Tammu Kiitata
1Musey Isra7eele asaa ubbaa issife xeegidi, haysada yaagis; “Hinteno, Isra7eele asaw taani hachi hintew odiya wogaanne higgiya si7ite; enta tamaarite; minthidi naagite.2Goday, nu Xoossay Koreeba zumaa bolla nuura caaqis.3Goday he caaquwa caaqiday nu aawata xalaalara gidonashin, hachi de7on de7iya nu ubbaara caaqis.4He zumaa bolla eexiya tama giddon gididi, Goday som7on hintera haasayis.5Taani he wode Goday giyaba hintew odanaw, Godaapenne hintefe giddon eqas. Hinte tamas yayyidi zumaa bolla keyibeketa. Goday haysada yaagis.6“Gibxe biittafe, aylletetha keethaafe nena woziday taani Godaa, ne Xoossaa.7“Taape attishin, hara xoossati new de7opo.8“Bolla salon de7iyaba gidin, garsa sa7an de7iyaba gidin, woyko haatha giddon de7iyaba gidin, ay misile new eeqa oothofa.9Ne iyaw hokofa woyko iyaw goyinnofa. Taani tana ixeyisata aawata nagaraa gisho, nayta heedzanthonne oyddantho yeletaa gakanaw seerayis. Taani, Goday, ne Xoossay qanaatiya Xoossaa.10Shin taani tana siiqeysatanne ta kiita naageysata mukulu yeletaa gakanaw ta merinaa siiquwa bessayis.11“Godaa, ne Xoossaa sunthaa coo xeegopa. Goday ba sunthaa coo xeegiya uraa seeronna aggenna.12“Goday, ne Xoossay nena kiittidaysada Sambaata gallasaa geeshshi oothada naaga.13Neeni ne ooso ubbaa usupun gallasan ootha.14Shin laapuntha gallasay Godaas, ne Xoossaas Sambaata. He gallas ay oosoka oothofa. Neeni woyko ne adde na7ay woyko ne macca na7iya woyko ne oosanchoy woyko ne oosanchiya woyko ne booray woyko ne harey woyko ne hara meheti woyko ne kataman de7iya bete asi he gallas ay oosoka oothopite. Neeni shempeysada ne adde aylleytinne macca aylleti shempo.15Neeni Gibxe biittan aylle gidada de7idaysa dogopa. Goday, ne Xoossay ba wolqaama kushiyaninne ba micetida qesiyan yaape nena kessidaysa dogopa. Goday, ne Xoossay Sambaata gallas neeni naagana mela kiitiday hessa gishosa.16“Goday, ne Xoossay new immiya biittan ne laythay aduqana malanne new lo77ana mela Goday, ne Xoossay nena kiittidaysada ne aawanne ne aayiw boncha.17“Wodhopa.18“Laammofa.19“Kaysotopa.20“Wordo markatofa.21“Hara asa macho amottofa; iya keethaa, iya shooqa, iya adde aylliya woyko iya macca aylliw woyko iya boora woyko iya hariya woyko iyaw de7iyaba aybaka amottofa” yaagis.22Zumaa bolla tama, shaaranne dhumaa giddofe Goday dhoqu gida girsan duulata ubbaas odida qaalati haysata. I enta bolla aybaka gujibeenna; enta nam7u loche shuchata bolla xaafidi taw immis.23Zumay taman xuugetishin, dhumaa giddofe girsaa hinte si7ida wode hinte kochaa halaqatinne cimati taako yidi,24haysada yaagidosona; “Nuuni Godaa, nu Xoossaa girsaa tamaa giddofe si7ida wode Goday, nu Xoossay ba bonchuwanne ba gitatetha nuna bessis. Xoossi asara haasayin si7idi asi de7on daanaw danda7eysa hachi nuuni be7ida.25Shin ha wolqaama tamay nuna dhaysanaw danda7ees; yaatin, nuuni ayis hayqanee? Godaa, nu Xoossaa qaala nuuni nam7antho si7iko hayqana.26Asho ma7ida asan nuuni si7idaysada tama giddon gididi odishin, de7o Xoossaa qaala si7idi de7on de7ida asi oonee?27Hessa gisho, neeni shiiqada Goday, nu Xoossay giyaba ubbaa si7a; Goday, nu Xoossay new odiyaba nuus oda; nuka si7idi kiitetana” yaagideta.28Hinte taw odishin Goday, hinte giyaba si7idi, taako haysada yaagis; “Ha asay new odiyaba ubbaa si7as; enti gidaba ubbay like.29Entawunne enta naytas merinaw ubbabay injetana mela taw yayyanawunne ta kiita naaganaw entaw ubba wode hessa mela wozani de7eerenne.30Ha77i neeni bada enti banta dunkaaniya simmana mela oda.31Shin neeni haysan ta matan gam7a. Enti laattana mela taani entaw immiya biittan enti oothanaba neeni enta tamaarsana ta kiita, ta awaajuwanne ta higgiya ubbaa ta new odana” yaagis.32Hinteno, Isra7eele asaw, Goday, hinte Xoossay hintena kiittidaba ubbaa oothanaw naagetite; iyape ushachi woyko haddirsi goopite.33Hinte de7on daana mela, ubbay hintew injetana melanne hinte laattiya biittan hinte laythay aduqana mela, Goday hinte Xoossay hintena kiitida kiita naagite.