Memɨyuhiwerie memɨyutemamawie
1Merikɨte neniune'ɨwiyata 'ikɨ tukaritsie waɨkawa kememɨte'uka'eniwakai. Nekaniwaruxeiya 'axamemute'anuyehu me'utitsuaname, xewitɨ pumawekai mɨwanɨtɨanikɨ, tɨrɨkariya memexeiya mekaniwa'uximatɨakaitɨni, pumawekai kemɨ'ane muwanɨtɨani.2Mɨpaɨ nepɨtiunehɨawixɨ. Matsi waɨkawa mepuyutemamawie kemɨ'ane memukwiri, keyuri memayeneniere,3matsi mekaniyutemamawieka kemɨ'ane memɨkatinunuiwawe 'akuxi, 'atsimemɨkatematekɨ ketita 'axamɨti'ane 'ena kwiepa.4Meta nekaniuniere 'aixɨa 'aneme yu'uximayatsikakɨ yutukaritsie mekaniwaranutanieritɨwani 'axamemɨtewakɨhɨawe. Mɨkɨta yaxeikɨa tixaɨtɨ pɨkarayani, 'eka pemuweiyani hepaɨ kani'aneni.5'Atsimɨkatimate yutapa kanawieka,ya'anetɨ haakakɨ kwikaniyɨaneni.6Matsi 'aixɨa pɨ'ane kayuwatɨ mɨti'uximayaka 'etsiwa mɨrexeiyanikɨ,keyuri waɨkawa tikumaɨwatɨ waɨkawa mɨrexeiyanikɨxɨka waɨkawa tikumaɨwani tixaɨtɨ pɨkarayeika,'eka muweiyani hepaɨ xeikɨa pɨ'ane.Teyuxewitɨ matsi tekanitɨrɨkaɨyeni
7Xaɨtsie tawari tixaɨtɨ mɨkatihɨkɨtsie nekanine'ɨwiya 'ena kwiepa:8tewi xeime nekaniuxeiya yuxaɨtame 'uyeikame, tɨɨri kawarexeiyame meta yu'iwama, peru pɨkatihayewakai waɨkawamekɨ yu'iyaritɨatɨ yu'uximayatsikakɨ, hatsuaku mɨpaɨ pɨkatiuyuhɨawixɨ waɨkawa kemɨrexeiyakaikɨ «¿Kamɨtsɨ kemɨ'ane rahetsiemieme ne waɨkawa nepɨti'uximaya, 'aixɨa nemɨtiyurienenikɨ nekayuwaɨriyatɨ?» mɨpaɨ katiniuyuhɨawe. Mɨkɨta tixaɨtɨ pɨkatihɨkɨ kenemɨtiune'uxitɨa waɨkawa.9'Aixɨa matsi kani'aneni yuhutatɨ keyuri yuxewitɨ,mɨkɨ matsi waɨkawa mekanitatseirikuni kememɨteyu'uxitɨa.10Xɨka xewitɨ 'atiweni, xewitɨ kanenukuhanimɨkɨ.Matsi xɨa'ui kemɨ'ane matiweni,mɨkaheixeiya kemɨ'ane menukuhana.11Yuhutatɨ xɨka me'uheni,mekaniyuxɨriyani,matsi yuxaɨta ¿kehepaɨ tiyutaxɨriya?12Yuxaɨtame kana'iwariemɨkɨ,matsi yuhutatɨ mekaniyuparewieka.Kaunari xɨka haikaniyapauka pɨka'anutekieni.Pemɨtemaikɨ ketinemaiweni
13'Aixɨa matsi kani'aneni temaikɨ tixaɨtɨ karexeiyatɨ peru xɨka timaiweni,keyuri ti'aitame meripai mieme 'atsimɨkatimate,kayɨ'ɨxatsitɨarinɨatɨ.14Tsepanetɨ 'anutahɨiyame wayeyame 'uwenitsie maya, yatɨni tixaɨtɨ karexeiyatɨ 'utinuiwame ti'aitame mayanikɨ,15ne mɨpaɨ nepɨtimate matsi 'ikɨ temaikɨ waɨkawa teɨteri mekaniparewieka, manukakenikɨ ti'aitametɨtɨ.16Peru tsepanetɨ teɨteri memɨkayu'inɨatsinɨa te'aitamete memɨwaruweiya, yumɨiretɨta 'arike memɨ'axe, mekayutemamawietɨ mekaniyuhayewani hetsienamieme. Mɨkɨta yaxeikɨa tixaɨtɨ pɨkatihɨkɨ, 'eka manuku'axe hepaɨ pɨ'ane.