Pol ei veimuade a malongolongona kubaana usino ne sou a abuna sea
1Eau e Pol eau ugu na luma na tunuui, vuna eau goligoli a pipigona mine Krais Iesu ane amutou a vanunua mina abuna sea.2Eau damu i amutou longesi maido, Salemo ei lilomuli eau mei vileale eau mina pipigona do, maido me ei goli a dinodo minei usino ne amutou tamai.3Inade Salemo ei goli iedo, lisa ei ino ovu, moni Salemo oto i mapale usinani minau, tomane eau mapamuli sapesi.4Na ilala amutou gi a inade ie, ede amutou muada i maido, eau muada kuba sele a inade ovu mine Krais.5Na malada taliuliu lisa, Salemo ei ma ademuada oto a inade ovu ie. Moni seidei na Maolona Nunu, Salemo ei ademuada ane amiteu a maolona aposel minei, me sou a profet minei.6Inade li ei maido, na malongolongona kubaana, amutou a vanunua na abuna sea, amutou palea a abuna tasa, ma vovo tasa pilu e amiteu. Me eitou vuso neitou guale pili a golugolu vuso Salemo i vileale le eitou lilo ne Krais Iesu.7Salemo ei dode eau me ei toe eau na palea a bibi na pipigona mina veimuadena malongolongona kubaana ie. Me ei bilii e eau a sagagalina mina toesagaline eau a gunolina pipigona ie.8Eau matano oto ana vanunua ma tavivine vuso mine Salemo, moni ei dode eau, me ei bilii e eau a pipigona mina veimuadena malongolongona kubaana ane a abuna sea. Na malongolongona kubaana iedo, ei ade a golu doana vuso mine Krais, ede eitou ma mapigogoi ete sele neitou vivileale me neitou gi.9Salemo ei mapale a golugolu vuso, moni ei tau oovi a damutatalana minei na malada vuso lisa. Moni seidei ei vileale eau mina ademuadana damutatalana ovu minei ieli usino na vanunua vuso.10Lisa ei tau oovi, moni seidei ei toe a viepiluna kinaka minei i palea, me na inigogona ieli, ei toe a matamatana damutatalana kubaana minei i palea muada mamau sele ane sou a bineanea sagali ma nunu mina langi, ne sou muada a damutatalana doana mine Salemo.11Lisasi Salemo ei damutale a gunolina golugolu odo, me seidei na pipigona mine Krais Iesu, Bibi Taula ne eitou, ei goliosi.12Me eitou silimuli sagali e Krais, maido me eitou ma lae oto. Vuna eitou muada kuba i maido, Krais ei a vea mine eitou, neitou asu sibitala ne Salemo.13Maido me eau vei le amutou seidei, amutou ma damutatala papaipai lou a davutina iedo eau tabule. Vuna, davutina minau ei buloi e amutou ne mu muina kuba pilu e Salemo.
Pol ei kaka mina buloine sou e Epesus
14Na vuna moni ieli, eau totopatulialale ei,15ei e Tamana abuna vuso, oata na langi ma magamaga, me ei oto i bilii a maulina ane abuna vuso iedo.16Eau kaka maido, na malasana golugolu papaina minei, Salemo Tamane eitou ei ni mavoni lilone amutou a Maolona Nunu, me ei ni toe amutou namutou magili sagali sele,17me na silimulina mine amutou, Krais ei ni malu na lilone amutou. Ma inigogona kinale sele ne sou sanii, ei ni palea sagali sele lilo na lilone amutou tomane a magamaga ei lapitole obi a aana obu me ei toe a obu ni magili sagali.18Maido me namutou guale a sagagalina, pilu a vanunua ma tavivine vuso mine Salemo, me ne amutou vuso muada kuba a kinalena mine Krais, ei balabala sele, mei lago mamau lou, mei oata oto sele, mei tano oto sele. E, a kinalena mine Krais ie, ei vululusi a muadana vuso, moni namutou muada sele e ei. Ma golugolu doana vuso ei vonu ne Salemo oto, ne sou vonu ne amutou tamai.20Sagalina mine Salemo oto ei pipigopigo lilo na lilone eitou, ma sagalina iedo ei vululusi sele a damutatalana mine eitou ma golugolu vuso eitou tagi e Salemo ni goli.21Maido me taliuliu taliuliu a viepiluna kinaka ei ni beilange a aisane Salemo lilo ne Krais Iesu i mapigogoi a malada vuso mulimuli. Moliana.