1Neeni Godaa ne Xoossaas polo kiitetiko, hachi ta new immiya kiita ubbaa minthada naagiko, Goday, ne Xoossay biittan de7iya kawotethata ubbaafe aathidi nena dhoqu dhoqu oothana.2Neeni Godaa, ne Xoossaas kiitetiko, haysafe kaallidi de7iya anjo ubbay nebaa gidana.3Ne katamaninne ne goshshan anjetidaysa gidana.4Ne ulo ayfey, ne kathay, ne mehey, ne dorsatinne ne deeshati anjetidaysata gidana.5Ne keesheynne ne munaqa miishey anjetidaysa gidana.6Ne kessaynne ne geloy anjetidaysa gidana.7Ne bolla dendiya ne morketa, Goday ne sinthan xoonetidaysata oothana. Enti ne bolla issi ogera yaana, shin laapun ogera ne sinthafe baqatana.8Goday ne kushey oykiyabaanne ne shaaliya anjana; Goday, ne Xoossay new immiya biittan nena anjana.9Neeni Godaa, ne Xoossaa kiita naagikonne iya ogiyan biiko, I new caaqidaysada Goday nena baw geeshsha dere oothidi essana.10Hessafe guye, biittan de7iya asa ubbay Goday ba sunthan nena xeegidaysa be7idi yayyana.11Goday new immanaw ne mayzatas caaqida he biittan, ne ulo ayfiya, ne mehiya, ne goshsha ayfiya darsidi anjana.12Ne kushe ooso ubbaa anjanawunne, Goday ne biittas ira woden woden bukisanaw ba minja keethaa, salo pengiya new dooyana. Neeni daro kawotethatas gede tal7anaape attishin, oodefeka haa tal7aka.13Goday nena ubbaas kace kessanaape attishin, goyna kessenna. Hachi ta new immiya, Godaa, ne Xoossaa kiita si7ada, minthada naagiko, ne bolla gidanaape attishin, garse gidaka.14Ta new hachi immida kiitaape haddirsi woyko ushachi gada, hara xoossata kaallofa; enta goyinnofa.
Kiitetonna Ixoy Ehiya Baadethi
15Shin neeni Godaa, ne Xoossaas kiitetonna ixada, hachi ta nena kiittiya wogaanne higgiya ubbaa naagonna ixiko, haysafe kaallidi de7iya baadethati ubbay ne bolla yaananne nena demmana.16Ne katamaninne ne goshshan baadetidaysa gidana.17Ne keesheynne munaqa miishey baadetidaysa gidana.18Ne ulo ayfey, ne katha ayfey, ne mehey, ne dorsaynne deeshay baadetidaysa gidana.19Ne kessaynne ne geloy baadetidaysa gidana.20Neeni iita ooso oothada tana aggida gisho, neeni eeson dhayana gakanaw ne oothiya ooso ubban Goday baadethi, dagamanne kawushatethi yeddana.21Neeni laattanaw biya biittafe dhayana gakanaw Goday, gadoy neepe duuxonna mela oothana.22Goday nena gilqatethan, mishan, madunthan, xuuggiya awan, koshan, wol7oninne kathi dhaysiya harmen ne dhayana gakanaw shocana.23Neepe bollara de7iya saloy naase birata gidana; neepe garsara de7iya biittay birata gidana.24Goday ne biittan bukiya ira bidonne baana kessana; neeni dhayana gakanaw salope baani bukana.25Goday nena ne morketan xoonisana. Neeni enta olanaw issi ogera keyana; shin laapun ogera ne enta sinthafe baqatana. Biittan de7iya kawotethi ubbay ne bolla gakidaba be7idi, yashshan kokorana.26Ne ahay salo kafotasinne bazzo do7atas kathi gidana; enta yedethiya oonika deenna.27Goday nena paxoy bayna Gibxe gadon, kixan, madunthaninne puuso hergen shocana.28Goday nena gooshshatethan, qooqetethaninne dagaman shocana.29Seeta gallas neeni qooqey tattafeysada tattafana; ne oothiyaba ubbay new giigonna ixana. Ne de7o laytha ubban ne un7etananne bonqetada daana. Nena maaddiya asi demmaka.30Ne macho oycha giigisana, shin iyo hari dafi ekidi iissana. Neeni keethe keexana, shin iyan de7aka. Woyne tokana, shin iya ayfiya maaka.31Ne booray ne sinthan shuketana, shin iya ashuwa maaka. Ne harey neepe wolqan eketana, shin new guye simmenna. Ne dorsati ne morketas imetana, enta ashshanaw nena maaddiya asi deenna.32Ne ayfey be7ishin ne adde naytinne macca nayti hara kawotethas imetana. Enti simmin be7ana gada xeellishin, ne ayfey tollu gidi attana; hessa digganaw new wolqi deenna.33Ne biitta ayfiyanne ne cawa ubbaa ne eronna asi maana; ne de7o laytha ubban un7etidaysanne naaqetidaysa gidana.34Ne be7iya iitati nena gooshshana.35Goday paxoy bayna iita madunthan ne gulbatanne ne wodiriya hargisana; tohope huuphe gakanaw, nena he madunthan shocana.36Goday nenanne ne kawa, nenanne ne mayzata eronna asa biitta efana. Hessan neeni mithafenne shuchafe oosetida hara xoossata goyinnana.37Goday nena laaliya hara kawotethata giddon neeni miichasinne kaassas attana.38Neeni daro kathi ne goshshan zerana; shin booley midigin, guutha kathi shiishana.39Woyne tokada iya harmana, shin guxuney iya midigin, iyape ayfe demmaka woyko iyape uyaka.40Ne biitta ubban shamahoy dolana, shin ayfey qoqofetidi wuriya gisho, shamaho zayte demmaka.41Ne addenne macca yelana, shin oli di77idi efiya gisho enti neera dookona.42Ne mithaanne ne biitta ayfiya booley wursana.43Ne giddon de7iya bete asay ne bolla dhoqu dhoqu gaana, shin ne guye attada ziqi ziqi gaana.44I new tal7anaape attishin, ne iyaw tal7aka; I huuphe gidana; neeni goyna gidana.45Godaa, ne Xoossaa, ne kiitetonna ixida gishonne iya wogaanne higgiya naagonna ixida gisho, ne dhayana gakanaw ha baadethati ubbay ne bolla wodhana; nena enti yedethana.46Ha baadethati ne bollanne ne kochaa bolla merinaw malaatanne malaalsiyaba gidana.47New sa7i injetida wode Godaa, ne Xoossaa ufaysaninne galatan goyinnona gisho,48nena koshan, saamon, kallotethaninne meton ubbaba dhayada, Goday ne bolla yeddiya ne morketas haaretana. Goday nena dhaysana gakanaw ne morgen birata qambara wothana.49Goday ne enta qaala eronna kawotethata, biitta gaxape ankoy piradhidi wodheysada ne bolla ehana.50Enti wozana minota; cima bonchonayisata; naytas qadhetonayisata.51Ne dhayana gakanaw enti ne mehiyanne goshsha ayfiya maana. Neeni dhayana gakanaw ne kathaa, ne woyniya, ne zaytiya, ne miizanne ne dorsa wudiya maarokona.52Goday, ne Xoossay new immiya biittan de7iya ne ammanetiya adussenne mino dirsati laaletana gakanaw ne katamaa yuushuwa teqidi nena un7ethana.53Ne morketi katamaa teqidi nena un7ethiya wode miyaba dhayada, Goday ne Xoossay new immida ne ulo ayfe gidida ne adde naytanne ne macca nayta maana.54Ne giddon hari attoshin kase injen de7ida asika ba ishaas, ba dosiya machesinne ba yelida naytas ba kathaafe shaakenna.55Morketi katamaa teqidi un7ethiya wode maanabay hari bayna gisho, miya ba nayta ashuwape hara oodeska immenna.56Ne giddon kase injen de7ida, ba injiyafe dendoysan sa7a yedhanaw shaatetiya maccasiya, ba dosiya azinaasinne ba yelida naytas uuzettana.57Morketi iya de7iya katamaa teqidi iyo un7ethida gishonne waaysida gisho, iw hari miyabay dhayin, ba yelida na7aanne do7aa enta gathonna geeman barka maana.58Ha maxaafan xaafetida higgeta ne naagonna ixiko, malaalsiyanne yashshiya Godaa, ne Xoossaa suntha bonchona ixiko,59ne bollanne ne kochaa bolla Goday, yashshiya gado, daro wode gam7iya, paxoy bayna iita harge yeddana.60Kase Gibxe asaa bolla be7ada, ne yayyida Gibxe harge ubbaa zaaridi ne bolla ehana; he hargey nena yeddenna.61Gujidika, ha higge maxaafan xaafetiboonna hargetanne gadota ubbaa ne dhayana gakanaw Goday ne bolla ehana.62Godaa, hinte Xoossa hinte si7onna ixida gisho, salo xoolintoda darida hintefe guuthi attana.63Goday, hintew lo77oba oothiya wodenne hinte tayboy dariya wode ufaytidaysada ha77i hinte bolla gado ehiya wodenne hintena dhaysiya wode ufaytana; hinte laattanaw biya biittafe shodetidi dhayana.64Goday nena ha gaxape ya gaxa gakanaw kawotethata ubbaa giddon laallana. Yan neeni woyko ne mayzati eronna hara mithinne shucha xoossata goyinnana.65He kawotethata giddon hinte shempo demmeketa; tohoy yedhiya bessika new deenna. Yan Goday new qofan kumida guugge, amon argaacida ayfenne ufaysi qanxida wozana immana.66Ne de7oy hirgan kumana; gallasinne qamma dagamaninne hayqo yashshan un7etada daana.67Ne wozanan kumida yashshaafenne ne ayfey be7iya palabaape dendoysan, wontiya wode neeni, “Awude qammandeesha” qassi qammiya wode, “Awude wontandesha” yaagana.68Ta nena, “Zaarada ha ogiyara baaka” gida ogiyara Goday nena zaaridi markaben guye Gibxe yeddana. Yan neeni aylle gidanaw ne morketas nena bayzanaw koyana, shin hintena aylleyanaw shammiya asi demmeketa.