1ፆሳ ሸነን ክርስቶስ የሱሳ ሀዋረ ግድዳ ጳዉሎሳፐ፥ ኤፈሶናን ደእያ ጌሻታስነ ክርስቶስ የሱሳ አማነይሳታስ ፃፈትዳ ኪታ።2ፆሳ ኑ አዋፐነ ጎዳ የሱስ ክርስቶሳፐ አ ኬሀተይነ ሳሮተይ ህንተዉ ግዶ።
ክርስቶሳን ደእያ አያና አንጁዋ
3ሳሎን ደእያ አያና አንጆ ኡባን ክርስቶሳ ባጋራ ኑና አንጅዳ፥ ኑ ጎዳ የሱስ ክርስቶሳ አዋይ፥ ፆሳይ ጋላተቶ።4ኑኒ እያ ስንን ጌሻታነ ቦረይ ባይናይሳታ ግዳና መላ ፆሳይ አላመይ መታናፐ ካሰ ክርስቶሳ ባጋራ ባ ሲቁዋን ኑና ዶርስ።5ፆሳይ ባ ሸንያን ባ ዶስዳይሳዳ የሱስ ክርስቶሳ ባጋራ ኑና ባ ናይታ ኦናዉ ካሰትድ ቆፕ ዎስ።6ፆሳይ ባ ሲቅያ ናኣ ባጋራ ኑስ ጮ እምዳ አ ኬሀተይ ቦንቸታና መላ ሄሳ ኦስ።7ፆሳ አ ኬሀተ ዱረተዳ ክርስቶሳ ሱን ዎዘትድ ናጋራ አቶተ ደምዳ።8ባ አ ኬሀተ ጭንጫተንነ ኤራተን ኩንድ ኑስ እሚስ።9ፆሳይ ባ ዶስዳይሳዳ ክርስቶሳ ባጋራ እያ ሸንያ ፁራ ኑ ኤራና መላ ኦስ።10ዎደይ ጋክያ ዎደ ፆሳይ ፖላናዉ ቆፕዳ ቆፋይ፥ ሳሎንነ ሳአን ደእያ መተ ኡባይ ክርስቶሳፐ ጋርሳን ግዳና መላሳ።11ኡባባ ባ ሸንያዳ ኦያ ፆሳይ፥ ካሰትድ ሀልችዳይሳ ክርስቶሳ ባጋራ ኑኒ እያባ ግዳና መላ ኑና ዶርስ።12ሄሳ እ ኦዳይ፥ ክርስቶሳን ኡፋይስ ዎድ ናጎን ኮይሮ ግድዳ ኑኒ ፆሳ ቦንቹዋ ጋላታን ቆንጭሳና መላሳ።13ህንተካ ህንተ አቶተ ዎንገላ፥ ሄስካ ቱማ ቃላ ስእዳ ዎደ ክርስቶሳ አማንደታ። ፆሳይ ህንተዉ እማና ግዳ ጌሻ አያናን ህንተ አታመትደታ።14ፆሳ ቦንቾይ ጋላተታና መላ ፆሳይ ባ አሳ ዎዛና ጋካናዉ ጌሻ አያና ኑስ ኦይ ኦድ እሚስ።ጳዉሎሳ ዎሳ
15ሄሳ ግሾ፥ ጎዳ የሱሳ ህንተ አማነይሳነ ጌሻታ ኡባ ህንተ ሲቀይሳ ታ ስእዳ ዎደ16ታ ዎሳን ህንተና ቆፓሸ ህንተ ግሾ ፆሳ ጋላተይሳ አጋብከ።17ጎዳ የሱስ ክርስቶሳ ፆሳይ፥ ቦንቾ አዋይ፥ ፆሳ ህንተ አድ ኤራናዳ ጭንጫተነ ቆንጨ አያና ህንተዉ እማናዳ ታኒ ፆሳ ዎሳይስ።18ፆሳይ ህንተና ፄግዳ ኡፋይሳይነ ጌሻት ላትያ ቦንቾ ላታይ አይ መላ ዳሮኮ ህንተ ኤራና መላ ፆሳይ ህንተ ዎዛና አይፍያ ዶያና መላ ታኒ ፆሳ ዎሳይስ።19ቃስ እያ አማንያ ኑናን ኦያ እያ ዎልቃይ አይ መላ አዳ ግቴኮ ህንተ ኤራና መላ ዎሳይስ። ሄ ዎልቃይ ፆነቶናነ ዳቡሮና ዎልቃ። ሀ ኑናን ደእድ ኦያ ዎልቃይነ፥20ክርስቶሳ ሀይቆፐ ደንድ፥ ሳሎን ፆሳፈ ኡሻቻ ባጋራ ኡትስዳ ግታ ዎልቃይ እስኖ።21እያ ሱንይ፥ አይሰይሳታፐነ ማታ አዋታፐ፥ ሃረይሳታፐነ ጎዳታፐ፥ ቦላ ግድድ ሀ አላምያ ፃላላን ግዶናሽን፥ ስንፈ ያና አላምያንካ ሀራ ሱንታ ኡባፈ ቃ።22ፆሳይ ኡባ ክርስቶሳ ቶሆፐ ጋርሳን ሃርስስ፤ ቃስ ዎሳ ኬን፥ ኡባባን ጎዳ ግዳና መላ እያ ሹምስ።23ዎሳ ኬ ክርስቶሳ ኩመ ኦያ እያ አሳተ። መተይ ደእያ በሳ ኡባን ክርስቶስ ባ ሁጰን ኡባባ ኩንይሳ።