ፆሳኮ ስሞን በንትያ አንጆ
1ሀች ታ ነ ስንን ዎዳ አንጆይነ ባደይ ነ ቦላ ጋክያ ዎደ ጎዳይ፥ ነ ፆሳይ ነና ላልያ ሀራ ካዎተታ ግዶን ደእሸ ሀይሳ ነ አኬክኮ፥2ነነ ነ ናይት ጎዳ፥ ነ ፆሳኮ፥ ስማዳ፥ ነ ኩመ ዎዛናፐነ ነ ኩመ ሸምፑዋፈ ታ ሀች ነና ኪትያ ህግያስ ኪተትኮ፥3ያን ጎዳይ፥ ነ ፆሳይ ነ ድኤትዳ ቢታፈ ነና ዛራና። እ ህንተዉ ቃትድ ህንተና ላልዳ ካዎተታ ኡባ ግዶፈ ዛሪድ ሺሻና።4ቢታ ጋፃፐ ጋፃ ጋካናዉ ነ ላለትኮካ፥ ያፐ ጎዳይ፥ ነ ፆሳይ ነና ዛሪድ ሺሻና።5ነ አዋት ካሰ ላትዳ ቢታ፥ ነካ ላታና መላ ጎዳይ፥ ነ ፆሳይ ነና ሄ ቢታ ኤሀና። ያን ነና ነ አዋታፐ አድ ዱረያና፤ ነ ታይቡዋ ዳርሳና።6ነ ደኦን ዳና መላነ ጎዳ፥ ነ ፆሳ ነ ኩመ ዎዛናፐነ ነ ኩመ ሸምፑዋፈ ዶሳና መላ እ ነዉነ ነ ናይታስ ኪተትያ ዎዛና እማና።7ጎዳይ፥ ነ ፆሳይ ሀ ባደታ ኡባ ነ ሞርከታነ ነና ጎደይሳታ ቦላ ኤሀና።8ሀች ታ ነና ኪትያ ህግያ ነ ናጋና፤ ዛራዳ ጎዳስ፥ ነ ፆሳስ ኪተታና።9ሄ ዎደ ጎዳይ ነ ፆሳይ ነና ነ ኩሸ ኦሶ ኡባን፥ ነ ኡሎ አይፍያን፥ መህያንንነ ነ ጎሻ አይፍያን ነና ዳርስድ አንጃና። ጎዳይ ካሰ ነ አዋታ አንጅድ ኡፋይትዳይሳዳ ነና አንጅድ ኡፋይታና።10ሄስ ሀናናይ ሀ ህገ ማፃፋን ፃፈትዳ ጎዳ፥ ነ ፆሳ ህግያነ ዎጋ ናጋዳ፥ ጎዳ፥ ነ ፆሳኮ ነ ኩመ ዎዛናፐነ ነ ኩመ ሸምፑዋፈ ስምኮ።11ሀች ታ ነና ኪትያ ኪታት ሄሳ መላ ዴፆ ግዶኮና፤ ኔፐ ሃኮኮና።12ኔኒ፥ “ኑኒ ስእድ ኪተታና መላ ሳሎ ከይድ ኑስ ዎሳናይ ኦኔ?” ጎና መላ ሳሎና ግደና።13“ኑኒ ስእድ ኪተታና መላ ኑስ አባ ፕንድ ኤሀናይ ኦኔ?” ጎና መላ አባፈ ሄፍንና ግደና።14ቃላይ ነዉ ዳሮ ማታን ደኤስ፤ ነ ኦና መላ ቃላይ ነ ዎዛናንነ ነ ዶናን ደኤስ።15ሄኮ፥ ታ ሀች ነ ስንን ደኦነ ሎኦተ፥ ሀይቆነ ዮ ዎስ።16ነ ጎዳ፥ ነ ፆሳ ዶስኮ፥ እያ ኦግያን ቢኮ፥ እያ ኪታ፥ እያ አዋጁዋነ እያ ህግያ ታግኮ፥ ነ ደኦን ዳናነ ዳራና። ነ ላታናዉ ገልያ ቢታን ጎዳይ፥ ነ ፆሳይ ነና አንጃና።17ሽን ነ ዎዛናይ ጎዳፐ ሃክን፥ እያዉ ኪተቶና እፃዳ፥ ሀራ ፆሳታስ ጉፋናዳ ኤንታ ጎይንኮ፥18ህንተ ኡባይ ያናይሳ ታ ሀች ህንተዉ ኦዳይስ። ዮርዳኖሰ ፕንድ ህንተ ላታናዉ ብያ ቢታን ህንተ ላይይ አዱቀና።19ታ ህንተ ስንን ደኦነ ሀይቆ፥ አንጆነ ባደ ዎዳይሳስ ሀች ሳሎነ ሳአ ህንተ ቦላ ማርካያና። ህዛ ህንተነ ህንተ ሼሻይ ደኦን ዳና መላ ደኦ ዶርተ።20ጎዳ ነ ፆሳ ዶሳ፤ እያ ቃላ ስአ፥ እያዉ ኪተታ፤ እያራ ኦይከታ። ሄሳዳ ሀንኮ፥ ጎዳይ ካሰ ነ ማይዛታስ፥ አብራሃመስ፥ ይሳቃስነ ያይቆባስ እማናዉ ጫቅዳ ቢታን ነነ ነ ሼሻይ አዱሳ ላይ ዳና።