1Ineem weɗ tah, mi Pool, mi yi ambu ŋ kaso sagu pangki ŋ pangkiɗ Kiristaani Yeesu wuu ɗu ɓi nikɗi Yawuut...2A', ɗu kerhiɗ pangki Kooh deg go de' ! Pangki a deg go wuu ɗu, ŋ baahohiŋ ɗe.3Kooh ŋ haf ce, a inhiɗiɗ to ini ɗasɗukiɗi a tufuk tum maañiɗ, te ŋ fiissa ɗu wa ŋ rohƴiɗ.4Ɗu janga ɗah, ɗu hey hote inhi ŋ inah ini ɗasɗukiɗeem, ŋ ini kaɗ ŋ Kiristaani.5Kooh teeɓɗi ɓooɓi ɗeɓgaan wa findi a teeɓoha woti-woti Apootar ci na woosuuɗ ci a hooliɗ wuu ce, taamboh ŋ Fuuɗsi Hoolohngaani.6Ini ɗasɗukiɗeem weɗ ne, ŋ niki ɓa nik ŋ Kiristaani Yeesu, taamboh ŋ Yegɗohiŋ Muci, ɓi nikɗi Yawuut ɓaah lamaahi na Yawuut ci, ɓa ɓaah ŋ faaniŋ Kiristaani, maanaam Janguuni te ɓa namiɗ raak ɓak ŋ gapohi.7Yegɗoheem weɗ mi na pangkiɗe kotii ; weɗ ini Kooh baahoh ho, a tummbaa na hatiliŋ ɗe.8A ñam uup ƴissuut ŋ ɓo'-Kooh ci jen, moona Kooh baahohiɗ to ne ŋ yegiɗ ɓi nikɗi Yawuut in ci baahiɗ ciŋ Kiristaani ɓo' minɗi kind.9Kooh namiɗ to baahoh ne ŋ ñiiniɗ wuu ɓooɓi [jen], findi a na tiindɗohe ini a tufuk tum. Kooh yi fer in ci jen, a yi ɗasɗee ineem ŋ ɗooƴ ce ŋ jamanooci coot jen.10In ceem ñiinɗuuɗ kotii ne, heɗ hatil ci nik ŋ ɗafki, ci raak kikilifa na min-min, inah findi liiɓohaaɗiŋ Kooh moɗoh ŋ ɓak ciŋ wa jen taamboh ŋ Janguuni.11Ineem jen hun na ini Kooh tufkiɗee bala jamanooci coot jen. A tufkeen ne a heya tume, te a tumiɗa kotii, taamboh ŋ Kiristaani Yeesu, Heɗ ɓoo.12Ŋ niki ɓoo nik nga ɗe, ɓoo oolkiɗ Kooh po ɓoo miniɗ ɗe reɓ supkaaɗi, taamboh ŋ kosi ɓoo kos Kiristaani.13Kon, kinaat faɗsuk, ali nik ne ŋ raakiɗ miskiɗ ŋ pangkiŋ ngo wuu ɗu sah, ambaat ne wa wuu yakɗiŋ ɗu.
Inah waaɗohiŋ Kiristaani
14Ineem weɗ tah, mi yii ƴekiɗ Baabi,15yi cuuɓ ciŋ Eel ci na kehƴi jen kooɗoh tiik ciŋ ca.16Mi yii kiim ɗe ne a on ɗu ŋ findi yakkiŋ ɗe hend, ɗu ndeng na hatil ŋ ɗooƴ ɗu, taamboh ŋ Fuuɗsiŋ ɗe.17Mi yii kiim ne Kiristaani gen ŋ keeñ ciŋ ɗu taamboh ŋ kos. Ɗu deƴuk te ɗu ndeng ŋ waaɗoh,18po ɗu ambsukoh na ɓo'-Kooh ci jen, ɗu min inah findi waaɗohiŋ Kiristaani angoh, wa hutta, wa ɗafukka te wa nooɗta.19Ee, ɗu min inah waaɗi a waaɗ ɓoo, ineem weɗ uup ki'inah nu nik, te ɗu hey riife jameet na Kooh haf ce.20Kooh, ŋ hatiliŋ ɗe, na pangke ŋ ɗooƴ ɓoo, te a miniɗ tum ini uup fuuf ini ɓoo na kiime wala liiɓe.21A yakɗaah ŋ Janguuni, a nam yakɗaah ŋ Kiristaani Yeesu ŋ gomal nu gomal, wa gen po faw ! Amiin !