1“Xmi xak dd ɣa yasent marra tmesřayin-a, lbaraka d nneɛřet nni ggiɣ zzatek, uca ad tent tarred ɣar wuř nnec jar marra řegnus ɣar mani SIDI, AREBBI nnec, xak yuẓẓeř,2uca ad tɛeqbed ɣar SIDI, AREBBI nnec, ad tesřed i tmijja nnes s marra uř nnec u s marra řeɛmar nnec anect n marra min x cek umureɣ ass-a, cek jmiɛ ak-d iḥenjiren nnec,3xenni SIDI, AREBBI nnec, ad ibḍeř aḥebbes nnec uca ad xak yarḥem uca ad cek issmun zi jar marra řegnus ɣar mani cek ibezzeɛ SIDI, AREBBI nnec.4Waxxa inni x yuẓẓřen zzayek, aqa aten ɣar uneggaru n ujenna, aqa SIDI, AREBBI nnec, ad cek issmun uca ad cek dd-indeh ssenni.5SIDI, AREBBI nnec, ad cek issidef ɣar temmurt nni warten řejdud nnec uca ad tt teksid ɛawed d řwart. Netta ad dayek igg tcuni u ad dayek yarni ɛad ktar zi řejdud nnec.6SIDI, AREBBI nnec, ad ixten uř nnec d wuř n tarwa nnec ḥima ad texsed SIDI, AREBBI nnec, s marra uř nnec d marra řeɛmar nnec, ḥima ad teddared.7SIDI, AREBBI nnec, ad yarr marra nnɛaři nni x řɛedyan nnec u x yinni cek icarrhen, inni xak dd-idarrcen ɛawed.8Ad tɛeqbed, ad tesřed i tmijja n SIDI uca ad tegged marra řumurat nni xef ac ttumureɣ ass-a.9SIDI, AREBBI nnec, ad ac iwc afeyyeḍ di marra řxedmet n ifassen nnec, di řɣiǧet n uɛeddis nnec, di řɣiǧet n řebhayem nnec u di řɣiǧet n temmurt nnec, aya ad yiři i řxar nnec, minzi SIDI ad iɛqeb ḥima ad zzayek ifarḥ i řxar nnec, am mammec tuɣa ifarḥ i řejdud nnec,10Xmi ɣa tesřed i tmijja n SIDI, AREBBI nnec ḥima ad teḥḍid řumurat nnes d tweṣṣa nnes, tinni yurin deg wedlis-a ittwanḍen n Ccariɛa uca xmi dd ɣa tdewřed ɣar SIDI, AREBBI nnec, s marra uř nnec, s marra řeɛmar nnec.”11“Minzi řumur-a i x cek ttumureɣ necc ass-a, war iǧi yuɛřa xak u war iggʷij ca.12War iǧi deg ujenna, ḥima ad tinid: ‘Wi ɣa igeɛɛden ɣar ujenna di ṭṭweɛ nneɣ ḥima ad aneɣ t-i-dd-yawi i neccin uca ad as nseř, ḥima nzemmar ad zzayes negg?’13War iǧi x ujemmaḍ n řebḥar, ařami ɣa tzemmared ad tinid: ‘Wi ɣa iẓwan ɣar ujemmaḍ n řebḥar ḥima ad aneɣ t-i-dd-yawi i neccin uca ad as nseř, ḥima nzemmar ad zzayes negg?’,14minzi awař-a yudes i cek aṭṭas, aqa-t deg uqemmum nnec, aqa-t deg wuř nnec, ḥima ad zzayes tegged.”15“Xzar, necc ggiɣ zzatek ass-a tudart d řxar uřa d řmewt d řɣar,16minzi necc ttumureɣ cek ass-a ḥima ad texsed SIDI, AREBBI nnec, ad tuyured deg ibriden nnes uca ad teḥḍid řumurat nnes d tweṣṣa nnes d lfarayiḍ nnes maḥend ad teddared u ad tᵉttwammarnid, uca SIDI, AREBBI nnec, ad ac ibarek di temmurt nni ɣar ɣa tadfed ḥima ad tt tᵉṭṭfed d řwart.17Maca mařa uř nnec ittaggʷej u war tᵉttesřid uca ad tᵉttwassuffɣed zeg webrid, ad tbendqed zzat i irebbiten nneɣni uca ad asen tɛebded,18xenni necc ttbarrḥeɣ awem ass-a belli s tidett ad temmtem. War tarennyed ca ussan nnec x temmurt mani ɣa tadfed awarni řami teẓwid L’Urdun, ḥima ad tt tᵉṭṭfed d řwart.19Ass-a necc řaɣiɣ x ujenna d temmurt, maḥend ad iřin d řechud xawem: ggiɣ zzatek tudart d řmewt, lbaraka d nneɛřet! Ixḍar xenni tudart, ḥima ad teddared, cek d zzariɛet nnec,20maḥend ad texsed SIDI, AREBBI nnec, uca ad tesřed i tmijja nnes, ad as třeṣqed, minzi Netta d tudart nnec uřa d tuzzegart n wussan nnec, ḥima tzemmared ad tzedɣed x temmurt nni x ijjuǧ SIDI i řejdud nnec ad asen tt-i-dd-iwc, i Ibrahim d Isḥaq d Yaɛqub.”