Diutironomi17rug_wbt

1Kaqu va vukivukihi lani gamu koe Zihova sa nada Tamasa sari na bulumakao na sipi saripu loke ari kisakisadi tinidi; gua asa si qetu sisigiti nia e Zihova.2Be avoso nia gamu koa keke ri na mia vasileana sari kaiqa tie babe barikaleqe sapu lopu lulia se Zihova, meke va karia tu rini sa Nana vinariva egoi,3meke vahesia na nabulu ni rini si kaiqa tamasa kokohadi, babe na rimata na sidara, babe sari na pinopino saripu lopu ta hivae koasa tinarae te Tamasa, gua,4be avosi gamu sari na inavoso gua arini, si mi viliti valeani. Meke be hinokara sa kinaleana hie sapu ta evaṉa pa popoa Izireli,5si mi tuqea sa tie, mi turaṉa la nia pa sadana sa vasileana, mi gona va mate nia patu gana.6Kaqu karua babe soku tie va sosode si kaqu vivinei vura nia, sapu sea sa tie, meke kaqu tava mate si asa, ba lopu kaqu tava mate si asa be kekeke mo sa tie va sosode si tozia sapu sea si asa.7Sari na tie va sosode, si kaqu gona kenu nia patu si asa. Meke tiqe doduru tie; pa siraṉa gua asa si kaqu tava beto sa tinavete kaleana pa korapa mia gamu.8Koari kaiqa tinasuna pa vinaripitui si hoke tasuna sisigiti koari na tie varipitui pa popoa pude vizatia sa hinokara meke sapu kokoha, sapu guari na tinasuna guana tinago pepeso na linetelete, babe na vinari seke va bakorai, babe na vinotikaena pa vari korapana sa vina mate tie pa kinuhana, meke sapu lopu rovea ba tava mate hoboro. Pana ta evaṉa sapu gua asa, si mamu la koasa vasina hopena tana vinahesina e Zihova sapu ta vizata koe Zihova sa nada Tamasa;9mi paleke la nia sa ginugua koari na hiama koasa butubutu Livae. La koasa tie varipitui sapu tavetavete pa totoso sana, pude vilitia sa mia ginugua.10Kote poni gamu rini sa dia vinizata, meke gamu si kaqu tavete kekeṉoṉo gua puta tugo sapu tozini gamu rini.11Gamu si kaqu va tabei sari na dia vinizata meke luli betoi sari doduru dia vina tumatumae.12Asa sapu va karia sa tie varipitui babe sa hiama sapu turu pa kenuna Zihova sa nada Tamasa koasa nana tinavete, si kaqu tava mate; pa siraṉa gua asa si lopu kaqu koa sa kinaleana hie pa popoa Izireli.13Pana avoso nia ri doduru tie sapu gua asa, si kote matagutu si arini, meke loke tie pule si kaqu hiva tavete gua asa.

Vina Tumatumae pa Guguana sa Baṉara

14Pana vagia meke koa ia gamu sa popoa sapu kaqu poni gamu e Zihova sa nada Tamasa, si kote okoro hiva vizatia gamu si keke nada baṉara, kekeṉoṉo gugua ri doduru butubutu pa vari likohaeda.15Kaqu balabala valeania gamu, pude sa tie vizatia gamu pude nada baṉara, si gua putaputa tugo asa sapu ele vizatia Zihova. Kaqu na turaṉada soti si asa; lopu kaqu keke tie karovona si kaqu va baṉaria gamu.16Lopu kaqu vagi va soku hose sa baṉara, meke lopu kaqu garunu pule la tie pa popoa Izipi si asa pude holu va soku hose. Ura ele zama nia Zihova, sapu namu lopu kaqu pule la vasina sari Nana tinoni, gua.17Meke lopu kaqu vagi va soku barikaleqe sa baṉara, ura koasa hahanana gua asa, si kote paqaha taloa koe Zihova sa bulona sa baṉara; meke lopu kaqu vagi va soku siliva na qolo si asa.18Pana habotu si asa koasa nana habotuana baṉara, si kaqu kuberia sa si keke nana buka tinarae te Tamasa, sapu koa koari na kinubekubere kekenu sapu ta kopue koari na hiama pa butubutu Livae.19Kaqu veko kapae nia sa koasa sa buka meke tiroa sa pa doduru nana tinoa, meke kaqu tumae nia sa pude pamaṉa nia se Zihova sa nana Tamasa, meke va tabei na kopu valeana ni sari doduru tinarae na vina tumatumae tanisa.20Lopu kaqu balabala ia sa sapu asa si leana holani sari na tie Izireli turaṉana, meke lopu kaqu makudo va tabea sa sa vina tumatumae na tinarae te Zihova. Meke kaqu koa baṉara pa soku vuaheni si asa, meke sari na tutina si kaqu koa baṉara nia sa popoa Izireli koari na sinage na sage.
expand_more
Search