Read أَعَاوذْ ن شَّارِيعَا 32

DEU32rif_ati

إِزْڒِي ن مُوسَا

¹”سْڒمْ، أَ إِجنْوَانْ، أَذْ سِّيوْڒغْ! أجّْ ثَامُّورْثْ أَذْ ثْسڒْ إِ وَاوَاڒنْ ن ؤُقمُّومْ إِنُو!²أجّْ ثَاغُورِي إِنُو أَذْ ثُوذمْ أَمْ ونْژَارْ، أَذْ هْوَانْثْ ثِيوَاڒِينْ إِنُو أَمْ نّْذَا، أَمْ إِشْثْ ن ثْهِيضُورْثْ خْ ؤُغمُّويْ أَزِيزَا ؤُ أَمْ ثْنشْنَاشِينْ خْ وفْسُو،³مِينْزِي نشّْ أَذْ بَارّْحغْ إِسمْ ن سِيذِي، أَرّمْ-د ڒمْغَارثْ إِ أَربِّي نّغْ!⁴نتَّا ذ ثَاصْضَارْثْ، ڒْخذْمثْ نّسْ نِيشَانْ، مِينْزِي مَارَّا إِبْرِيذنْ نّسْ تّْوَاسڭّْذنْ، إِجّْ ن أَربِّي ذ أَمْثِيقِّي بْڒَا ڒْغشّْ، أَقَا-ث ذ أَمْسڭّذْ، نِيشَانْ إِ يدْجَا.⁵ڒْْڭنْسْ أَقَا إِسّفْسذْ إِخفْ نّسْ، نِيثْنِي وَارْ دْجِينْ شَا ذ إِحنْجِيرنْ نّسْ، مَاشَا ذ ڒفْضِيحثْ، أَقَا-ث ذ إِجّْ ن جِّيڒْ إِفَارْغْ، إِخْنُونّسْ.⁶مَا ثخْسمْ أَذْ ثڭّمْ أَيَا إِ سِيذِي، أَ ڒْڭنْسْ أَبُوهَاڒِي ذ وفْغُورْ! مَا وَارْ إِدْجِي نتَّا ذ بَابَاشْ نِّي شكْ إِسْغِينْ، ذ ونِّي شكْ إِڭِّينْ ؤُ ذ ونِّي شكْ إِكوّْننْ؟⁷إِذَارمْ ؤُسَّانْ إِعْذُونْ، خمّمْ إِسڭّْوُوسَا ن جِّيڒْ أَڒْ جِّيڒْ، سقْسَا بَابَاشْ ؤُ نتَّا أَذْ أَشْ ث إِعَاوذْ سقْسَا إِمْغَارنْ ؤُ نِيثْنِي أَذْ أَشْ ث إِنِينْ.⁸ؤُمِي إِوْشَا ؤُمْعُودْجِي خْ كُوڒْشِي ثَاسْغَارْثْ نْسنْ إِ مَارَّا ڒڭْنُوسْ، ؤُمِي إِبْضَا ثَارْوَا ن بْنَاذمْ، إِسّْڭعّذْ إِيْمِيرنْ ن ڒڭْنُوسْ عْلَاحْسَابْ ڒْقدّْ ن أَيْثْ ن إِسْرَائِيل.⁹مِينْزِي ثَاسْغَارْثْ ن سِيذِي ذ ڒْڭنْسْ نّسْ، يَاعْقُوبْ ذ أَفِيڒُو ن ڒعْبَارْ ن ثسْغَارْثْ نّسْ.¹⁰يُوفَا إِ-ث ذِي ثمُّورْثْ ن ڒخْڒَا، ذِي ثْنزْرُوفْثْ إِخْڒَانْ أَكْ-ذ ڒوْحُوشْ إِتّْزُونْ، إِسّْغُويُّونْ. إِنّضْ أَسْ-د، إِسّڒْمذْ إِ-ث، إِحْضَا إِ-ث أَمْ مُومُّو ن ثِيطّْ نّسْ.¹¹أَمْ ؤُڭِيذرْ نِّي إِسّْفَاقنْ ڒْعُوشّْ نّسْ، إِطَّاوْ سنّجْ إِ وَارُّوذْ نّسْ زِي سَّا غَارْ ذَا، إِتّْبزّعْ أَفْرِيونْ نّسْ، إِكْسِي إِ-ث ؤُشَا يَاربُّو ث خْ وَافْرِيونْ نّسْ،¹²أَمُّو إِ إِنْذهْ إِ-ث سِيذِي وَاهَا ؤُشَا وَارْ ثُوغِي ذِينْ أَكِيذسْ شَا ن أَربِّي ذ أَغْرِيبْ.¹³إِسّنْيَا إِ-ث خْ ثْعُوڒَاڒْ ن ثمُّورْثْ ؤُشَا إِشَّا ڒْغِيدْجثْ ن ييَّارْ. إِجَّا إِ-ث أَذْ إِژمّْ ثَامّنْثْ زِي جَّارْفْ، ذ زّشْثْ زڭْ وژْرُو ن ثصْضَارْثْ،¹⁴ذ ثْرُوسِّي ن ثْفُونَاسِينْ ذ ؤُغِي ن وُودْجِي س ثَاذُونْثْ ن إِزْمَارنْ ذ إِشَارِّييّنْ، إِنِّي إِدْجَانْ أَمْ ثَارْوَا ن بَاشَانْ، ؤُ س ثَاذُونْثْ ن إِغَايْضنْ، س مُومُّو ن وَارنْ ن إِرْذنْ. عَاوذْ شكْ ثسْوِيذْ زڭْ إِذَامّنْ ن ؤُضِيڒْ، أَكْ-ذ ؤُكُوفُّو نّسْ خَاسْ.

¹⁵إِذْوڒْ يَاشُورُونْ إِقْبُوبّزْ ؤُشَا إِژّعْبضْ - ’أَقَا ثْمسْڒذْ ؤُ ثقْبُوبّْزذْ، وَاهْ، س ثَاذُونْثْ ثتّْوَاذْڒذْ!‘ - ؤُشَا إِسْمحْ ذِي أَربِّي نِّي إِ-ث د-إِخڒْقنْ ؤُشَا إِسّحْقَارْ ثَاصْضَارْثْ ن ؤُسنْجمْ نّسْ.¹⁶س إِربِّيثنْ إِغْرِيبنْ سّكَّارنْ نِيثْنِي ثُوسْمِي نّسْ، س جّْعَايفْ سْعَارنْ ث.¹⁷نِيثْنِي قدّْمنْ ثِيغَارْصَا إِ شّْوَاطنْ، وَارْ إِدْجِي إِ أَربِّي، إِ إِربِّيثنْ نِّي وَارْ سِّيننْ، إِربِّيثنْ ن جْذِيذْ، إِنِّي د-يُوسِينْ عَاذْ مَامّشْ، وَارْ زَّايْسنْ تَّارْجِيجنْ ڒجْذُوذْ نْومْ.¹⁸ثَاصْضَارْثْ نِّي إِ شكْ د-يجِّينْ، ثْسمْحذْ ذَايسْ ؤُ ثتُّوذْ أَربِّي نِّي إِ شكْ د-يُورْونْ س ڒوْجعْ.

¹⁹إِژْرَا سِيذِي مَانْ أَيَا ؤُشَا إِسّهْقَارْ إِ-ثنْ، زِي سِّيبّثْ ن ؤُسْذُوقّزْ ن إِحنْجِيرنْ نّسْ ذ يسِّيسْ.²⁰نتَّا إِنَّا: ’أَذْ زَّايْسنْ فَّارغْ ؤُذمْ إِنُو، أَذْ ژَترغْ مَامّشْ غَا يِيڒِي زّْمَانْ ؤُنڭَّارُو نْسنْ، مِينْزِي نِيثْنِي ذ إِجّْ ن جِّيڒْ إِتّْنقْڒَابْ، ذ ثَارْوَا إِ ذِي وَارْ إِدْجِي ڒْمَانثْ.²¹نِيثْنِي سّكَّارنْ ثُوسْمِي إِنُو س مِينْ وَارْ إِدْجِينْ ذ أَربِّي، سْعَارنْ أَيِي س لْ-أَصْنَامْ نْسنْ إِبطّْڒنْ. نشّْ أَذْ سّكَّارغْ ثُوسْمِي نْسنْ س مِينْ وَارْ إِدْجِينْ ذ ڒْڭنْسْ، س يِيجّْ ن ڒْڭنْسْ ذ أَبُوهَاڒِي أَذْ ثنْ سْعَارغْ.²²مِينْزِي س وغْضَابْ إِنُو ثكَّارْ ثْمسِّي، أَذْ ثشْمضْ أَڒْ ڒَاخَارْثْ ذِينْ سْوَادَّايْ، ؤُشَا أَذْ ثشّْ ثَامُّورْثْ ذ ڒْغِيدْجثْ نّسْ، ؤُ أَذْ ثسّشْمضْ ثِيسِي ن إِذُورَارْ.²³نشّْ أَذْ أَسنْ أَرْنِيغْ إِشڒْوَاونْ، أَذْ خَاسنْ نيّْشغْ فْڒِيثْشَاثْ إِنُو.²⁴أَذْ تّْوَاهيّْفنْ س ڒَاژْ ؤُشَا أَذْ تّْوَاصَارْضنْ س طَّاعُونْ ؤُ س وَاردّدْجْ أَمرْزَاڭْ ؤُ نشّْ أَذْ ذَايْسنْ سّكّغْ ثِيغْمَاسْ ن ڒْمَاڒْ س سّمْ إِنقّنْ ن إِفِيغْرَانْ إِنِّي إِتّْمُودْجُوغنْ ذِي ثْعجَّاجْثْ.²⁵زِي بَارَّا أَذْ إِكّسْ سِّيفْ ثَارَّاوْثْ، ؤُ زڭْ وخَّامْ ن ذَاخڒْ أَذْ ثڒْقفْ ثِيڭّْوُوذِي: أَمْ ؤُبْڒِيغْ أَمْ ثعْزَارشْثْ، أَسيْمِي أَكْ-ذ ؤُمشَّايْبُو.

²⁶ثُوغَا خْسغْ أَذْ إِنِيغْ: ’أَمْ ؤُسمِّيضْ أَذْ ثنْ فَارثْكغْ، أَذْ سّْبدّغْ ڒِيذَارثْ نْسنْ جَارْ إِوْذَانْ!‘،²⁷مْڒِي وَارْ دْجِيغْ تّڭّْوِيذغْ زڭْ وسْعَارْ ن ڒعْذُو، حِيمَا إِغْرِيمنْ نْسنْ وَارْ ث نكَّارنْ ؤُشَا أَذْ إِنِينْ: ’إِفَاسّنْ نّغْ، إِنِّي إِتّْوَاسّْڭعّْذنْ أَمُّو س جّهْذْ، ڭِّينْ أَيَا مَارَّا، وَارْ إِدْجِي ذ سِيذِي.‘²⁸مِينْزِي نِيثْنِي ذ إِجّْ ن ڒْڭنْسْ بْڒَا أَرَّايْ ؤُ وَارْ ذَايْسنْ ڒفْهَامثْ.²⁹مْڒِي ڭِّينْ ثِيغِيثْ، خنِّي إِڭُّورْ أَذْ فهْمنْ أَيَا ؤُ أَذْ وْشنْ ثَايْنِيثْ إِ ؤُنڭَّارْ نْسنْ.³⁰مَامّشْ إِزمَّارْ أَذْ إِضْفَارْ إِجّْ ن بْنَاذمْ أَڒفْ ن إِوْذَانْ ؤُ مَامّشْ زمَّارنْ ثْنَاينْ أَذْ أَرّنْعشْرَا-أَڒَافْ أَذْ أَروْڒنْ، مَاڒَا وَارْ ذ أَسنْ ثمّنْزْ ثصْضَارْثْ نْسنْ ؤُشَا وَارْ ذ أَسنْ إِسلّمْ سِيذِي إِ نِيثْنِي؟³¹مِينْزِي ثَاصْضَارْثْ نْسنْ وَارْ ثدْجِي أَمْ ثَاصْضَارْثْ نّغْ. أجّْ أَذْ حكْمنْ ڒْعذْيَانْ نّغْ س إِخفْ نْسنْ.

³²مِينْزِي ثَازَايَارْثْ نْسنْ ثدْجَا زِي ثْزَايَارْثْ ن سَاذُومْ ؤُ زڭْ إِيَّارنْ ن عَامُورَّا. أَضِيڒْ نْسنْ ذ أَضِيڒْ ن سّمْ، غَارْسنْ إِزكُّوننْ شُّورنْ س ثَارْزُوڭِي.³³بِينُو نْسنْ أَمشْنَاوْ أَسُوضِي ن ثْمسِّي ن ڒْهَايْشَاثْ، أَمشْنَاوْ سّمْ إِنقّنْ ن ثْڒفْسِيوِينْ.³⁴مَا مَارَّا أَيَا وَارْ غَارِي إِتّْوَاخْزنْ، إِتّْوَاشمّعْ ذڭْ إِخَّامنْ ن ثْخُوبَايْ إِنُو؟³⁵ذ نشّْ إِ يدْجَانْ خْ نّقْمثْ ذ ڒخْڒَاصْ، خْمِي غَا إِحْڒُودْجضْ ؤُضَارْ نْسنْ. أَسّْ ن ؤُضيّعْ نْسنْ أَقَا يُوذسْ، ؤُشَا مِينْ خَاسنْ إِ غَا يِيڒِي، أَذْ إِمْسَارْ ذغْيَا.

³⁶مِينْزِي سِيذِي أَذْ إِڭّْ س ڒْحقّْ ذِي طّْوعْ ن ڒْڭنْسْ نّسْ، نتَّا أَذْ إِحنّْ خْ إِمْسخَّارنْ نّسْ خْمِي غَا إِژَارْ بلِّي جّهْذْ إِمّكْسِي، ؤُشَا وَارْ ذِينْ إِقِّيمْ عَاذْ ونِّي إِتّْوَاطّْفنْ ذ ونِّي إِجِّينْ.³⁷خنِّي أَذْ يِينِي: ’مَانِي دْجَانْ إِربِّيثنْ نْسنْ، مَانِي ثَاصْضَارْثْ إِ غَارسْ ؤُفِينْ أَذُورِّي؟³⁸مَانِي دْجَانْ إِربِّيثنْ نِّي زِي شِّينْ ثَاذُونْثْ ن ثْغَارْصَا نْسنْ، إِنِّي زِي سسّنْ بِينُو ن ثوْهِيبِينْ ن ؤُسيّبْ نْسنْ؟ أجّْ إِ-ثنْ أَذْ كَّارنْ، أَذْ شكْ عَاوْننْ ؤُ أجّْ إِ-ث أَذْ خَاومْ إِسّْذُورِي.‘

³⁹خْزَارمْ ڒخُّو، أَقَا ذ نشّْ، وَاهْ ذ نشّْ، ؤُ وَارْ ذِينْ شَا ؤُڒَا ذ إِجّْ ن أَربِّي أَكِيذِي. نشّْ نقّغْ ؤُ نشّْ سّدَّارغْ، نشّْ ڒبّْزغْ ؤُ سّْڭنْفِيغْ ؤُ وَارْ ذِينْ وِي غَا إِفكّنْ زڭْ ؤُفُوسْ إِنُو.⁴⁰مِينْزِي نشّْ أَذْ سّْوِيژّْضغْ أَفُوسْ إِنُو غَارْ ؤُجنَّا، أَذْ إِنِيغْ: ’نشّْ أَقَا دَّارغْ إِ ڒبْذَا!‘⁴¹مَاڒَا سّْقضْعغْ سِّيفْ إِنُو إِتّْوسّْڭنْ ؤُشَا أَفُوسْ إِنُو أَذْ إِطّفْ ذِي ڒْحُوكْمْ، خنِّي نشّْ أَذْ نْثَاقْمغْ زِي إِغْرِيمنْ إِنُو ؤُ زڭْ إِنِّي ذ أَيِي إِشَارّْهنْ.⁴²أَذْ سّسْشَارغْ فْڒِيثْشَاثْ ن ڒْقوْسْ إِنُو س إِذَامّنْ، ؤُشَا سِّيفْ إِنُو أَذْ إِسَارْضْ أَيْسُومْ، إِذَامّنْ ن ونِّي إِتّْوَانْغنْ ؤُ ن ونِّي إِتّْوَاحبّْسنْ أَزدْجِيفْ ن ڒعْذُو أَكْ-ذ إِجطَّاينْ ن ؤُشُوَّافْ نّسْ.⁴³سْڒِيوْڒومْ، أَ ڒڭْنُوسْ!، أَكْ-ذ ڒْڭنْسْ نّسْ، مِينْزِي نتَّا أَذْ إِنْثَاقمْ إِ إِذَامّنْ ن إِمْسخَّارنْ نّسْ، أَذْ يَارَّا نّقْمثْ خْ إِغْرِيمنْ نّسْ، ؤُشَا أَذْ إِڭّْ وصْڒَاحْ إِ ثمُّورْثْ نّسْ ذ ڒْڭنْسْ نّسْ.“

⁴⁴يُوسَا-د مُوسَا ؤُشَا إِسِّيوڒْ مَارَّا أَوَاڒنْ ن ثِيزْڒِيثْ-أَ خْ إِمزُّوغنْ ن ڒْڭنْسْ، نتَّا جْمِيعْ أَكْ-ذ هُوشِيعَا، مِّيسْ ن نُونْ.⁴⁵ؤُمِي إِكمّڒْ مُوسَا مَارَّا أَوَاڒنْ-أَ إِ زِي إِسِّيوڒْ غَارْ مَارَّا إِسْرَائِيل،⁴⁶إِنَّا أَسنْ: ”أَرّمْ مَارَّا أَوَاڒنْ-أَ نِّي خْ ذ أَومْ نِّيغْ أَسّْ-أَ غَارْ وُوڒْ نْومْ، حِيمَا أَذْ ثنْ ثُومُورمْ إِ إِحنْجِيرنْ نْومْ مَاحنْذْ أَذْ حْضَانْ مَارَّا أَوَاڒنْ ن شَّارِيعَا-يَا أَذْ زَّايْسنْ ڭّنْ،⁴⁷مِينْزِي وَارْ إِدْجِي ذ أَوَاڒْ ن بَاطڒْ إِ كنِّيوْ، مَاشَا ذ ثُوذَارْثْ نْومْ. س وَاوَاڒْ-أَ أَذْ ثزُّوڭَّارْثمْ ؤُسَّانْ نْومْ خْ ثمُّورْثْ إِ غَارْ غَا ثژْوِيمْ خْ لْ-ؤُرْذُونْ، مَاحنْذْ أَذْ ت ثطّْفمْ ذ ڒْوَارْثْ.“

⁴⁸إِسِّيوڒْ سِيذِي أَكْ-ذ مُوسَا ذڭْ وَاسّْ نِّي، إِنَّا:⁴⁹”ڭعّذْ أَذْرَارْ ن أَبَارِيمْ، أَقَا-ث ذ أَذْرَارْ ن نابُو نِّي إِدْجَانْ ذِي ثمُّورْثْ ن مُوآبَ أَرنْذَاذْ ن أَرِيحَا، ؤُشَا خْزَارْ ثَامُّورْثْ ن كنْعَانْ نِّي إِ غَا وْشغْ ذ ڒْوَارْثْ إِ أَيْثْ ن إِسْرَائِيل،⁵⁰ؤُشَا مّثْ خْ وذْرَارْ نِّي غَارْ غَا ثْڭعّْذذْ. أَذْ ثْذوْڒذْ أَذْ ثمَّارْنِيذْ غَارْ ڒْڭنْسْ نّشْ، أَمْ مَامّشْ إِمُّوثْ ؤُمَاشْ هَارُونْ خْ وذْرَارْ ن هُورْ ؤُشَا إِمَّارْنِي غَارْ ڒْڭنْسْ نّسْ،⁵¹مِينْزِي كنِّيوْ ثغْذَاڒمْ زَّايِي ذِي ڒْوسْطْ ن أَيْثْ ن إِسْرَائِيل غَارْ وَامَانْ ن مَارِيبَا-قَاذَاشْ ذِي ڒخْڒَا ن صِينْ، مِينْزِي كنِّيوْ وَارْ ذ أَيِي ثسّْقدّْسمْ ذِي ڒْوسْطْ ن أَيْثْ ن إِسْرَائِيل.⁵²خنِّي ڒخُّو أَذْ طْژَارذْ ثَامُّورْثْ زَّاثكْ، مَاشَا وَارْ تِّيذْفذْ شَا غَارْ ثمُّورْثْ نِّي إِ غَا وْشغْ إِ أَيْثْ ن إِسْرَائِيل.“

DEU 32 / rif_ati

إِزْڒِي ن مُوسَا

DEU32rif_ati