Aɛawed n Ccariɛa24rif_lti
Ijj n řḥař ifarzen n waǧaf
1“Xmi ɣa yawi ijj n weryaz ict n temɣart uca imřec akides uca war d as teɛjib umi dayes yufa ca n řefḍiḥet, uca xenni ad as yari tabrat n weǧaf, ad as tt iwc deg ufus nnes uca ad tt issufeɣ zi taddart nnes,2uca xenni teffeɣ nettat zi taddart nnes, truḥ uca tedweř d tamɣart ɣar ijj n weryaz nneɣni,3uca aryaz aneggaru icarh i-tt, ad as yari tabrat n weǧaf uca ad as tt iwc deg ufus nnes uca ad tt issekk zi taddart nnes, niɣ aryaz aneggaru nni i-tt yiwyen d tamɣart nnes, immut,4xenni war iɛeddeř i weryaz nnes amezwaru, wenni d as iṭellqen, ad tt yegg ɛawed d tamɣart i yixef nnes, awarni umi tᵉttwassexmej nettat, minzi man aya d jjɛifect zzat i wudem n SIDI. War iɛeddeř ad tessiwiḍ ddenb x temmurt i d ac iwca SIDI, AREBBI nnec, d řwart.”Tiweṣṣa i uḥeṭṭu x umqarreb5“Xmi ijj n weryaz tuɣa am imřec, xenni war itteffeɣ ca ak-d řɛeskar u war xas tᵉttwagg uřa d ict n tmesřact. Ad yiři ijj n useggʷas i taddart nnes waha u ad issfarḥ tamɣart nnes i yiwi i yixef nnes.”6“War iɛeddeř ad teksid iẓra n tsirt s tnayen d aḍman, niɣ aẓru nni zzaysen ittenhezzan waha, minzi aqa xenni ad yiři řeɛmar d aḍman.”7“Mařa ittwaf ijj n weryaz yucar ca n yijj zeg wawmaten nnes, zeg ayt n Israil, uca netta yarra i-t d ismeɣ uca izzenz i-t, xenni ad immet uceffar nni. Ittxeṣṣa ad tekksed řɣar zi řwesṭ nnec.”8“Xmi din teǧa jjriḥect n řbarṣ, ḥḍa ad teḥḍid u ad tegged nican ɛlaḥsab marra min d ac ɣa ssřemden ikehhanen Ilawiyyen. Ad teḥḍam maḥend ad teggem marra am mammec ten umureɣ.9Idar min igga SIDI, AREBBI nnec, ak-d Maryam deg webrid umi dd-teffɣem zi Miṣra.”10“Mařa tarḍřed ca i jjar nnec, xenni war ttidef ɣar taddart nnes ḥima ad zzayes teksid ca d aḍman i yixef nnec.11Ad teqqimed barra uca aryaz i umi tarḍřed ad ac dd-yawi ddiyyet ɣar barra.12Mařa tuɣa d aryaz d amezřuḍ, xenni war ttᵉttnusi deg werhan nnes amecnaw i yeǧa d tassut nnes.13Ad as dd-tarred ddiyyet nni nican ɣar uɣeǧi n tfuct, ḥima ad iṭṭeṣ di tassut nnes uca ad ac ibarek. Man aya ad ac tiři d tasegda zzat i wudem n SIDI, AREBBI nnec.”14“War sḥissfem acewwař ameḥdaj amezřuḍ zeg aytmac niɣ zeg ibarraniyyen i izeddɣen di temmurt nnec u daxeř i tewwura nnec.15Ad as tewced řmunet nnes kuř ass. War xas tɣeǧi tfuct x man aya, minzi netta d amezřuḍ uca immeẓri dayes, ḥima netta war ittřiɣi i SIDI di ssibbet nnec uca ad dayek yiři ddenb.”16“Ibabaten war ttwaneqqen di ssibbet n iḥenjiren nsen u iḥenjiren war ttwaneqqen di ssibbet n ibabaten nsen. Kuř ijj ad ittwaneɣ di ssibbet n ddenb nnes.”17“War sfarraɣ řeḥkam n ubarrani d uyujiř niɣ ad teksid arruḍ n tajjač d aḍman.18Ad tɛeqřed belli tuɣa cek d ismeɣ di Miṣra uca aqa SIDI, AREBBI nnec, ifdi cek ssenni. X uya necc ttumureɣ cek ad tegged man aya.19Xmi tmejjared ṣṣabet nnec deg iyyar nnec uca tᵉttud ca n tqebbiḍt deg iyyar, xenni war dd-tᵉddikkʷiřed maḥend ad tt teksid. Ad tiři d tasɣart i ubarrani, i uyujiř u i tajjač, ḥima ad cek ibarek SIDI, AREBBI nnec, di marra řxedmet n ifassen nnec.20Xmi ɣa tẓewḍed tacejjart nnec n zzitun, war ttic taynit ɛad i min iqqimen awarni ac. D man aya i ɣa yiřin i ubarrani, i uyujiř u i tajjač.21Awarni řami třeqḍed aḍiř n umarjeɛ nnec n uḍiř, war arezzu ad třeqḍed min iqqimen awarni ac ɛawed. Aqa man aya ad yiři i ubarrani, i uyujiř u i tajjač.22Ad tɛeqřed belli tuɣa cek d ismeɣ di temmurt n Miṣra. X uya necc ttumureɣ cek ad tegged man aya.”