ሞአበን ዛር ኢምዳ ጫቁዋ
1ጎዳይ ኮሬባ ዙማን፥ እስራኤለ አሳራ ጫቅዳ ጫቁዋ ቦላ ጉጅድ ሞአበን ኤንታራ ጫቃናዉ ሙሰ ኪትዳ ጫቆ ቃላት ሀይሳታ።2ሙሰይ እስራኤለ አሳ ኡባ ፄግ ሺሽድ፥ ሀይሳዳ ያግስ። ጎዳይ ግብፀ ካዋ ቦላ፥ እያ ኦላንቾታ ቦላነ እያ ቢታ ኡባ ቦላ ኦዳባነ ጋዳባ ህንተ፥ ህንተ አይፈን በእደታ።3ኤንታ ቦላ ጋዳ ኢታ መቶታ፥ ማላልስያባታነ ግታ ማላታታ ህንተ፥ ህንተ አይፈን በእደታ።4ሽን ሀች ጋካናዉ ጎዳይ፥ ህንተዉ አኬክያ ዎዛና፥ ፄልያ አይፈነ ስእያ ሀይ እምቤና።5ጎዳይ ኦይታሙ ላይ ኩመ ህንተና መላ ቢታን ካለያ ዎደ ህንተ ማኦይ ዉርቤና፥ ህንተ ጫማይ ጭምቤና።6ጎዳይ፥ ህንተ ፆሳ ግደይሳ ህንተ ኤራና መላ ኡይ ምቤከታ፤ ዎይነ ዎይኮ ሀራ ማይያ ኡሽ ኡይቤከታ።7ኑኒ ሀ በሳ ጋክዳ ዎደ ሀሰቦና ካዎይ ስሆንነ ባሳነ ካዎይ ኦገይ ኑራ ኦለታናዉ ከይዶሶና፥ ሽን ኑኒ ኤንታ ፆንዳ።8ኤንታ ቢታ ኤክድ፥ ሮቤላነ ጋደ ኮቻስ፥ ቃስ ምናሰ ኮቻፈ ባጋስ ላታ ኦድ እምዳ።9ህንተ ኦይክያባይነ የያባይ ህንተዉ አንጀታና መላ ሀ ጫቆ ቃላታ አማነትድ ናግተ።10ሀች ህንተ ኡባይ፥ ኮቻታ ሀላቃት፥ ጭማት፥ ሹማትነ እስራኤለ አሳ ኡባይ ሀይሳን ጎዳ ስንን ኤቅደታ።11ህንተ ናይታራ፥ ህንተ ማቸታራ፥ ህንተ ግዶን ደእድ፥ ም ምፅያነ ሃ ትክያ ሀራ ቢታ አሳራ እስፈ ሀይሳን ኤቅደታ።12ጎዳ፥ ህንተ ፆሳራ ቃላ ገላናዉ ሀይሳን ኤቅደታ። ጎዳይ ሀ ቃላ ሀች ህንተራ ጫቆን ምንና።13ጎዳይ ህንተና ባ አሰ ኦድ ምንና፤ ህንተዉነ ህንተ ማይዛታስ፥ አብራሃመስ፥ ይሳቃስነ ያይቆባስ ጫቅዳይሳዳ እ ህንተዉ ፆሰ ግዳና።14ጎዳይ ሀ ጫቆ ቃላ ኤሰይ ህንተ ፃላላራ ግደና።15ሀች ሀይሳን፥ ጎዳ፥ ኑ ፆሳ ስንን ኤቅዳ ኑ ኡባራነ ስንፈ ያና የለታ ኡባራ ኤሴስ።16ኑኒ ግብፀን ዋንድ ደእዳኮነ ሀእ ጋካናዉ ኦገን ደእያ ካዎተታ ግዶራ ዋንድ ካንድ ይዳኮ ኤሬታ።17ኤንታ ግዶን ደእያ እፀትዳ ም፥ ሹቻ፥ ብራነ ዎርቃ ኤቃ ምስለታ በእደታ።18ሀ ህንተፈ ኦንካ አደ ግድን ማጫ ግድን፥ እስ ሶ አስ ግድን፥ እስ ኮች ግድን ጎዳ፥ ኑ ፆሳፈ፥ ሃክድ ሀራ ካዎተታ ፆሳታ ጎይኖና መላ ናገትተ። ሄሳ መላ ጫምያነ ዎያ አይፈ አይፍያ አስ ህንተ ግዶን ደኦፖ።19ሀ ጫቆ ቃላ ስእድ፥ ባ ዎዛናን፥ “ታ ሸነን ታኒ ቢኮካ፥ መቶይ ባዋ” ያግድ ባና ጭምኮ፥ ሄሳ መላ አስ ሎኦታ ቦላነ ኢታታ ቦላ ዮ ኤሄስ።20ጎዳ ሀንቆይነ ቃናተይ ሄሳ መላ አሰ ቦላ ኤፅድ ከያና። ሀ ማፃፋን ፃፈትዳ ባደ ኡባይ እያ ቦላ ያና፤ ሳሎፐ ጋርሳን እያ ሱን ጎዳይ ቁቻና።21ጎዳይ ሀ ህገ ማፃፋን ፃፈትዳ ባደ ጫቆ ቃላዳ ሄ ኡራ እስራኤለ ግዶፈ ሻክድ ይሳና።22ያና የለተይ፥ ህንተ ሼሻይነ ሃሆ ቢታፈ ያ ሀራ ቢታ አሳይ፥ ጎዳይ ህንተ ቦላ ኤህዳ ጋዱዋነ ሀርግያ በአና።23ቢታ ኡባይ ዲነንነ ማፅነን ኩማና፤ ቶከትያባይ ዴና፤ ዶልያባይ በንተና፤ ማትነ ም ዶለና። ጎዳይ ባ ሀንቆን ይስዳ ሶዶማዳነ ጋሞራዳ፥ አዳማዳነ ፃቦይማ ካታማታዳ ሀናና።24ካዎተት፥ “ጎዳይ ሀ ቢታ ቦላ ሀይሳ መላባ አይስ ኦዴ? ሀ ዎልቃማ ሀንቁዋስ ጋሶይ አይቤ?” ያጋና።25አሳይ ዛሪድ፥ “ኤንቲ ጎዳይ፥ ኤንታ አዋታ ፆሳይ፥ ኤንታ ግብፀፈ ከስዳ ዎደ ኤንታራ ገልዳ ጫቆ ቃላ መንዳ ግሾሳ።26ኤንቲ ኤሮና ፆሳታስነ እ ጎይኖፍተ ግዳ ፆሳታ ጎይንዶሶና።27ሄሳ ግሾ፥ ጎዳይ ሀንቀትድ፥ ሀ ማፃፋን ፃፈትዳ ባደታ ኡባ ኤንታ ቦላ ኤህስ።28ጎዳይ ዎልቃማ ሀንቆ ሀንቀትድ፥ ኤንታ ቢታፈ ኤንታና ሾድድ ሀራ ቢታ የደስ” ያጋና።29ፁራይ ኑ ጎዳ ኑ ፆሳሳ፥ ሽን ኑኒ ሀ ህገ ቃላ ኦና መላ ቆንጭዳይሳት መርናዉ ኑሳነ ኑ ናይታሳ።