ሙሰይ እስራኤለ አሳ ዞርስ
1ሀእካ እስራኤለ አሳዉ፥ ህንተ ደኦን ዳና መላነ ጎዳይ፥ ህንተ ማይዛታ ፆሳይ፥ ህንተዉ እምያ ቢታ ህንተ ላታና መላ ታ ህንተና ታማርስያ ዎጋነ ህግያ ስእተነ ኦተ።2ታ ህንተና ኪትያ፥ ጎዳ ህንተ ፆሳ ኪታ ናግተፐ አትሽን፥ እያ ቦላ አይኮካ ጉጆፍተ፤ እያፐ አይኮካ ፓጭሶፕተ።3ብኤል-ፋጎራ ዙማ ቦላ ጎዳይ ኦዳባ ህንተ፥ ህንተ አይፈን በእደታ። ጎዳይ፥ ህንተ ፆሳይ ብኤል-ፋጎራ ኤቃ ጎይንዳይሳታ ኡባ ህንተ ግዶፈ ይስስ።4ሽን ህንተ ጎዳስ፥ ህንተ ፆሳስ አማነትዳ ግሾ፥ ሀች ጋካናዉ ኡባይካ ደኦን ደኤታ።5ሄኮ፥ ህንተ ላታናዉ ገልያ ቢታን ኦና መላ ጎዳይ፥ ታ ፆሳይ ታና ኪትዳ ዎጋነ ህግያ ታ ህንተና ታማርሳስ።6ህንተ ኤንታ ናግተነ ኦተ። ህንተ ሄሳ ኦኮ፥ ህንተ አይ መላ ጭንጨኮ ሀራ አሳይ ህንተና በአና። ኤንቲ ሀ ዎጋባ ስእያ ዎደ፥ “ቱማካ ሀ ግታ ካዎተይ ጭንጫነ አኬካንቾ ካዎተ” ያጋና።7ኑኒ እያ ፄግያ ዎደ ኡባን ጎዳይ፥ ኑ ፆሳይ ኑስ ማታ ግደይሳዳ ፆሲ ማታ ግድዳ ሀራ አይ ዎልቃማ ካዎተ ደኢ?8ታኒ ሀች ህንተ ስንን ዎያ ሀ ህገ ኡባ መላ ፅሎ ግድዳ ዎግነ ህገይ ደእያ ሀራ አይ ግታ ካዎተ ደኢ?9ህዛ ነ ደኦ ላይ ኡባን ሀ ነ በእዳባ ኡባ ዶጎና መላነ ነ ዎዛናን ዎና መላ ናገታ። ነ ናይታነ ነ ናይታ ናይታ ታማርሳ።10ኮሬባ ዙማ ቦላ ጎዳ፥ ህንተ ፆሳ ስንን ህንተ ኤቅዳ ዎደ ጎዳይ ታኮ፥ “ታ ቃላ ኤንቲ ስእድ፥ ባንታ ላይ ኡባን ታዉ ያያና መላነ ባንታ ናይታ ሄሳ ታማርሳና መላ አሳ ታኮ ሺሻ” ግዳይሳ አኬክተ።11ሄ ዎደ ህንተ ሺቅድ ዙማ ፃጶን ኤቅደታ፤ ሳሎ ጋካናዉ ታም ኤፅስ። ሄ ዙማ ፃጶይ ሳካና ማንነ ሻራን ጎዘትስ።12ጎዳይ ታማ ግዶን ግድድ ህንተዉ ኦድስ። ህንተ እያ ግርሳ ስእደታፐ አትሽን፥ እያ ማላ በእቤከታ።13ህንተ ኦና መላ እ ህንተና ኪትዳ ባ ጫቁዋ ህንተዉ ኦድስ፤ ሄስካ ታሙ ኪታታ። እ ኤንታ ናምኡ ሎቸ ሹቻታ ቦላ ፃፍስ።14ህንተ ላታናዉ ብያ ቢታን ኦና መላ ዎጋነ ህግያ ህንተና ታማርሳና መላ ጎዳይ ታና ሄ ዎደ ኪትስ።ኤቃ ጎይኖይ ናጋራ
15ጎዳይ ኮሬባ ዙማ ቦላ ታማ ግዶን ግድድ ህንተዉ ኦድዳ ጋላስ ህንተ እያ ማላ በእቦና ግሾ ሎይ ናገትተ።16አደ ዎይኮ ማጫ መን ኦሰትዳባ ግድን፥17ሳአን ደእያ ዶአ ኡባ ሌምሶን ግድን፥ ሳሎራ ፓልያ ካፎ ኡባ ሌምሶን ግድን፥18ሳአ ቦላ ኡሎራ ጎሸትያ መተ ሌምሶን ግድን፥ ሃ ግዶን ደእያ ሞሎ ሌምሶን ግድን፥ ህንተ ቱኖና መላ ህንተዉ ፆሰ ኦድ መፍተ።19ሳሎ ፑደ ፄልዳ፥ ጎዳይ ነ ፆሳይ ሳሎፐ ጋርሳን ደእያ ካዎተታስ እምዳ አዋ፥ አጌና፥ ፆልንቶታነ ሳሎ መተታ ኡባ በእዳ፥ ነ ኤንታዉ ጎይናዳ ባሎና መላ ናገታ።20ሽን ጎዳይ ህንተና ሀች ህንተ ሀንዳይሳዳ ባዉ ዱማትዳ አሰ ኦናዉ ብራታ ሴርስያ ጮጨ መላ ግድዳ ግብፀፈ ከስድ ኤህስ።21ህንተ ጋሶን ጎዳይ ታና ሀንቀትድ፥ ዮርዳኖሰ ፕኖና መላነ ጎዳይ ህንተ ፆሳይ፥ ላታ ኦድ ህንተዉ እምያ ሎኦ ቢታ ታኒ ገሎና መላ ጫቅስ።22ሄሳ ግሾ፥ ታኒ ዮርዳኖሰ ሻፋ ፕኖና ሀ ቢታን ሀይቃና፥ ሽን ህንተ ፕንድ ሄ ሎኦ ቢታ ላቴታ።23ህዛ ጎዳይ፥ ህንተ ፆሳይ ህንተራ ጫቅዳ ጫቁዋ ዶጎፕተ። ጎዳይ፥ ነ ፆሳይ ነና ኦፋ ግዳ አይ መን ኦሰትዳ ምስለ ነዉ ኤቃ ኦና መላ ናገታ።24ጎዳይ፥ ነ ፆሳይ ምያ ታማነ ቃናትያ ፆሲ።25ነ ናይታነ፥ ናይታ ናይታ የላዳ ሄ ቢታን አዱሳ ዎደ ደእያ ዎደ አይ መን ኦሰትዳ ምስለ ጎይናዳ ቱንኮ፥ ቃስ ጎዳ፥ ነ ፆሳ ሀንቀናዉ እያ ስንን ኢታባ ኦኮ፥26ህንተ ዮርዳኖሰ ሻፋ ፕንድ ላታናዉ ብያ ቢታፈ እሶይካ አቶና ኤለ ያናዉ ደኤይሳስ፥ ታ ሀች ህንተ ቦላ ሳሎነ ሳአ ማርካያይስ። ህንተ ፖሎ ያናፐ አትሽን፥ ሄ ቢታን አዱሳ ዎደ ደኤከታ።27ጎዳይ ህንተና ሀራ አሳ ግዶን ላላና፤ ህንተና እ ላልያ ካዎተታ ግዶን ህንተ ታይቦይ ጉ ግዳና።28ያን ህንተ ምፈነ ሹቻፈ አሳ ኩሸን ጊግዳ በኦና፥ ስኦና፥ ሞናነ ስንጎና ፆሳታ ጎይናና።29ሽን ያን ደአሸ ነ ጎዳ፥ ነ ፆሳ ኮያና፤ ነ እያ ኩመ ዎዛናፐነ ኩመ ሸምፖፈ ኮይኮ ደማና።30ሄ መቶ ኡባ ግዶን ነ ኡንኤታዳ ደእያ ዎደ ዉርሰን ጎዳኮ፥ ነ ፆሳኮ ስማናነ እያ ቃላስ ኪተታና።31ጎዳይ፥ ነ ፆሳይ ማሮተን ኩምዳ ፆሰ ግድያ ግሾ፥ እ ነና አገና ዎይኮ ይሰና፤ ነ ማይዛታስ ጫቅዳ ጫቁዋ ዶገና።32ጎዳይ ቢታን አሰ መዳ ጋላሳፐ ዶምድ፥ ህንተፈ ካሰ አዳ ዎድያ አነ ፕልግተ፤ ሄሳ መላ ግታባይ ፖሎ ሀን ኤርያኮ ዎይኮ ስኤትድ ኤርያኮ ሳሉዋስ ሀ ጋፃፐ ያ ጋፃ ጋካናዉ አነ ኦይችተ።33ታማ ላጮ ግዶን ጎዳይ ሃሳይን ስእድ፥ ህንተ ዮና ደኦን ደኤይሳዳ ጎዳይ ኦድሽን ስእድ፥ ደኦን ደእዳ ሀራ አስ ደኢ?34ዎይኮ ጎዳይ፥ ህንተ ፆሳይ ህንተ ፄልሽን፥ ግብፀ ቢታን ህንተዉ ኦዳይሳዳ ፓጨን፥ ማላታን፥ ማላልስያባን፥ ኦላን፥ ዎልቃማ ኩሸንነ ምጨትዳ ቀሰን፥ ግታ ያሻን ሀራ ካዎተ ግዶ ገልድ፥ እስ ካዎተ ባዉ ኤካናዉ ቡተትዳ ሀራ ፆሲ ደኢ?35ጎዳይ፥ ፆሰ ግደይሳ ህንተ ኤራና መላ ሄሳ እ ህንተና በስስ፤ እያፐ አትሽን፥ ሀራ ፆሲ ባዋ።36እ ህንተና ታማርሳናዉ ኮይዳ ግሾ፥ ባ ግርሳ ሳሎፐ ስስስ። ቃስ ሀ ሳአን ባ ግታ ታማ ህንተና በስስ፤ ሄ ታማ ግዶፈ ህንተ እያ ቃላ ስእደታ።37እ ሄሳ ኦዳይ ህንተ አዋታ ሲቅድ፥ ኤንታፈ ጉየ የለትያ ኤንታ ሼሻታ ዶርዳ ግሾ፥ ህንተና ግብፀፈ ባ ግታ ዎልቃን ከስስ።38ሀች ህንተ በኤይሳዳ፥ ህንተና ገልሳናዉነ ኤንታ ቢታ ህንተዉ ላታ ኦድ እማናዉ፥ ህንተፈ ዳርያነ ዎልቃምያ ካዎተታ ህንተ ስንፈ የደድ ከስስ።39ህዛ፥ ቦላ ሳሎን ግድን፥ ጋርሳ ሳአን ግድን፥ ጎዳይ ፆሰ ግደይሳ ኤርተ፤ ህንተ ዎዛናን ዎተ፤ ሀራ ፆሲ ባዋ።40ሄሳ ግሾ፥ ህንተዉነ ህንተፈ ጉየ ህንተ ናይታስ ኡባባይ ሎኦ ግዳና መላ፥ ቃስ ጎዳይ ህንተ ፆሳይ ህንተዉ መርናዉ እምያ ቢታን ህንተ ላይይ አዱቃና መላ፥ ታኒ ሀች ህንተና ኪትያ ዎጋነ ህግያ ናግተ።ባቃትድ አትያ ካታማታ
41ሄሳፈ ጉየ፥ ሙሰይ ዮርዳኖሰ ሄፍንን ዶሎሀ ባጋራ ሄ ካታማታ ዱማይስ።42ሄሳ እ ዱማይዳይ ካሰ ሞርከተ ባይና ደእሽን፥ ኤሮና ደእሸ አሰ ዎዳ አስ ያ ባቃታና መላሳ። ሄ ኡራይ ሄ ካታማታፐ እሱዋኡ ባቃትድ ባ ሸምፑዋ አሻናዉ ዳንዳኤስ።43ሄሳ ግሾ፥ ሮቤላ ኮቻስ ጋን ደረ ቦላ ደእያ ቦሶራ ካታማ፥ ጋደ ኮቻስ ጋላዳን ደእያ ራሞታነ ምናሰ ኮቻስ ባሳነን ደእያ ጎላና ካታማታ ዱማይስ።እመትዳ ህግያ ብርሸ
44ሙሰይ እስራኤለ አሳስ እምዳ ጎዳ ህገይ ሀይሳ፤45ሙሰይ ሀ ዎጋ፥ አዋጁዋነ ህግያ ኤንቲ ግብፀፈ ከይዳ ዎደ እሚስ።46ሄስ ኤንታዉ እመትዳይ ኤንቲ ቤት-ፓኦራ ካታማ ስንን ደእያ ዮርዳኖሰፐ ዶሎሀ ባጋራ ደእያ ዛንጋራን ደእሽና። ሄ በሳይ ሙሰይነ እስራኤለ አሳይ ግብፀፈ ከይዳ ዎደ ኦልድ ፆንዳ፥ ሀሰቦናን ኡትድ አሞረ ሃርያ ካዋ ስሆና ቢታ።47ሄ ዎደ ኤንቲ እያ ቢታነ ባሳነ ካዋ ኦገ ቢታ፥ ሄስካ ዮርዳኖሰፐ ዶሎሀ ባጋን ደእያ ናምኡ አሞረ ካዎታ ላትዶሶና።48ሄ ቢታይ አርኖና ዛንጋራን አሮኤራ ካታማፐ ብድ፥ ስርዮና ደርያ ጋኬስ፤ ስርዮና ጌተትድ ፄገትያ ደረይ አርሞና ዙማ።49ሄ ቢታይ ዮርዳኖሰፐ ዶሎሀ ባጋራ ደእያ አራባ ቢታ ኡባ ኤክድ ብድ፥ ፕስጋ ደርያ ፃጶን ደእያ ማፅነ አባ ጋኬስ።