ⴰⵄⴰⵡⴻⴷ ⵏ ⵛⵛⴰⵔⵉⵄⴰ32rif_tti

ⵉⵣⵍⵉ ⵏ ⵎⵓⵙⴰ

1“ⵙⵍⴻⵎ, ⴰ ⵉⵊⴻⵏⵡⴰⵏ, ⴰⴷ ⵙⵙⵉⵡⵍⴻⵖ! ⴻⵊⵊ ⵜⴰⵎⵎⵓⵔⵜ ⴰⴷ ⵜⵙⴻⵍ ⵉ ⵡⴰⵡⴰⵍⴻⵏ ⵏ ⵓⵇⴻⵎⵎⵓⵎ ⵉⵏⵓ!2ⴻⵊⵊ ⵜⴰⵖⵓⵔⵉ ⵉⵏⵓ ⴰⴷ ⵜⵓⴷⴻⵎ ⴰⵎ ⵡⴻⵏⵥⴰⵔ, ⴰⴷ ⵀⵡⴰⵏⵜ ⵜⵉⵡⴰⵍⵉⵏ ⵉⵏⵓ ⴰⵎ ⵏⵏⴷⴰ, ⴰⵎ ⵉⵛⵜ ⵏ ⵜⵀⵉⴹⵓⵔⵜ ⵅ ⵓⵖⴻⵎⵎⵓⵢ ⴰⵣⵉⵣⴰ ⵓ ⴰⵎ ⵜⵏⴻⵛⵏⴰⵛⵉⵏ ⵅ ⵡⴻⴼⵙⵓ,3ⵎⵉⵏⵣⵉ ⵏⴻⵛⵛ ⴰⴷ ⴱⴰⵔⵔⵃⴻⵖ ⵉⵙⴻⵎ ⵏ ⵙⵉⴷⵉ, ⴰⵔⵔⴻⵎ-ⴷⴷ ⵍⴻⵎⵖⴰⵔⴻⵜ ⵉ ⴰⵔⴻⴱⴱⵉ ⵏⵏⴻⵖ!4ⵏⴻⵜⵜⴰ ⴷ ⵜⴰⵚⴹⴰⵔⵜ, ⵍⵅⴻⴷⵎⴻⵜ ⵏⵏⴻⵙ ⵏⵉⵛⴰⵏ, ⵎⵉⵏⵣⵉ ⵎⴰⵔⵔⴰ ⵉⴱⵔⵉⴷⴻⵏ ⵏⵏⴻⵙ ⵜⵜⵡⴰⵙⴻⴳⴳⴷⴻⵏ, ⵉⵊⵊ ⵏ ⴰⵔⴻⴱⴱⵉ ⴷ ⴰⵎⵜⵉⵇⵇⵉ ⴱⵍⴰ ⵍⵖⴻⵛⵛ, ⴰⵇⴰ-ⵜ ⴷ ⴰⵎⵙⴻⴳⴳⴻⴷ, ⵏⵉⵛⴰⵏ ⵉ ⵢⴻⴵⴰ.5ⵍⴳⴻⵏⵙ ⴰⵇⴰ ⵉⵙⵙⴻⴼⵙⴻⴷ ⵉⵅⴻⴼ ⵏⵏⴻⵙ, ⵏⵉⵜⵏⵉ ⵡⴰⵔ ⴵⵉⵏ ⵛⴰ ⴷ ⵉⵃⴻⵏⵊⵉⵔⴻⵏ ⵏⵏⴻⵙ, ⵎⴰⵛⴰ ⴷ ⵍⴻⴼⴹⵉⵃⴻⵜ, ⴰⵇⴰ-ⵜ ⴷ ⵉⵊⵊ ⵏ ⵊⵊⵉⵍ ⵉⴼⴰⵔⵖ, ⵉⵅⵏⵓⵏⵏⴻⵙ.6ⵎⴰ ⵜⴻⵅⵙⴻⵎ ⴰⴷ ⵜⴻⴳⴳⴻⵎ ⴰⵢⴰ ⵉ ⵙⵉⴷⵉ, ⴰ ⵍⴳⴻⵏⵙ ⴰⴱⵓⵀⴰⵍⵉ ⴷ ⵡⴻⴼⵖⵓⵔ! ⵎⴰ ⵡⴰⵔ ⵉⴵⵉ ⵏⴻⵜⵜⴰ ⴷ ⴱⴰⴱⴰⵛ ⵏⵏⵉ ⵛⴻⴽ ⵉⵙⵖⵉⵏ, ⴷ ⵡⴻⵏⵏⵉ ⵛⴻⴽ ⵉⴳⴳⵉⵏ ⵓ ⴷ ⵡⴻⵏⵏⵉ ⵛⴻⴽ ⵉⴽⴻⵡⵡⵏⴻⵏ?7ⵉⴷⴰⵔⴻⵎ ⵓⵙⵙⴰⵏ ⵉⵄⴷⵓⵏ, ⵅⴻⵎⵎⴻⵎ ⵉⵙⴻⴳⴳⵯⵓⵙⴰ ⵏ ⵊⵊⵉⵍ ⴰⵍ ⵊⵊⵉⵍ, ⵙⴻⵇⵙⴰ ⴱⴰⴱⴰⵛ ⵓ ⵏⴻⵜⵜⴰ ⴰⴷ ⴰⵛ ⵜ ⵉⵄⴰⵡⴻⴷ ⵙⴻⵇⵙⴰ ⵉⵎⵖⴰⵔⴻⵏ ⵓ ⵏⵉⵜⵏⵉ ⴰⴷ ⴰⵛ ⵜ ⵉⵏⵉⵏ.8ⵓⵎⵉ ⵉⵡⵛⴰ ⵓⵎⵄⵓⴵⵉ ⵅ ⴽⵓⵍⵛⵉ ⵜⴰⵙⵖⴰⵔⵜ ⵏⵙⴻⵏ ⵉ ⵎⴰⵔⵔⴰ ⵍⴻⴳⵏⵓⵙ, ⵓⵎⵉ ⵉⴱⴹⴰ ⵜⴰⵔⵡⴰ ⵏ ⴱⵏⴰⴷⴻⵎ, ⵉⵙⵙⴳⴻⵄⵄⴻⴷ ⵉⵢⵎⵉⵔⴻⵏ ⵏ ⵍⴻⴳⵏⵓⵙ ⵄⵍⴰⵃⵙⴰⴱ ⵍⵇⴻⴷⴷ ⵏ ⴰⵢⵜ ⵏ ⵉⵙⵔⴰⵉⵍ.9ⵎⵉⵏⵣⵉ ⵜⴰⵙⵖⴰⵔⵜ ⵏ ⵙⵉⴷⵉ ⴷ ⵍⴳⴻⵏⵙ ⵏⵏⴻⵙ, ⵢⴰⵄⵇⵓⴱ ⴷ ⴰⴼⵉⵍⵓ ⵏ ⵍⴻⵄⴱⴰⵔ ⵏ ⵜⴻⵙⵖⴰⵔⵜ ⵏⵏⴻⵙ.10ⵢⵓⴼⴰ ⵉ-ⵜ ⴷⵉ ⵜⴻⵎⵎⵓⵔⵜ ⵏ ⵍⴻⵅⵍⴰ, ⴷⵉ ⵜⵏⴻⵣⵔⵓⴼⵜ ⵉⵅⵍⴰⵏ ⴰⴽ-ⴷ ⵍⴻⵡⵃⵓⵛ ⵉⵜⵜⵣⵓⵏ, ⵉⵙⵙⵖⵓⵢⵢⵓⵏ. ⵉⵏⵏⴻⴹ ⴰⵙ-ⴷⴷ, ⵉⵙⵙⴻⵍⵎⴻⴷ ⵉ-ⵜ, ⵉⵃⴹⴰ ⵉ-ⵜ ⴰⵎ ⵎⵓⵎⵎⵓ ⵏ ⵜⵉⵟⵟ ⵏⵏⴻⵙ.11ⴰⵎ ⵓⴳⵉⴷⴻⵔ ⵏⵏⵉ ⵉⵙⵙⴼⴰⵇⴻⵏ ⵍⵄⵓⵛⵛ ⵏⵏⴻⵙ, ⵉⵟⵟⴰⵡ ⵙⴻⵏⵏⴻⵊ ⵉ ⵡⴰⵔⵔⵓⴷ ⵏⵏⴻⵙ ⵣⵉ ⵙⵙⴰ ⵖⴰⵔ ⴷⴰ, ⵉⵜⵜⴱⴻⵣⵣⴻⵄ ⴰⴼⵔⵉⵡⴻⵏ ⵏⵏⴻⵙ, ⵉⴽⵙⵉ ⵉ-ⵜ ⵓⵛⴰ ⵢⴰⵔⴻⴱⴱⵓ ⵜ ⵅ ⵡⴰⴼⵔⵉⵡⴻⵏ ⵏⵏⴻⵙ,12ⴰⵎⵎⵓ ⵉ ⵉⵏⴷⴻⵀ ⵉ-ⵜ ⵙⵉⴷⵉ ⵡⴰⵀⴰ ⵓⵛⴰ ⵡⴰⵔ ⵜⵓⵖⵉ ⴷⵉⵏ ⴰⴽⵉⴷⴻⵙ ⵛⴰ ⵏ ⴰⵔⴻⴱⴱⵉ ⴷ ⴰⵖⵔⵉⴱ.13ⵉⵙⵙⴻⵏⵢⴰ ⵉ-ⵜ ⵅ ⵜⵄⵓⵍⴰⵍ ⵏ ⵜⴻⵎⵎⵓⵔⵜ ⵓⵛⴰ ⵉⵛⵛⴰ ⵍⵖⵉⴵⴻⵜ ⵏ ⵢⴻⵢⵢⴰⵔ. ⵉⵊⵊⴰ ⵉ-ⵜ ⴰⴷ ⵉⵥⴻⵎⵎ ⵜⴰⵎⵎⴻⵏⵜ ⵣⵉ ⵊⵊⴰⵔⴼ, ⴷ ⵣⵣⴻⵛⵜ ⵣⴻⴳ ⵡⴻⵥⵔⵓ ⵏ ⵜⴻⵚⴹⴰⵔⵜ,14ⴷ ⵜⵔⵓⵙⵙⵉ ⵏ ⵜⴼⵓⵏⴰⵙⵉⵏ ⴷ ⵓⵖⵉ ⵏ ⵡⵓⴵⵉ ⵙ ⵜⴰⴷⵓⵏⵜ ⵏ ⵉⵣⵎⴰⵔⴻⵏ ⴷ ⵉⵛⴰⵔⵔⵉⵢⵢⴻⵏ, ⵉⵏⵏⵉ ⵉⴵⴰⵏ ⴰⵎ ⵜⴰⵔⵡⴰ ⵏ ⴱⴰⵛⴰⵏ, ⵓ ⵙ ⵜⴰⴷⵓⵏⵜ ⵏ ⵉⵖⴰⵢⴹⴻⵏ, ⵙ ⵎⵓⵎⵎⵓ ⵏ ⵡⴰⵔⴻⵏ ⵏ ⵉⵔⴷⴻⵏ. ⵄⴰⵡⴻⴷ ⵛⴻⴽ ⵜⴻⵙⵡⵉⴷ ⵣⴻⴳ ⵉⴷⴰⵎⵎⴻⵏ ⵏ ⵓⴹⵉⵍ, ⴰⴽ-ⴷ ⵓⴽⵓⴼⴼⵓ ⵏⵏⴻⵙ ⵅⴰⵙ.
15ⵉⴷⵡⴻⵍ ⵢⴰⵛⵓⵔⵓⵏ ⵉⵇⴱⵓⴱⴱⴻⵣ ⵓⵛⴰ ⵉⵥⵥⴻⵄⴱⴻⴹ - ‘ⴰⵇⴰ ⵜⵎⴻⵙⵍⴻⴷ ⵓ ⵜⴻⵇⴱⵓⴱⴱⵣⴻⴷ, ⵡⴰⵀ, ⵙ ⵜⴰⴷⵓⵏⵜ ⵜᵉⵜⵜⵡⴰⴷⵍⴻⴷ!’ - ⵓⵛⴰ ⵉⵙⵎⴻⵃ ⴷⵉ ⴰⵔⴻⴱⴱⵉ ⵏⵏⵉ ⵉ-ⵜ ⴷⴷ-ⵉⵅⴻⵍⵇⴻⵏ ⵓⵛⴰ ⵉⵙⵙⴻⵃⵇⴰⵔ ⵜⴰⵚⴹⴰⵔⵜ ⵏ ⵓⵙⴻⵏⵊⴻⵎ ⵏⵏⴻⵙ.16ⵙ ⵉⵔⴻⴱⴱⵉⵜⴻⵏ ⵉⵖⵔⵉⴱⴻⵏ ⵙⵙⴻⴽⴽⴰⵔⴻⵏ ⵏⵉⵜⵏⵉ ⵜⵓⵙⵎⵉ ⵏⵏⴻⵙ, ⵙ ⵊⵊⵄⴰⵢⴻⴼ ⵙⵄⴰⵔⴻⵏ ⵜ.17ⵏⵉⵜⵏⵉ ⵇⴻⴷⴷⵎⴻⵏ ⵜⵉⵖⴰⵔⵚⴰ ⵉ ⵛⵛⵡⴰⵟⴻⵏ, ⵡⴰⵔ ⵉⴵⵉ ⵉ ⴰⵔⴻⴱⴱⵉ, ⵉ ⵉⵔⴻⴱⴱⵉⵜⴻⵏ ⵏⵏⵉ ⵡⴰⵔ ⵙⵙⵉⵏⴻⵏ, ⵉⵔⴻⴱⴱⵉⵜⴻⵏ ⵏ ⵊⴷⵉⴷ, ⵉⵏⵏⵉ ⴷⴷ-ⵢⵓⵙⵉⵏ ⵄⴰⴷ ⵎⴰⵎⵎⴻⵛ, ⵡⴰⵔ ⵣⵣⴰⵢⵙⴻⵏ ⵜⵜⴰⵔⵊⵉⵊⴻⵏ ⵍⴻⵊⴷⵓⴷ ⵏⵡⴻⵎ.18ⵜⴰⵚⴹⴰⵔⵜ ⵏⵏⵉ ⵉ ⵛⴻⴽ ⴷⴷ-ⵢⴻⵊⵊⵉⵏ, ⵜⵙⴻⵎⵃⴻⴷ ⴷⴰⵢⴻⵙ ⵓ ⵜᵉⵜⵜⵓⴷ ⴰⵔⴻⴱⴱⵉ ⵏⵏⵉ ⵉ ⵛⴻⴽ ⴷⴷ-ⵢⵓⵔⵡⴻⵏ ⵙ ⵍⴻⵡⵊⴻⵄ.
19ⵉⵥⵔⴰ ⵙⵉⴷⵉ ⵎⴰⵏ ⴰⵢⴰ ⵓⵛⴰ ⵉⵙⵙⴻⵀⵇⴰⵔ ⵉ-ⵜⴻⵏ, ⵣⵉ ⵙⵙⵉⴱⴱⴻⵜ ⵏ ⵓⵙⴷⵓⵇⵇⴻⵣ ⵏ ⵉⵃⴻⵏⵊⵉⵔⴻⵏ ⵏⵏⴻⵙ ⴷ ⵢⴻⵙⵙⵉⵙ.20ⵏⴻⵜⵜⴰ ⵉⵏⵏⴰ: ‘ⴰⴷ ⵣⵣⴰⵢⵙⴻⵏ ⴼⴼⴰⵔⴻⵖ ⵓⴷⴻⵎ ⵉⵏⵓ, ⴰⴷ ⵥⴰⵔⴻⵖ ⵎⴰⵎⵎⴻⵛ ⵖⴰ ⵢⵉⵍⵉ ⵣⵣⵎⴰⵏ ⵓⵏⴻⴳⴳⴰⵔⵓ ⵏⵙⴻⵏ, ⵎⵉⵏⵣⵉ ⵏⵉⵜⵏⵉ ⴷ ⵉⵊⵊ ⵏ ⵊⵊⵉⵍ ⵉⵜⵜⵏⴻⵇⵍⴰⴱ, ⴷ ⵜⴰⵔⵡⴰ ⵉ ⴷⵉ ⵡⴰⵔ ⵉⴵⵉ ⵍⵎⴰⵏⴻⵜ.21ⵏⵉⵜⵏⵉ ⵙⵙⴻⴽⴽⴰⵔⴻⵏ ⵜⵓⵙⵎⵉ ⵉⵏⵓ ⵙ ⵎⵉⵏ ⵡⴰⵔ ⵉⴵⵉⵏ ⴷ ⴰⵔⴻⴱⴱⵉ, ⵙⵄⴰⵔⴻⵏ ⴰⵢⵉ ⵙ ⵍ’ⴰⵚⵏⴰⵎ ⵏⵙⴻⵏ ⵉⴱⴻⵟⵟⵍⴻⵏ. ⵏⴻⵛⵛ ⴰⴷ ⵙⵙⴻⴽⴽⴰⵔⴻⵖ ⵜⵓⵙⵎⵉ ⵏⵙⴻⵏ ⵙ ⵎⵉⵏ ⵡⴰⵔ ⵉⴵⵉⵏ ⴷ ⵍⴳⴻⵏⵙ, ⵙ ⵢⵉⵊⵊ ⵏ ⵍⴳⴻⵏⵙ ⴷ ⴰⴱⵓⵀⴰⵍⵉ ⴰⴷ ⵜⴻⵏ ⵙⵄⴰⵔⴻⵖ.22ⵎⵉⵏⵣⵉ ⵙ ⵡⴻⵖⴹⴰⴱ ⵉⵏⵓ ⵜⴻⴽⴽⴰⵔ ⵜⵎⴻⵙⵙⵉ, ⴰⴷ ⵜⴻⵛⵎⴻⴹ ⴰⵍ ⵍⴰⵅⴰⵔⵜ ⴷⵉⵏ ⵙⵡⴰⴷⴷⴰⵢ, ⵓⵛⴰ ⴰⴷ ⵜⴻⵛⵛ ⵜⴰⵎⵎⵓⵔⵜ ⴷ ⵍⵖⵉⴵⴻⵜ ⵏⵏⴻⵙ, ⵓ ⴰⴷ ⵜⴻⵙⵙⴻⵛⵎⴻⴹ ⵜⵉⵙⵉ ⵏ ⵉⴷⵓⵔⴰⵔ.23ⵏⴻⵛⵛ ⴰⴷ ⴰⵙⴻⵏ ⴰⵔⵏⵉⵖ ⵉⵛⴻⵍⵡⴰⵡⴻⵏ, ⴰⴷ ⵅⴰⵙⴻⵏ ⵏⴻⵢⵢⵛⴻⵖ ⴼⵍⵉⵜⵛⴰⵜ ⵉⵏⵓ.24ⴰⴷ ⵜⵜⵡⴰⵀⴻⵢⵢⴼⴻⵏ ⵙ ⵍⴰⵥ ⵓⵛⴰ ⴰⴷ ⵜⵜⵡⴰⵚⴰⵔⴹⴻⵏ ⵙ ⵟⵟⴰⵄⵓⵏ ⵓ ⵙ ⵡⴰⵔⴻⴷⴷⴻⴵ ⴰⵎⴻⵔⵣⴰⴳ ⵓ ⵏⴻⵛⵛ ⴰⴷ ⴷⴰⵢⵙⴻⵏ ⵙⵙⴻⴽⴽⴻⵖ ⵜⵉⵖⵎⴰⵙ ⵏ ⵍⵎⴰⵍ ⵙ ⵙⵙⴻⵎ ⵉⵏⴻⵇⵇⴻⵏ ⵏ ⵉⴼⵉⵖⵔⴰⵏ ⵉⵏⵏⵉ ⵉⵜⵜⵎⵓⴵⵓⵖⴻⵏ ⴷⵉ ⵜⵄⴻⵊⵊⴰⵊⵜ.25ⵣⵉ ⴱⴰⵔⵔⴰ ⴰⴷ ⵉⴽⴽⴻⵙ ⵙⵙⵉⴼ ⵜⴰⵔⵔⴰⵡⵜ, ⵓ ⵣⴻⴳ ⵡⴻⵅⵅⴰⵎ ⵏ ⴷⴰⵅⴻⵍ ⴰⴷ ⵜⴻⵍⵇⴻⴼ ⵜⵉⴳⴳⵯⵓⴷⵉ: ⴰⵎ ⵓⴱⵍⵉⵖ ⴰⵎ ⵜⴻⵄⵣⴰⵔⴻⵛⵜ, ⴰⵙⴻⵢⵎⵉ ⴰⴽ-ⴷ ⵓⵎⴻⵛⵛⴰⵢⴱⵓ.
26ⵜⵓⵖⴰ ⵅⵙⴻⵖ ⴰⴷ ⵉⵏⵉⵖ: ‘ⴰⵎ ⵓⵙⴻⵎⵎⵉⴹ ⴰⴷ ⵜⴻⵏ ⴼⴰⵔⴻⵜⴽⴻⵖ, ⴰⴷ ⵙⵙⴱⴻⴷⴷⴻⵖ ⵍⵉⴷⴰⵔⴻⵜ ⵏⵙⴻⵏ ⵊⴰⵔ ⵉⵡⴷⴰⵏ!’,27ⵎⵍⵉ ⵡⴰⵔ ⴵⵉⵖ ⵜⵜⴻⴳⴳⵯⵉⴷⴻⵖ ⵣⴻⴳ ⵡⴻⵙⵄⴰⵔ ⵏ ⵍⴻⵄⴷⵓ, ⵃⵉⵎⴰ ⵉⵖⵔⵉⵎⴻⵏ ⵏⵙⴻⵏ ⵡⴰⵔ ⵜ ⵏⴻⴽⴽⴰⵔⴻⵏ ⵓⵛⴰ ⴰⴷ ⵉⵏⵉⵏ: ‘ⵉⴼⴰⵙⵙⴻⵏ ⵏⵏⴻⵖ, ⵉⵏⵏⵉ ⵉⵜⵜⵡⴰⵙⵙⴳⴻⵄⵄⴷⴻⵏ ⴰⵎⵎⵓ ⵙ ⵊⵊⴻⵀⴷ, ⴳⴳⵉⵏ ⴰⵢⴰ ⵎⴰⵔⵔⴰ, ⵡⴰⵔ ⵉⴵⵉ ⴷ ⵙⵉⴷⵉ.’28ⵎⵉⵏⵣⵉ ⵏⵉⵜⵏⵉ ⴷ ⵉⵊⵊ ⵏ ⵍⴳⴻⵏⵙ ⴱⵍⴰ ⴰⵔⵔⴰⵢ ⵓ ⵡⴰⵔ ⴷⴰⵢⵙⴻⵏ ⵍⴻⴼⵀⴰⵎⴻⵜ.29ⵎⵍⵉ ⴳⴳⵉⵏ ⵜⵉⵖⵉⵜ, ⵅⴻⵏⵏⵉ ⵉⴳⴳⵓⵔ ⴰⴷ ⴼⴻⵀⵎⴻⵏ ⴰⵢⴰ ⵓ ⴰⴷ ⵡⵛⴻⵏ ⵜⴰⵢⵏⵉⵜ ⵉ ⵓⵏⴻⴳⴳⴰⵔ ⵏⵙⴻⵏ.30ⵎⴰⵎⵎⴻⵛ ⵉⵣⴻⵎⵎⴰⵔ ⴰⴷ ⵉⴹⴼⴰⵔ ⵉⵊⵊ ⵏ ⴱⵏⴰⴷⴻⵎ ⴰⵍⴻⴼ ⵏ ⵉⵡⴷⴰⵏ ⵓ ⵎⴰⵎⵎⴻⵛ ⵣⴻⵎⵎⴰⵔⴻⵏ ⵜⵏⴰⵢⴻⵏ ⴰⴷ ⴰⵔⵔⴻⵏ ⵄⴻⵛⵔⴰ-ⴰⵍⴰⴼ ⴰⴷ ⴰⵔⴻⵡⵍⴻⵏ, ⵎⴰⵍⴰ ⵡⴰⵔ ⴷ ⴰⵙⴻⵏ ⵜⴻⵎⵎⴻⵏⵣ ⵜⴻⵚⴹⴰⵔⵜ ⵏⵙⴻⵏ ⵓⵛⴰ ⵡⴰⵔ ⴷ ⴰⵙⴻⵏ ⵉⵙⴻⵍⵍⴻⵎ ⵙⵉⴷⵉ ⵉ ⵏⵉⵜⵏⵉ?31ⵎⵉⵏⵣⵉ ⵜⴰⵚⴹⴰⵔⵜ ⵏⵙⴻⵏ ⵡⴰⵔ ⵜⴻⴵⵉ ⴰⵎ ⵜⴰⵚⴹⴰⵔⵜ ⵏⵏⴻⵖ. ⴻⵊⵊ ⴰⴷ ⵃⴻⴽⵎⴻⵏ ⵍⵄⴻⴷⵢⴰⵏ ⵏⵏⴻⵖ ⵙ ⵉⵅⴻⴼ ⵏⵙⴻⵏ.
32ⵎⵉⵏⵣⵉ ⵜⴰⵣⴰⵢⴰⵔⵜ ⵏⵙⴻⵏ ⵜⴻⴵⴰ ⵣⵉ ⵜⵣⴰⵢⴰⵔⵜ ⵏ ⵙⴰⴷⵓⵎ ⵓ ⵣⴻⴳ ⵉⵢⵢⴰⵔⴻⵏ ⵏ ⵄⴰⵎⵓⵔⵔⴰ. ⴰⴹⵉⵍ ⵏⵙⴻⵏ ⴷ ⴰⴹⵉⵍ ⵏ ⵙⵙⴻⵎ, ⵖⴰⵔⵙⴻⵏ ⵉⵣⴻⴽⴽⵓⵏⴻⵏ ⵛⵛⵓⵔⴻⵏ ⵙ ⵜⴰⵔⵣⵓⴳⵉ.33ⴱⵉⵏⵓ ⵏⵙⴻⵏ ⴰⵎⴻⵛⵏⴰⵡ ⴰⵙⵓⴹⵉ ⵏ ⵜⵎⴻⵙⵙⵉ ⵏ ⵍⵀⴰⵢⵛⴰⵜ, ⴰⵎⴻⵛⵏⴰⵡ ⵙⵙⴻⵎ ⵉⵏⴻⵇⵇⴻⵏ ⵏ ⵜⵍⴻⴼⵙⵉⵡⵉⵏ.34ⵎⴰ ⵎⴰⵔⵔⴰ ⴰⵢⴰ ⵡⴰⵔ ⵖⴰⵔⵉ ⵉⵜⵜⵡⴰⵅⵣⴻⵏ, ⵉⵜⵜⵡⴰⵛⴻⵎⵎⴻⵄ ⴷⴻⴳ ⵉⵅⵅⴰⵎⴻⵏ ⵏ ⵜⵅⵓⴱⴰⵢ ⵉⵏⵓ?35ⴷ ⵏⴻⵛⵛ ⵉ ⵢⴻⴵⴰⵏ ⵅ ⵏⵏⴻⵇⵎⴻⵜ ⴷ ⵍⴻⵅⵍⴰⵚ, ⵅⵎⵉ ⵖⴰ ⵉⵃⵍⵓⴵⴻⴹ ⵓⴹⴰⵔ ⵏⵙⴻⵏ. ⴰⵙⵙ ⵏ ⵓⴹⴻⵢⵢⴻⵄ ⵏⵙⴻⵏ ⴰⵇⴰ ⵢⵓⴷⴻⵙ, ⵓⵛⴰ ⵎⵉⵏ ⵅⴰⵙⴻⵏ ⵉ ⵖⴰ ⵢⵉⵍⵉ, ⴰⴷ ⵉⵎⵙⴰⵔ ⴷⴻⵖⵢⴰ.
36ⵎⵉⵏⵣⵉ ⵙⵉⴷⵉ ⴰⴷ ⵉⴳⴳ ⵙ ⵍⵃⴻⵇⵇ ⴷⵉ ⵟⵟⵡⴻⵄ ⵏ ⵍⴳⴻⵏⵙ ⵏⵏⴻⵙ, ⵏⴻⵜⵜⴰ ⴰⴷ ⵉⵃⴻⵏⵏ ⵅ ⵉⵎⵙⴻⵅⵅⴰⵔⴻⵏ ⵏⵏⴻⵙ ⵅⵎⵉ ⵖⴰ ⵉⵥⴰⵔ ⴱⴻⵍⵍⵉ ⵊⵊⴻⵀⴷ ⵉⵎⵎⴻⴽⵙⵉ, ⵓⵛⴰ ⵡⴰⵔ ⴷⵉⵏ ⵉⵇⵇⵉⵎ ⵄⴰⴷ ⵡⴻⵏⵏⵉ ⵉⵜⵜⵡⴰⵟⵟⴼⴻⵏ ⴷ ⵡⴻⵏⵏⵉ ⵉⵊⵊⵉⵏ.37ⵅⴻⵏⵏⵉ ⴰⴷ ⵢⵉⵏⵉ: ‘ⵎⴰⵏⵉ ⴵⴰⵏ ⵉⵔⴻⴱⴱⵉⵜⴻⵏ ⵏⵙⴻⵏ, ⵎⴰⵏⵉ ⵜⴰⵚⴹⴰⵔⵜ ⵉ ⵖⴰⵔⴻⵙ ⵓⴼⵉⵏ ⴰⴷⵓⵔⵔⵉ?38ⵎⴰⵏⵉ ⴵⴰⵏ ⵉⵔⴻⴱⴱⵉⵜⴻⵏ ⵏⵏⵉ ⵣⵉ ⵛⵛⵉⵏ ⵜⴰⴷⵓⵏⵜ ⵏ ⵜⵖⴰⵔⵚⴰ ⵏⵙⴻⵏ, ⵉⵏⵏⵉ ⵣⵉ ⵙⴻⵙⵙⴻⵏ ⴱⵉⵏⵓ ⵏ ⵜⴻⵡⵀⵉⴱⵉⵏ ⵏ ⵓⵙⴻⵢⵢⴻⴱ ⵏⵙⴻⵏ? ⴻⵊⵊ ⵉ-ⵜⴻⵏ ⴰⴷ ⴽⴽⴰⵔⴻⵏ, ⴰⴷ ⵛⴻⴽ ⵄⴰⵡⵏⴻⵏ ⵓ ⴻⵊⵊ ⵉ-ⵜ ⴰⴷ ⵅⴰⵡⴻⵎ ⵉⵙⵙⴷⵓⵔⵉ.’
39ⵅⵣⴰⵔⴻⵎ ⵍⴻⵅⵅⵓ, ⴰⵇⴰ ⴷ ⵏⴻⵛⵛ, ⵡⴰⵀ ⴷ ⵏⴻⵛⵛ, ⵓ ⵡⴰⵔ ⴷⵉⵏ ⵛⴰ ⵓⵍⴰ ⴷ ⵉⵊⵊ ⵏ ⴰⵔⴻⴱⴱⵉ ⴰⴽⵉⴷⵉ. ⵏⴻⵛⵛ ⵏⴻⵇⵇⴻⵖ ⵓ ⵏⴻⵛⵛ ⵙⵙⴻⴷⴷⴰⵔⴻⵖ, ⵏⴻⵛⵛ ⵍⴻⴱⴱⵣⴻⵖ ⵓ ⵙⵙⴳⴻⵏⴼⵉⵖ ⵓ ⵡⴰⵔ ⴷⵉⵏ ⵡⵉ ⵖⴰ ⵉⴼⴻⴽⴽⴻⵏ ⵣⴻⴳ ⵓⴼⵓⵙ ⵉⵏⵓ.40ⵎⵉⵏⵣⵉ ⵏⴻⵛⵛ ⴰⴷ ⵙⵙⵡⵉⵥⵥⴹⴻⵖ ⴰⴼⵓⵙ ⵉⵏⵓ ⵖⴰⵔ ⵓⵊⴻⵏⵏⴰ, ⴰⴷ ⵉⵏⵉⵖ: ‘ⵏⴻⵛⵛ ⴰⵇⴰ ⴷⴷⴰⵔⴻⵖ ⵉ ⵍⴻⴱⴷⴰ!’41ⵎⴰⵍⴰ ⵙⵙⵇⴻⴹⵄⴻⵖ ⵙⵙⵉⴼ ⵉⵏⵓ ⵉⵜⵜⵡⴻⵙⵙⴳⴻⵏ ⵓⵛⴰ ⴰⴼⵓⵙ ⵉⵏⵓ ⴰⴷ ⵉⵟⵟⴻⴼ ⴷⵉ ⵍⵃⵓⴽⵎ, ⵅⴻⵏⵏⵉ ⵏⴻⵛⵛ ⴰⴷ ⵏⵜⴰⵇⵎⴻⵖ ⵣⵉ ⵉⵖⵔⵉⵎⴻⵏ ⵉⵏⵓ ⵓ ⵣⴻⴳ ⵉⵏⵏⵉ ⴷ ⴰⵢⵉ ⵉⵛⴰⵔⵔⵀⴻⵏ.42ⴰⴷ ⵙⵙᵉⵙⵛⴰⵔⴻⵖ ⴼⵍⵉⵜⵛⴰⵜ ⵏ ⵍⵇⴻⵡⵙ ⵉⵏⵓ ⵙ ⵉⴷⴰⵎⵎⴻⵏ, ⵓⵛⴰ ⵙⵙⵉⴼ ⵉⵏⵓ ⴰⴷ ⵉⵙⴰⵔⴹ ⴰⵢⵙⵓⵎ, ⵉⴷⴰⵎⵎⴻⵏ ⵏ ⵡⴻⵏⵏⵉ ⵉⵜⵜⵡⴰⵏⵖⴻⵏ ⵓ ⵏ ⵡⴻⵏⵏⵉ ⵉⵜⵜⵡⴰⵃⴻⴱⴱⵙⴻⵏ ⴰⵣⴻⴵⵉⴼ ⵏ ⵍⴻⵄⴷⵓ ⴰⴽ-ⴷ ⵉⵊⴻⵟⵟⴰⵢⴻⵏ ⵏ ⵓⵛⵓⵡⵡⴰⴼ ⵏⵏⴻⵙ.43ⵙⵍⵉⵡⵍⴻⵡⴻⵎ, ⴰ ⵍⴻⴳⵏⵓⵙ!, ⴰⴽ-ⴷ ⵍⴳⴻⵏⵙ ⵏⵏⴻⵙ, ⵎⵉⵏⵣⵉ ⵏⴻⵜⵜⴰ ⴰⴷ ⵉⵏⵜⴰⵇⴻⵎ ⵉ ⵉⴷⴰⵎⵎⴻⵏ ⵏ ⵉⵎⵙⴻⵅⵅⴰⵔⴻⵏ ⵏⵏⴻⵙ, ⴰⴷ ⵢⴰⵔⵔⴰ ⵏⵏⴻⵇⵎⴻⵜ ⵅ ⵉⵖⵔⵉⵎⴻⵏ ⵏⵏⴻⵙ, ⵓⵛⴰ ⴰⴷ ⵉⴳⴳ ⵡⴻⵚⵍⴰⵃ ⵉ ⵜⴻⵎⵎⵓⵔⵜ ⵏⵏⴻⵙ ⴷ ⵍⴳⴻⵏⵙ ⵏⵏⴻⵙ.”
44ⵢⵓⵙⴰ-ⴷⴷ ⵎⵓⵙⴰ ⵓⵛⴰ ⵉⵙⵙⵉⵡⴻⵍ ⵎⴰⵔⵔⴰ ⴰⵡⴰⵍⴻⵏ ⵏ ⵜⵉⵣⵍⵉⵜ-ⴰ ⵅ ⵉⵎⴻⵣⵣⵓⵖⴻⵏ ⵏ ⵍⴳⴻⵏⵙ, ⵏⴻⵜⵜⴰ ⵊⵎⵉⵄ ⴰⴽ-ⴷ ⵀⵓⵛⵉⵄⴰ, ⵎⵎⵉⵙ ⵏ ⵏⵓⵏ.45ⵓⵎⵉ ⵉⴽⴻⵎⵎⴻⵍ ⵎⵓⵙⴰ ⵎⴰⵔⵔⴰ ⴰⵡⴰⵍⴻⵏ-ⴰ ⵉ ⵣⵉ ⵉⵙⵙⵉⵡⴻⵍ ⵖⴰⵔ ⵎⴰⵔⵔⴰ ⵉⵙⵔⴰⵉⵍ,46ⵉⵏⵏⴰ ⴰⵙⴻⵏ: “ⴰⵔⵔⴻⵎ ⵎⴰⵔⵔⴰ ⴰⵡⴰⵍⴻⵏ-ⴰ ⵏⵏⵉ ⵅ ⴷ ⴰⵡⴻⵎ ⵏⵏⵉⵖ ⴰⵙⵙ-ⴰ ⵖⴰⵔ ⵡⵓⵍ ⵏⵡⴻⵎ, ⵃⵉⵎⴰ ⴰⴷ ⵜⴻⵏ ⵜⵓⵎⵓⵔⴻⵎ ⵉ ⵉⵃⴻⵏⵊⵉⵔⴻⵏ ⵏⵡⴻⵎ ⵎⴰⵃⴻⵏⴷ ⴰⴷ ⵃⴹⴰⵏ ⵎⴰⵔⵔⴰ ⴰⵡⴰⵍⴻⵏ ⵏ ⵛⵛⴰⵔⵉⵄⴰ-ⵢⴰ ⴰⴷ ⵣⵣⴰⵢⵙⴻⵏ ⴳⴳⴻⵏ,47ⵎⵉⵏⵣⵉ ⵡⴰⵔ ⵉⴵⵉ ⴷ ⴰⵡⴰⵍ ⵏ ⴱⴰⵟⴻⵍ ⵉ ⴽⴻⵏⵏⵉⵡ, ⵎⴰⵛⴰ ⴷ ⵜⵓⴷⴰⵔⵜ ⵏⵡⴻⵎ. ⵙ ⵡⴰⵡⴰⵍ-ⴰ ⴰⴷ ⵜⴻⵣⵣⵓⴳⴳⴰⵔⵜⴻⵎ ⵓⵙⵙⴰⵏ ⵏⵡⴻⵎ ⵅ ⵜⴻⵎⵎⵓⵔⵜ ⵉ ⵖⴰⵔ ⵖⴰ ⵜⴻⵥⵡⵉⵎ ⵅ ⵍ’ⵓⵔⴷⵓⵏ, ⵎⴰⵃⴻⵏⴷ ⴰⴷ ⵜⵜ ⵜᵉⵟⵟⴼⴻⵎ ⴷ ⵍⵡⴰⵔⵜ.”
48ⵉⵙⵙⵉⵡⴻⵍ ⵙⵉⴷⵉ ⴰⴽ-ⴷ ⵎⵓⵙⴰ ⴷⴻⴳ ⵡⴰⵙⵙ ⵏⵏⵉ, ⵉⵏⵏⴰ:49“ⴳⴻⵄⵄⴻⴷ ⴰⴷⵔⴰⵔ ⵏ ⴰⴱⴰⵔⵉⵎ, ⴰⵇⴰ-ⵜ ⴷ ⴰⴷⵔⴰⵔ ⵏ ⵏⴰⴱⵓ ⵏⵏⵉ ⵉⴵⴰⵏ ⴷⵉ ⵜⴻⵎⵎⵓⵔⵜ ⵏ ⵎⵓ’ⴰⴱ ⴰⵔⴻⵏⴷⴰⴷ ⵏ ⴰⵔⵉⵃⴰ, ⵓⵛⴰ ⵅⵣⴰⵔ ⵜⴰⵎⵎⵓⵔⵜ ⵏ ⴽⴻⵏⵄⴰⵏ ⵏⵏⵉ ⵉ ⵖⴰ ⵡⵛⴻⵖ ⴷ ⵍⵡⴰⵔⵜ ⵉ ⴰⵢⵜ ⵏ ⵉⵙⵔⴰⵉⵍ,50ⵓⵛⴰ ⵎⵎⴻⵜ ⵅ ⵡⴻⴷⵔⴰⵔ ⵏⵏⵉ ⵖⴰⵔ ⵖⴰ ⵜⴳⴻⵄⵄⴷⴻⴷ. ⴰⴷ ⵜⴷⴻⵡⵍⴻⴷ ⴰⴷ ⵜᵉⵎⵎⴰⵔⵏⵉⴷ ⵖⴰⵔ ⵍⴳⴻⵏⵙ ⵏⵏⴻⵛ, ⴰⵎ ⵎⴰⵎⵎⴻⵛ ⵉⵎⵎⵓⵜ ⵓⵎⴰⵛ ⵀⴰⵔⵓⵏ ⵅ ⵡⴻⴷⵔⴰⵔ ⵏ ⵀⵓⵔ ⵓⵛⴰ ⵉⵎⵎⴰⵔⵏⵉ ⵖⴰⵔ ⵍⴳⴻⵏⵙ ⵏⵏⴻⵙ,51ⵎⵉⵏⵣⵉ ⴽⴻⵏⵏⵉⵡ ⵜⴻⵖⴷⴰⵍⴻⵎ ⵣⵣⴰⵢⵉ ⴷⵉ ⵍⵡⴻⵙⵟ ⵏ ⴰⵢⵜ ⵏ ⵉⵙⵔⴰⵉⵍ ⵖⴰⵔ ⵡⴰⵎⴰⵏ ⵏ ⵎⴰⵔⵉⴱⴰ-ⵇⴰⴷⴰⵛ ⴷⵉ ⵍⴻⵅⵍⴰ ⵏ ⵚⵉⵏ, ⵎⵉⵏⵣⵉ ⴽⴻⵏⵏⵉⵡ ⵡⴰⵔ ⴷ ⴰⵢⵉ ⵜⴻⵙⵙⵇⴻⴷⴷⵙⴻⵎ ⴷⵉ ⵍⵡⴻⵙⵟ ⵏ ⴰⵢⵜ ⵏ ⵉⵙⵔⴰⵉⵍ.52ⵅⴻⵏⵏⵉ ⵍⴻⵅⵅⵓ ⴰⴷ ⵟⵥⴰⵔⴻⴷ ⵜⴰⵎⵎⵓⵔⵜ ⵣⵣⴰⵜⴻⴽ, ⵎⴰⵛⴰ ⵡⴰⵔ ⵜⵜⵉⴷⴼⴻⴷ ⵛⴰ ⵖⴰⵔ ⵜⴻⵎⵎⵓⵔⵜ ⵏⵏⵉ ⵉ ⵖⴰ ⵡⵛⴻⵖ ⵉ ⴰⵢⵜ ⵏ ⵉⵙⵔⴰⵉⵍ.”
expand_more
Search