14Ɓoo nikissanɗi komaaki, ɓoo ñaañohsee na jangɗoh nu nik findi gaali ginaah ci na puuɗsi na giyaange ; ɓoo faɗanɗi ɓooɓi ɓa taambohee ŋ herñiŋ ɓa, ɓa nookee ɓoo ŋ ini nikɗi keeh.15Ɓoo pesohee keeh te wa hun na waaɗoh ɗah, ɓoo hey hooɗe ŋ in ci jen, kaɗee ŋ Kiristaani, yi hafi.16Te wa taamboh nga ɗe, faani jen findi wa hend, hunnda ambsukohha. Pok ciŋ wa jen ceɗ ɓekɗukoh, tummbaa faan yino, te cir nu nik na tume pangkiŋ wa, faani hooɗe, kaɗee fiki taamboh ŋ waaɗoh.
Kipes as ŋ Kiristaani
17Inii weɗ mi na woyee ɗu, mi yii deng ɗu wa ŋ tiikiŋ Heɗi, weɗ ne : Ɗu joyisɗi pes findi kosaaɗiici, ɓa na ñaakɗe liiɓ ci raakɗi haf, raakɗi kose.18Ɓa ñaañ ñaañ ñuusiɗ te ɓa raakɗi ali ɓak ŋ kipes ki Kooh na onohe, sagu inhaaɗiiki nik nga ɓa te wa puloh ŋ ndengi keeñ ciŋ ɓa ndeng.19Ɓa waaskiɗ kaci, ɓa ɓekiɗ haf ɓa ŋ cakaay ne ɓa tumee in hoolaaɗi nu nik po ɓa uupiɗ nga.20Waaye ɗu, ineem weɗ ɗu jang ŋ ini kaɗ ŋ Kiristaani haa !21Ŋ inhiɗ ne ɗu kerhiɗ tiikiŋ ɗe, te ɗu jangɗuuɗ keeh ki nik nga ɗe.22Mbaa, ŋ ini kaɗ ŋ mandohaaɗiŋ ɗu ɗeɓgaan, saɓsukohaat na kiɓo' kiŋ ɗu maañiɗa, wa na taambɗe kiñin kiŋ wa, wa ñaañohee ɗa po wa ɓek ɗa ŋ sooƴ.23Faɗaat Fuuɗsi Hoolohngaani a tum ɗu ɓo' as ŋ liiɓohaaɗ ciŋ ɗu.24Te ɗu ɓekuk kiɓo' as, wi feru ŋ findi Kooh waaɗoh taamboh ŋ hool wuu Kooh na yurah, ci puloh ŋ keeh.25Saɓsukohaat na lee, te yaa nu nga ɗah woyee morom ce keeh ; laam, ɓoo jen ɓoo cir, te ɓoo nikka faan yino.26Ɗu ayruk ɗah, kinaat bakaaɗ ; nohi kinaat muyoh ayrukiŋ ɗu ;27kinaat on Seytaani waas.28Yi nikee rokoh, kinaat rokis ; a ɗaɓañɗukaat ŋ panguk panguk yurhiɗ na yaah ciŋ ɗe, ne a min raak ini a onan yi raakɗi.29Ali woo moɗaaɗi kinaat puloh ŋ nguɓ ciŋ ɗu, waaye ɓo' raak woyaah moɗiɗ ɗah, a woyaat woo ki ɓaatɗohan ɓooɓi ne ɓa kaɗ fiki ŋ in ci ɓa etoh, ne wa baahoh ɓi na sikɗukee ɗe.30Kinaat ɓek Fuuɗsi Hoolohngaaniŋ Kooh tiis, Fuuɗsi fu inah ne a yi Kooh eɗ ɗu ne a nik ñaasi teeɓoh ne ɗu wuu ce. Ñaaseem weɗ na name teeɓoh ne mbehi Kooh saɓsohan ɗu jameet na baahaaɗi, wa hey haye.31Kinaat ɗaak aay-keeñ, kinaat nik ɓo' neɓaaɗi'iɗ, usaat ayruk na ɗuuɗ na ɓasoh, na añaand nu nik.32Baahaat ŋ harmban ɗu, ɗu keeñtiɗkohe ; ɗaastiɗohaat findi Kooh ɗaasoh ɗu ŋ niki ɗu nik ŋ Kiristaani.