ዛረ ማፃፋ27gof_etw

ኤባላን ደእያ ያርሾ በሳ

1ሄሳፈ ጉየ፥ ሙሰይነ እስራኤለ ጭማት አሳኮ፥ “ታኒ ሀች ህንተና ኪትያ ኪታ ናግተ።2ዮርዳኖሰ ሻፋ ፕናዳ፥ ጎዳይ ነ ፆሳይ ነዉ እምያ ቢታ ገልያ ዎደ ግታ ሹቻታ ኤሳዳ ኖራ ትያ።3ጎዳይ፥ ነ አዋታ ፆሳይ ነዉ እማና ግዳይሳዳ ማነ ኤስ ጎግያ ቢታ፥ ጎዳይ ነ ፆሳይ ነዉ እምያ ቢታ ነ ፕንያ ዎደ ሀ ህገታ ኡባ ሄ ሹቻታ ቦላ ፃፋ።4ኔኒ ዮርዳኖሰ ፕንዳ ዎደ ታ ነና ሀች ኪትዳይሳዳ ሀ ሹቻታ ኤባላ ዙማ ቦላ ኤሳዳ ኤንታ ቦላ ኖራ ትያ።5ሄ በሳን ጎዳስ፥ ነ ፆሳስ፥ ብራት ቦቾና ሹቻፈ ያርሾ በሲ ጊግሳ።6ጎዳስ፥ ነ ፆሳስ ያርሾ በሲ ማሰትቦና ሹቻፈ ኦ፤ እያ ቦላ ጎዳስ፥ ነ ፆሳስ ፁሳ ያርሾ ያርሻ።7እስፈተ ያርሹዋ ሺሻዳ ማሸ ጎዳ፥ ነ ፆሳ ስንን ኡፋይታ።8ሀ ህገታ በንታና መላ ኦዳ ሀ ሹቻታ ቦላ ቆንጨን ፃፋ” ያግስ።

ኤባላፐ ዎያ ባደ

9ሙሰይነ ሌወ ግድዳ ካህነት እስፈ አሳኮ፥ “እስራኤለ፥ ስእ ጋዳ ዎዛናፐ ስአ፤ ሀች ነ ጎዳ፥ ነ ፆሳ ደረ ግዳዳሳ።10ታ ሀች ነዉ እምያ ጎዳ፥ ነ ፆሳ አዋጆታ ናጋነ ኪተታ” ያግስ።11ሄ ጋላስ ሙሰይ አሳ ሀይሳዳ ያግድ ኪትስ።12“ህንተ ዮርዳኖሰ ፕንዳፐ ጉየ ጋርዛና ዙማ ቦላ ኤቅድ አሳ አንጃናይሳት፥ ስሞና፥ ሌወ፥ ይሁዳ፥ ይሳኮራ፥ ዮሰፋነ ብንያመ ኮቻታ።13ቃስ ኤባላ ዙማ ቦላ ኤቅድ አሳ ባዳናይሳት፥ ሮቤላ፥ ጋደ፥ አሴራ፥ ዛብሎና፥ ዳነነ ንፍታለመ ኮቻታ።14“ሌወት ባንታ ቃላ ቁ ኦድ፥ እስራኤለ አሳኮ ሀይሳዳ ያጎ።
15ጎዳ ስንን እፀትዳባ ግድያ ግሾ፥ ኩሸ ሂላንችጮይ ም ማስድ፥ ብራታ ሼሽድ ዎይኮ ሹች ቆፅድ ኦዳ ኤቃ ጌማን ጎይንያ ኦንካ ባደትዳይሳ ግዶ” ጊኮ፥ አሳ ኡባይ፥ “አምንእ” ያጎ።16“ባ አዋ ዎይኮ ባ አይዉ ካዉሽያ ኦንካ ባደትዳይሳ ግዶ” ጊኮ፥ አሳ ኡባይ፥ “አምንእ” ያጎ።17“ባ ሾሩዋ ዛዋ ሱግያ አስ ባደትዳይሳ ግዶ” ጊኮ፥ አሳ ኡባይ፥ “አምንእ” ያጎ።18“ቆቀይ ባናዉ በሲያ ኦግያፐ ሀራ ሶ ዛርያ አስ ባደትዳይሳ ግዶ” ጊኮ፥ አሳ ኡባይ፥ “አምንእ” ያጎ።19“በተ አሳ፥ ይኦ ናይታነ አምኤታ ፕርዳ ጌላይያ አስ ባደትዳይሳ ግዶ” ያግኮ፥ አሳ ኡባይ፥ “አምንእ” ያጎ።20“ባ አዋ ማችዉ ፃልድ፥ ባ አዋ ቦንቹዋ ቃርያ አስ ባደትዳይሳ ግዶ” ጊኮ፥ አሳ ኡባይ፥ “አምንእ” ያጎ።21“መሄራ ቱንያ አስ ባደትዳይሳ ግዶ” ጊኮ፥ አሳ ኡባይ፥ “አምንእ” ያጎ።22“ባ ምቾ ግድዳ አዋ ዎይኮ አየ ናኤራ ቱንያ አስ ባደትዳይሳ ግዶ” ጊኮ፥ አሳ ኡባይ፥ “አምንእ” ያጎ።23“ባ ማቸ አየራ ቱንያ አስ ባደትዳይሳ ግዶ” ጊኮ፥ አሳ ኡባይ፥ “አምንእ” ያጎ።24“አሰ ጌማን ዎያ አስ ባደትዳይሳ ግዶ” ጊኮ፥ አሳ ኡባይ፥ “አምንእ” ያጎ።25“ሚሸን ሻመትድ፥ ፅሎ አስ ዎያ አስ ባደትዳይሳ ግዶ” ጊኮ፥ አሳ ኡባይ፥ “አምንእ” ያጎ።26“ሀ ህገታ ናጎና አስ ባደትዳይሳ ግዶ” ጊኮ፥ አሳ ኡባይ፥ “አምንእ” ያጎ።
expand_more
Search