Daniela4rug_wbt

Vina Rua Pinutagita te Nebukaneza

1Na zinama tanisa Baṉara Nebukaneza la koari na tinoni, butubutu, meke sari tiedi ri doduru vinekala, pu koa pa doduruna sa kasia popoa:
Mi koa tagotago nono la tu si gamu!
2Qetu si arau pude tozi koa gamu sari vina gilagila meke na tinavete variva magasa sapu tavete mae ni sa Tamasa Ululuna Hola koa rau.3Nake noma hola sari Nana vina gilagila,nomadi hola sari Nana tinavete variva magasadi!Sa Nana butubutu baṉara si na butubutu baṉara sapu koa hola ninae rane;sa Nana binaṉara si turu hola pa doduru sinage na sage.4Arau, Nebukaneza, si koa qua pa qua vetu baṉara; qetuqetu qua meke tagotago qua.5Ba kamo si keke pinutagita sapu va matagutu au. Sipu korapa eko puta rau pa qua teqe, si dogori rau sari kineha na dinogodogorae sapu va matagutuqu.6Ke garuni rau sari doduru qua tie totoli pa Babiloni pude mae pa kenuqu pude rupaha mae nia koa rau sa pinutagita asa.7Totoso mae sari na tie korokorotae, na matemateana, na tie tiro pinopino, si tozini rau koa rini sa pinutagita, ba lopu boka rupaha mae nia tu rini koa rau.8Vina betona si mae se Daniela koa rau meke tozi nia rau sa pinutagita. Keke pozana si e Belotesaza, ta poza luli koasa qua tamasa, meke sa maqomaqo tadi na tamasa hopedi si koa pa korapana sa.9Zama si arau, “Belotesaza, palabatu tadi na tie korokorotae, gilania rau sapu sa maqomaqo tadi na tamasa hopedi si koa pa korapamu agoi, meke loketoṉa sapu tomedi si tasuna koa goi. Hie sa qua pinutagita. Mu va rupaha mae nia koa rau sa ginuana.10Hire sari dinogodogorae sapu dogori rau sipu korapa eko puta rau pa qua teqe: Doṉo la si arau, meke koa nana pa kenuqu si keke huda pa kokorapana sa popoa. Sa ululuna si hola sisigiti.11Toqolo va noma hola sa huda meke ṉiṉira meke sa batuna si tiqu sage la pa galegalearane; meke dogoro betoa mo ri doduru hukihukirina sa kasia popoa si asa.12Sari elona sa si leleadi hola meke sari vuana si soku hola, meke doduru tie si boka hena mo koa sa. Pa kauruna si aqoro sari kurukuru pinomo meke koari lelaṉana si tavete vori sari kurukuru tapuru; doduruna sa kasia popoa si hena mo koasa.13Koasa pinutagita sapu dogoria rau sipu korapa eko puta rau pa qua teqe, si doṉo la si arau, meke koa nana pa kenuqu si keke tie paleke inavoso, na tie hopena, gore mae guana pa maṉauru.14Velavela va ululae sisigiti si asa, ‘Maho gore nia sa huda, mamu rakoti sari lelaṉana; vagi pani sari elona, mamu va hurakatae i sari vuana. Va goveti sari kurukuru pinomo pa kauruna sa meke gua tugo sari kurukuru tapuru pa lelaṉana.15Ba vekoi sari karosona meke dadagana; pusi ni aeana meke boronizi, vekoi mani koa pa pepeso, koari na duduli pa pezara. Vekoa si asa, mani bobosia na puni pa maṉauru; vekoa mani koa turaṉi sari kurukuru pinomo meke sari linetelete pa popoa pepeso.16Vekoa mani ta hobe sa binalabala tanisa, mani ta poni nia sa sa binalabala tadi na kurukuru pinomo, osolae hola koasa sari ka zuapa vuaheni.17Sa binalabala tava egona si ta tozi vura koari na tie paleke inavoso, sari tie hopedi tozi vura nia sa vinizata hie, pude tumae nia ri na tie toadi sapu sa Tamasa Ululuna Hola si baṉarani sari na butubutu baṉara tadi na tie meke poni Sa si arini pu hiva poni Sa meke va palabatu i Sa koa rini sari pu lopu hite arilaedi pa tie.’18Hierana sa pinutagita taqarau, arau baṉara Nebukaneza. Ego, Belotesaza tozi nau, na sa si guni nia sa, ura lopu keke koari na tie gilagilana pa qua butubutu baṉara boka rupaha poni nau. Ba agoi kote boka mo, sina sa maqomaqo tadi na tamasa hopedi si koa pa korapamu agoi.”

Rupahia Daniela sa Pinutagita

19Ba nunala se Daniela sapu Belotesaza keke pozana pa totoso asa, sari nana binalabala va matagutu ia. Ke zama sa baṉara, “Belotesaza, mu lopu va malumia sa pinutagita babe sa laena sa pude va matagutu igo.” Olaṉa se Belotesaza, “Qua baṉara, be tadi na mua kana sa pinutagita hie babe tadi na tie pu kukiti nigo, be leana!20Sa huda sapu dogoria goi, sapu toqolo va noma meke ṉiṉira, meke sa batuna si tiqu la pa galegalearane, meke ta dogoro pa doduruna sa popoa pepeso,21sari elona si leleadi meke katakata sari vuana; poni ginani sa sari doduru, va aqori sa sari na kurukuru pinomo pa pezara, meke sari lelaṉana si tavete ni vori ri na kurukuru tapuru,22baṉara, agoi mo sa huda asa! Agoi si na baṉara lavata meke ṉiṉira; sa mua vinalavata si kamo la pa galegalearane, meke baṉara ni goi sari doduru kamo la koari na vasidi pa seu koasa kasia popoa.23Kei baṉara, agoi dogoria sa tie paleke inavoso, sa tie hopena, gore maena pa maṉauru meke zama, ‘Maho gore nia sa huda mamu huara pania, ba vekoa mani koa ta pusi pa aeana meke boronizi sari dadagana, koari na duduli pa pezara, ba sari karosona si kaqu koa hola pa pepeso. Vekoa si asa mani bobosia na puni pa maṉauru; mani koa guana kurukuru pinomona si asa, osolae hola si ka zuapa vuaheni.’24Kei baṉara, ego, hiera gua sa rinupahana sa, meke hie sa inavoso sapu va vura ia sa Tamasa Ululuna Hola, la koasa qua palabatu sa baṉara.25Kote ta hadu vura si agoi koari na tie meke kote koa turaṉi goi sari na kurukuru pinomo; kote hena duduli si agoi guana bulumakao meke kote bobosigo na puni pa maṉauru. Ka zuapa vuaheni si kote hola gua osolae tumae nia goi sapu Sa Tamasa Ululuna Hola si Baṉara holani sari na butubutu baṉara tadi na tie meke vari poni lani Sa koarini pu hiva poni Sa.26Sa laena sa ginarunu pude vekoa sa dadagana sa huda turaṉae sari karosona, si sa mua butubutu baṉara si kote ta poni pule nia goi pana guana helahelae nia goi sapu sa Tamasa si Baṉara nia sa kasia popoa.27Kei baṉara, gua ke mu va tabei sari qua vinari tokae pa binalabala: Veko pani sari mua sinea, mamu taveti gua sapu toṉoto; veko pani sari mua hahanana kaleadi, mamu tataruni saripu ta ṉoṉovala. Hokara pude gua asa si kote hoda la sa mua tinoa ravutuna.”

Gorevura sa Pinutagita

28Sari doduru hire si ta evaṉa beto koe baṉara Nebukaneza.29Ka manege rua vuaheni mudina asa, si enene sa baṉara pa batu vetu koasa vetu baṉara pa Babiloni,30meke zama si asa, “Vea, lopu hie tu sa Babiloni nomana sapu kuria rau pa qua ṉiniraṉira nomana pude na popoa tanisa baṉara, meke pude na tinolava tanisa qua binaṉara?”31Sari zinama si korapa koa pa beruna totoso kamo mae mo si keke mamalaiṉi pa maṉauru, “Hiera gua sa zinama pa guguamu agoi, baṉara Nebukaneza: Sa mua binaṉara si kamahire ta vagi palae koa goi.32Kote ta hadu vura koari na tie si agoi meke kote koa turaṉi goi sari na kurukuru pinomo; kote hena duduli gua ri na bulumakao si agoi. Ka zuapa vuaheni si kote hola gua meke tiqe kote tozi vura nia goi sapu sa Tamasa Ululuna Hola si baṉara ni sari doduru butubutu baṉara tadi na tie meke Asa poni lani koarini pu hiva poni Sa.”33Meke pa totoso tugo asa si tava gorevura gua sapu ta zamae pa guguana Nebukaneza. Ta hadu taloa si asa koari na tie meke hena duduli guana bulumakao si asa. Sa tinina si boboso koasa puni pa maṉauru osolae sari kaluna si toqolo guana kalu atata meke sari visuvisuna si guana kakarutu nenedi ri na kurukuru tapuru.

Vahesia Nebukaneza sa Tamasa

34Pa vina betona sa totoso asa, si arau, Nebukaneza, si va eṉa sagei sari mataqu pa maṉauru, meke pule mae sa ginilae koa rau. Meke vahesia rau sa Tamasa Ululuna Hola. Va lavatia rau meke vahesia rau si Asa sapu toa hola ninae rane.Sa Nana binaṉara si na binaṉara sapu koa hola;sa Nana butubutu baṉara si koa ṉiṉira pa sinage na sage.35Doduru tiena sa popoa pepesosi loketoṉa mo guni ni Sa.Tavetia Sa gua sapu hiva nia Sakoari na mateana pa maṉaurumeke koari na tiena sa popoa pepeso.Loke tie kote boka tuqe pule nia sa limanababe zama la koa Sa: “Na sa si tavetia Goi?”36Pa totoso tugo asa si pule mae sa qua ginilae, sa qua vina lavata meke tinolava si tava pule mae koa rau koasa vina lavatana sa qua butubutu baṉara. Hata vagi pule nau ri na qua tie totoli na palabatu meke tava habotu pule si arau koasa qua habohabotuana baṉara meke tava ṉiṉira hola la tu si arau, hola nia sapu tatasana.37Ego arau, Nebukaneza, si vahesia meke va lavatia meke va ululia sa Baṉara pa Maṉauru, sina doduru tiṉitoṉa sapu taveti Sa si toṉoto, meke viliviliti va toṉoto si Asa doduru totoso. Meke arini pu ene pa vinahesi pule si boka va pepekae i Sa.
expand_more
Search