ጭንጫተ
1አልኦ ሽቶፈ ሎኦ ሱን አስ፤የለትያ ጋላሳፐ ሀይቆ ጋላስ ሎኦ።2አሳ ኡባ ዉርሰይ ሀይቆ ግድዳ ግሾ፥ግብራ ኬ በይሳፈ ዬሆ ኬ በይስ ሎኦ፤ደኦን ደእያ አስ ሄሳ ባ ዎዛናን ዎናዉ ኮሼስ።3አዛኖይ ሶምኦ ካሬኮካ፥ዎዛና ፖእስያ ግሾ ሚቻፈ አዛኖይ ሎኦ።4ጭንጫ አሳ ዎዛን ዬሆ ሶን ደኤስ፤ሽን ኤያ አሳ ዎዛን ኡፋይሳ ሶን ደኤስ።5ኤያታ የ ስአናፐጭንጫታ ሴራ ስስ ሎኦ።6ኤያ አሳ ሚች አጉንን ታማ የድንቀይሳ መላ፤ ሄስካ ሀዳ።7ገነ ኦሶይ ጭንጫ አስ ኤያ ከሴስ፤ዎፈ ኤኮይ ዎዛና ኢሴስ።8ዶመፈ ዉርሰ ሎኦ፤ኦቶሮፐ ዳንዳእ ሎኦ።9ኤያታ ሀንቆይ ኤንታ ክኦን ደእያ ግሾ፥ኔኒ ነ ሸምፑዋን ሀንቆስ ኤለሶፓ።10“ሀእ ዎድያፐ ካሰ ዎደይ አይስ ሎኦ ግድዴ?” ጋዳ ኦይቾፋ፤ሄሳ መላ ኦይሾይ ጭንጫ አስ ኦይችያ ኦይሾ ግደና።11ሀ ሳአን ደእያ አስ ኡባይ ጭንጫ ግዳናዉ ኮሼስ፤ጭንጫተ ደሞይ ላታፐ ሎኦ።12ሚሸይ አሰ ኢታፐ ካምድ አሸይሳዳ ጭንጫተካ አሼስ።ሽን ጭንጫተ ሚሸፐ አይ አሳ ደኦ ናጋናዉ ዳንዳእያ ግሾሳ።13አነ ፆሲ ኦዳባ አኬካ!ፆሲ ጌላይዳባ ኦን ሱርሳናዉ ዳንዳኢ?14ሳእ ጊግዳ ዎደ ኡፋይታ፤ መቶይ ጋክያ ዎደ አኬካ።ኡፋይስ ግድን መቶ ግድን ፆሲ የድያ ዎደን ዬስ።ሽን አዉስ ኮይሮትድ ያነኮ ኔኒ ኤራካ።15ሀ ሀዳ ግድዳ ታ ላይን ዳሮባ በአስ። ሄስካ፥ ጌላይ ባ ጌላተን አዱሳ ላይ ደእያ ዎደ ፅሎይ ቃን ላይን ሀይቄስ።16ሄሳ ግሾ፥ ኔኒ ኤለ ዮናዳ ዳሮ ፅሎ ዎይኮ ዳሮ ጭንጫ ግዶፓ።17ኔኒ ዎደይ ጋኮና ሀይቆናዳ አዳ ኢታ ግዶፓ፤ አዳ ኤያ ግዶፓ።18ሀ ኡባን ፆሰ ያያ፤ አስ መቶ ኡባ ፆኖን ከያናዉ ዳንዳእያ ግሾ ኔኒ ዳሮ ኢታ ዎይኮ ዳሮ ፅሎ ግዶናሽን ግዶ አስ ግዳ።19ጭንጫተ ጭንጫስ እምያ ዎልቃይ እስ ካታማ ሃርያ ታሙ አሳታ ዎልቃፈ አስ።20ፅሎባ ፃላላ ኦድ ናጋራ ኦና ደእያ አስ ሀ ሳኣ ቦላ ባዋ።21አስ ሃሳያ ቃላ ኡባ ስአዳ ፖላና ጎፓ፤ ኔኒ ኡባ ስአና ጊኮ ነ አይለይ ነና ባድሽን ስአና።22ቃስ ኔኒ ነ ሁጰን ሀራታ ባድያባ ነ ዎዛናይ ኤሬስ።23ሄሳ ኡባ ታኒ ጭንጫተን ፕልጋዳ በአስ። ያታዳ፥ “ታኒ ጭንጫ ግዳና” ያጋስ። ሽን ታኒ ግዳይሳዳ ሀንቤና።24ጭንጫተ ኡባ ዎደ ሃሆን ደእያባነ ጪሞባ፤ ያትን፥ እያ ኮይድ ደማናዉ ዳንዳኤይ ኦኔ?25ታኒ ፕልጋዳ ፄላናዉ ጭንጫተነ ኦዳ ኡባ ዉርሰ ኤራናዉ ቆፓስ። ናጋር ኤያተ፥ ኤያተ ጎሻተ ግደይሳ ኤራናዉ ጋካስ።26ታኒ ሀይቆፐ አድ ጫምያ ሀራባ ደማስ። ሄስካ፥ እ ዎዛናይ ግተ፥ እ ኩሸይ ሳንላታ ግድድ ፅሄዳ ኦይክያ እስ ማጫስ በአስ። ፆሰ ያይያ አስ ኢፐ ከስ ኤካና፤ ሽን ናጋራንቹዋ እያ ባ ፅህያን ፃፃዳ ኦይካና።27አስታማረይ ሀይሳዳ ያግስ፤ “ታኒ ፕልጋዳ ደምዳባይ ሀይሳ።28ሄስካ፥ ታኒ ሀች ጋካናዉ ኮያዳ ደማቦናባ። ሙኩሉ አደ አሳ ግዶፈ ቦንቾይ በሲያ እስ አደ ፃላላ ደማስ፤ ሽን ማጫ አሳ ግዶፈ እስኖካ ደማናዉ ዳንዳአብከ።29ታኒ ፕልጋዳ ደምዳ ሀራባይ፥ ፆሲ አሰ ሱረ ቆፋራ መስ፤ ሽን አስ ዳሮ ገነ ኦገ ኮይድ ብስ” ያግስ።