ⴰⵎⴱⴰⵔⵔⴻⵃ1rif_tti
ⴰⵇⴰ ⴽⵓⵍⵛⵉ ⴷⵉ ⵍⴱⴰⵟⴻⵍ
1ⴰⵡⴰⵍⴻⵏ ⵏ ⵓⵎⴱⴰⵔⵔⴻⵃ, ⵎⵎⵉⵙ ⵏ ⴷⴰⵡⵓⴷ, ⴰⵊⴻⴵⵉⴷ ⴷⵉ ⵓⵔⵛⴰⵍⵉⵎ.2ⴷ ⵉⴱⴻⵟⵟⴰⵍⴻⵏ ⵇⴰⵄ, ⵉⵇⵇⴰⵔ ⵓⵎⴱⴰⵔⵔⴻⵃ, ⴷ ⵉⴱⴻⵟⵟⴰⵍⴻⵏ ⵇⴰⵄ, ⴰⵇⴰ ⴽⵓⵍⵛⵉ ⴷⵉ ⵍⴱⴰⵟⴻⵍ.3ⵎⴰⵏ ⵍⴻⴼⴹⴻⵍ ⵉ ⵉⴵⴰⵏ ⵖⴰⵔ ⴱⵏⴰⴷⴻⵎ ⴷⵉ ⵎⴰⵔⵔⴰ ⴰⵔⴱⴻⵔ ⵉ ⵣⵉ ⵉⵜⵜⵎⴰⵔⵔⴻⵜ ⵙⴰⴷⵓ ⵜⴼⵓⵛⵜ?4ⵊⵊⵉⵍ ⵉⴳⴳⵓⵔ, ⵉⵊⵊ ⵏ ⵊⵊⵉⵍ ⵏⵏⴻⵖⵏⵉ ⵉⵜⵜⴰⵙ-ⴷⴷ, ⵎⴰⵛⴰ ⵜⴰⵎⵎⵓⵔⵜ ⴰⴷ ⵜⴻⵇⵇⵉⵎ ⵜⴱⴻⴷⴷ ⵉ ⵍⴻⴱⴷⴰ.5ⵜⵏⴻⵇⵇⴰⵔ-ⴷⴷ ⵜⴼⵓⵛⵜ ⵓ ⵜⵖⴻⴵⵉ ⵜⴼⵓⵛⵜ ⵄⴰⵡⴻⴷ, ⵅⴻⵏⵏⵉ ⴰⴷ ⴷⴷ-ⵜⴻⴷⵡⴻⵍ ⴷⴻⵖⵢⴰ ⵖⴰⵔ ⵎⴰⵏⵉⵙ ⵉ ⴷⴷ-ⵜⵏⴻⵇⵇⴰⵔ.6ⵉⴳⴳⵓⵔ ⵓⵙⴻⵎⵎⵉⴹ ⵖⴰⵔ ⵍⵊⴰⵏⵓⴱ ⵓ ⵉⵜⵜⴻⵏⵏⴻⴹ ⵄⴰⵡⴻⴷ ⵖⴰⵔ ⵛⵛⴰⵎⴰⵍ. ⴰⵎ ⵉⴳⴳⵓⵔ ⵉⵜⵜⴻⵏⵏⴻⴹ, ⵉⵜⵜⴻⵏⵏⴻⴹ ⵓⵙⴻⵎⵎⵉⴹ, ⵓⵛⴰ ⵉⵜⵜⵖⵉⵎⴰ ⵓⵙⴻⵎⵎⵉⴹ ⵉⴷⴷⴰⴽⴽⵡⴰⵍ-ⴷⴷ ⵖⴰⵔ ⵓⴷⵓⵡⵡⴰⵔ ⵏⵏⴻⵙ.7ⵎⴰⵔⵔⴰ ⵉⵖⴻⵣⵔⴰⵏ ⵜⵜⴽⴻⴱⴱⴰⵏ ⴷⵉ ⵍⴻⴱⵃⴰⵔ, ⵎⴰⵛⴰ ⵡⴰⵔ ⵉⵜⵜⵛⵛⵓⵔⵉ ⵍⴻⴱⵃⴰⵔ. ⵖⴰⵔ ⵎⴰⵏⵉⵙ ⴷⴷ-ⵜⵜⴰⵣⵣⵍⴻⵏ ⵉⵖⴻⵣⵔⴰⵏ, ⴷⵉⵏⵏⵉ ⵜⵜⵖⵉⵎⴻⵏ ⵜⵜⴰⵣⵣⵍⴻⵏ ⵄⴰⵡⴻⴷ.8ⵎⴰⵔⵔⴰ ⵜⵉⵎⴻⵙⵍⴰⵢⵉⵏ ⵙⵙⴰⵃⴰⵍⴻⵏⵜ ⴱⵍⴰ ⵇⴻⵟⵟⵓ, ⵓⵍⴰ ⴷ ⵉⵊⵊⴻⵏ ⵡⴰⵔ ⵉⵣⴻⵎⵎⴰⵔ ⴰⴷ ⵅⴰⵙ ⵢⵉⵏⵉ ⵛⴰ. ⵄⴻⵎⵎⴰⵔⵚ ⵜⵉⵟⵟ ⴰⴷ ⵜⴻⵊⵊⴰⵡⴻⵏ ⵣⴻⴳ ⵡⴻⵥⵔⵉ ⵓⵛⴰ ⴰⵎⴻⵣⵣⵓⵖ ⵄⴻⵎⵎⴰⵔⵚ ⴰⴷ ⵉⵊⵊⴰⵡⴻⵏ ⵣⴻⴳ ⵓⵜⴻⵙⵍⵉ.9ⵎⵉⵏ ⵜⵓⵖⴰ ⵉⴵⴰⵏ ⴰⴷ ⵢⵉⵍⵉ, ⵎⵉⵏ ⵉⵜⵜⵡⴰⴳⴳⴻⵏ ⴰⴷ ⵉⵜⵜⵡⴰⴳⴳ ⵄⴰⵡⴻⴷ. ⵡⴰⵔ ⴷⵉⵏ ⵉⴵⵉ ⵊⴷⵉⴷ ⵙⴰⴷⵓ ⵜⴼⵓⵛⵜ.10ⵎⴰ ⴰⵇⴰ ⴷⵉⵏ ⵛⴰ ⵏ ⵍⵃⴰⵊⵊⴻⵜ ⵇⵇⴰⵔⴻⵏ ⵅⴰⵙ: “ⵅⵣⴰⵔ, ⵎⴰⵏ ⴰⵢⴰ ⴷ ⵊⴷⵉⴷ!”?, ⴰⵇⴰ-ⵜⵜ ⴷⵉⵏ ⴷⵉ ⵣⵣⵎⴰⵏⴰⵜ ⵏⵏⵉ ⵜⵓⵖⴰ ⵉⴵⴰⵏ ⵇⴱⴻⵍ ⵉ ⵏⴻⵛⵛⵉⵏ.11ⵡⴰⵔ ⴷⵉⵏ ⴵⵉⵏ ⴷ ⵉⵅⴰⵔⵔⵉⵚⴻⵏ ⵅ ⵢⵉⵏⵏⵉ ⵜⵓⵖⴰ ⴷ ⵉⵎⴻⵣⵡⵓⵔⴰ, ⵓⵛⴰ ⵓⵍⴰ ⵅ ⵢⵉⵏⵏⵉ ⵉ ⵖⴰ ⵢⵉⵍⵉⵏ ⴷ ⵉⵏⴻⴳⴳⵓⵔⴰ, ⵡⴰⵔ ⵅⴰⵙⴻⵏ ⵜⵜⵉⵍⵉⵏ ⵉⵅⴰⵔⵔⵉⵚⴻⵏ ⵖⴰⵔ ⵢⵉⵏⵏⵉ ⴷⴷ ⵖⴰ ⵢⴰⵙⴻⵏ ⴰⵡⴰⵔⵏⵉ ⴰⵙⴻⵏ ⵄⴰⴷ.ⵜⴰⵔⴻⵣⵣⵓⵜ ⵏ ⵓⵎⴱⴰⵔⵔⴻⵃ12ⵏⴻⵛⵛ, ⴰⵎⴱⴰⵔⵔⴻⵃ, ⵜⵓⵖⴰ ⴰⵢⵉ ⴷ ⴰⵊⴻⴵⵉⴷ ⵅ ⵉⵙⵔⴰⵉⵍ, ⴷⵉ ⵓⵔⵛⴰⵍⵉⵎ.13ⵏⴻⵛⵛ ⵜⵓⵖⴰ ⴽⴽⵙⴻⵖ ⴷⴻⴳ ⵡⵓⵍ ⵉⵏⵓ ⴰⴷ ⴰⵔⵣⵓⵖ ⵓ ⴰⴷ ⴱⴻⵇⵇⵛⴻⵖ ⵙ ⵜⵉⵖⵉⵜ ⴷⵉ ⵎⴰⵔⵔⴰ ⵎⵉⵏ ⵉⵎⵙⴰⵔⴻⵏ ⵙⴰⴷⵓ ⵓⵊⴻⵏⵏⴰ. ⵎⴰⵏ ⴰⵢⴰ ⴷ ⵉⵊⵊ ⵏ ⵛⵛⵖⴻⵍ ⵉⵡⵄⴰⵔ, ⵉⵡⵛⴰ ⵉ-ⵜ ⴰⵔⴻⴱⴱⵉ ⵉ ⵜⴰⵔⵡⴰ ⵏ ⴱⵏⴰⴷⴻⵎ ⵃⵉⵎⴰ ⴰⴷ ⴷⴰⵢⴻⵙ ⵍⵀⴰⵏ.14ⵏⴻⵛⵛ ⵥⵔⵉⵖ ⵎⴰⵔⵔⴰ ⵜⵉⵎⴻⴳⴳⴰ ⵉ ⵉⵜⵜⵡⴰⴳⴳⴻⵏ ⵙⴰⴷⵓ ⵜⴼⵓⵛⵜ, ⵓ ⵅⵣⴰⵔ, ⵎⴰⵔⵔⴰ ⴰⵢⴰ ⵜⵓⵖⴰ-ⵜ ⴷⵉ ⵍⴱⴰⵟⴻⵍ ⴷ ⵡⴻⴹⴼⴰⵔ ⵏ ⵓⵙⴻⵎⵎⵉⴹ.15ⵎⵉⵏ ⵉⴼⴰⵔⵖⴻⵏ ⵡⴰⵔ ⵉⵣⴻⵎⵎⴰⵔ ⴰⴷ ⵉⵜⵜⵡⴰⵙⴻⴳⴳⴻⵎ, ⵓ ⵎⵉⵏ ⵉⵜⵜⵅⴻⵚⵚⴰⵏ ⵡⴰⵔ ⵉⵣⴻⵎⵎⴰⵔ ⴰⴷ ⵉⵜⵜⵡⴰⵃⵙⴻⴱ.16ⵏⴻⵛⵛ ⵏⵏⵉⵖ ⴷⴻⴳ ⵡⵓⵍ ⵉⵏⵓ: “ⵅⵣⴰⵔ, ⵏⴻⵛⵛ ⵙⵙⴻⵎⵖⴰⵔⴻⵖ ⵜⵉⵖⵉⵜ ⵉⵏⵓ ⵓⵛⴰ ⴰⵔⵏⵉⵖ ⴷⴰⵢⴻⵙ, ⵎⴰⵀⵓ ⵎⴰⵔⵔⴰ ⵉⵏⵏⵉ ⵜⵓⵖⴰ ⵉⵣⴻⴷⴷⵖⴻⵏ ⴷⵉ ⵓⵔⵛⴰⵍⵉⵎ ⵇⴱⴻⵍ ⵉⵏⵓ. ⵓⵍ ⵉⵏⵓ ⵉⵥⵔⴰ ⴰⵟⵟⴰⵙ ⵏ ⵜⵉⵖⵉⵜ ⴷ ⵜⵓⵙⵙⵏⴰ.17ⵏⴻⵛⵛ ⴳⴳⵉⵖ ⵓⵍ ⵉⵏⵓ, ⵎⴰⵃⴻⵏⴷ ⴰⴷ ⴷⴷ-ⴰⵡⵢⴻⵖ ⵜⵉⵖⵉⵜ, ⵎⴰⵃⴻⵏⴷ ⴰⴷ ⵙⵙⵏⴻⵖ ⵜⵓⴱⴱⵓⵀⴻⵍⵢⴰ ⴷ ⵊⵊⵀⴻⵍ. ⵏⴻⵛⵛ ⵓⴼⵉⵖ ⵓⵍⴰ ⴷ ⵎⴰⵏ ⴰⵢⴰ ⴰⵇⴰ ⴷ ⴰⴹⴼⴰⵔ ⵏ ⵓⵙⴻⵎⵎⵉⴹ.18ⵎⴰⵖⴰⵔ ⴷⴻⴳ ⵡⴰⵟⵟⴰⵙ ⵏ ⵜⵉⵖⵉⵜ, ⴷⴰⵢⴻⵙ ⴰⵟⵟⴰⵙ ⵏ ⵍⵀⴻⵎⵎ, ⵓ ⵡⴻⵏⵏⵉ ⵢⴰⵔⴻⵏⵏⵉⵏ ⴷⵉ ⵜⵓⵙⵙⵏⴰ, ⵢⴰⵔⴻⵏⵏⵉ ⴷⴻⴳ ⵡⴻⵎⵏⵓⵙ.