Read عَامُوسْ 9

عَامُوسْ9rif_ati

ثَامژْرِيوْثْ وِيسّْ خمْسَا: ڒْحُوكْمْ أَنڭَّارُو

¹”نشّْ ژْرِيغْ سِيذِي إِنُو إِبدّْ غَارْ ؤُعَالْطَارْ، إِنَّا: ’وّثْ خْ ؤُزدْجِيفْ ن ؤُپِيلَارْ، أَڒَامِي إِ غَا أَرْجِيجنْثْ ثْنبْذَاثِينْ ؤُ أَرْژْ إِ-ثنْثْ ذ إِوثْوِيثنْ خْ ؤُزدْجِيفْ نْسنْ مَارَّا. مِينْ زَّايْسنْ إِقِّيمنْ، أَذْ ث نْغغْ س سِّيفْ. وَارْ زَّايْسنْ إِتّْرِيكّْوِيڒْ ؤُڒَا ذ إِجّْ ن ؤُمَارْوَاڒْ ؤُ ؤُڒَا ذ إِجّْ ونِّي إِنجّْمنْ، أَذْ إِتّْوَافكّْ.²وَاخَّا نِيثْنِي غْزِينْ أَڒَامِي إِوْضنْ غَارْ ثْمسِّي ن ڒَاخَارْثْ، أَفُوسْ إِنُو أَذْ ثنْ سّنِّي يَاوِي، ؤُ وَاخَّا نِيثْنِي ڭعَّاذنْ غَارْ ؤُجنَّا، نشّْ أَذْ ثنْ د سّنِّي سّهْوِيغْ،³وَاخَّا نِيثْنِي سّْنُوفَّارنْ إِخفْ نْسنْ خْ ثْقِيشَّاثْ ن وذْرَارْ ن كَارْمِيلْ، نشّْ أَذْ أَرْزُوغْ ؤُ أَذْ ثنْ د-أَوْيغْ سّنِّي. وَاخَّا نِيثْنِي سّْنُوفَّارنْ إِخفْ نْسنْ زَّاثْ إِ ثِيطَّاوِينْ إِنُو خْ ثِيسِي ن ڒبْحَارْ، خنِّي نشّْ أَذْ وصِّيغْ أَفِيغَارْ مَاحنْذْ أَذْ ثنْ إِزْعفْ،⁴ؤُ وَاخَّا نِيثْنِي ؤُيُورنْ ذِي ثْمحْبَاسْثْ زَّاثْ إِ وُوذمْ ن ڒْعذْيَانْ نْسنْ، نشّْ أَذْ وصِّيغْ ذِينِّي سِّيفْ مَاحنْذْ أَذْ ثنْ إِنغْ. نشّْ أَذْ خَاسنْ نْضَارغْ ثِيطّْ إِنُو إِ ڒْغَارْ، وَارْ إِدْجِي إِ ڒْخَارْ.⁵سِيذِي إِنُو، سِيذِي ن ڒْعسْكَارَاثْ، نتَّا ذ ونِّي إِتّْحَاذَانْ ثَامُّورْثْ، أَڒَامِي ثنْهزّْ ؤُ مَارَّا إِمزْذَاغْ نّسْ شضْننْ. ثتّْڭعّذْ ثْمُونْ أَمْ يغْزَارْ ن نِيلْ ؤُشَا ثتَّاڒِي ثْهكّْوِي أَمْ يغْزَارْ ن مِيصْرَا.⁶نتَّا ذ ونِّي إِبنَّانْ إِخَّامنْ نّسْ سنّجْ ذڭْ ؤُجنَّا ؤُ إِتّڭّْ ڒْقُوبّثْ نّسْ خْ ثمُّورْثْ، نتَّا ذ ونِّي إِتّْڒَاغَانْ إِ وَامَانْ ن ڒبْحَارْ ؤُشَا إِتّْفَارّغْ إِ-ثنْ خْ وُوذمْ ن ثمُّورْثْ، سِيذِي ذ إِسمْ نّسْ.⁷مَا كنِّيوْ وَارْ ثدْجِيمْ إِنُو أَمْ أَيْثْ ن كُوشْ، أَ أَيْثْ ن إِسْرَائِيل؟، إِقَّارْ سِيذِي. مَا نشّْ وَارْ د-سُّوفّْغغْ إِسْرَائِيل زِي مِيصْرَا ؤُ إِفِيلِيسْطِينِييّنْ زِي كَافْثُورْ ؤُ أَرَامْ زِي قِيرْ؟⁸خْزَارمْ، ثِيطَّاوِينْ ن سِيذِي إِنُو، سِيذِي، أَقَا أَثنْثْ ضِيدّْ إِ ثْڭلْذِيثْ ثَامذْنُوبْثْ. نشّْ أَذْ ت ثحِّيغْ زڭْ وُوذمْ ن ثمُّورْثْ. نشّْ مَاشَا وَارْ تّحِّيغْ مَارَّا ثَادَّارْثْ ن يَاعْقُوبْ، إِقَّارْ سِيذِي.⁹مَاغَارْ خْزَارمْ، نشّْ أَذْ ؤُمُورغْ ؤُ أَذْ زّڒْزغْ ثَادَّارْثْ ن إِسْرَائِيل جَارْ مَارَّا ڒڭْنُوسْ، أَمْ مَامّشْ زّڒْزنْ زَّارِيعثْ ذڭْ إِجّْ ن بُو-سِييَّارْ ؤُ وَارْ ثْوطِّي ؤُڒَا ذ إِشْثْ ن ثْحبُّوشْثْ غَارْ ثمُّورْثْ.¹⁰مَارَّا إِمذْنَابْ ن ڒْڭنْسْ إِنُو أَذْ تّْوَانْغنْ س سِّيفْ، إِنِّي إِقَّارنْ: ’ڒْغَارْ وَارْ ذ أَنغْ إِڒقّفْ شَا ؤُ وَارْ غَارْنغْ د-إِتّْقَارِّيبْ شَا زِي مَارَّا إِغزْذِيسنْ!‘ “

¹¹”ذڭْ وَاسّْ نِّي أَذْ سّْڭعّْذغْ عَاوذْ ثَاخْزَانْثْ إِوطَّانْ ن ذَاوُوذْ إِ إِوْضَانْ ؤُ نشّْ أَذْ قّْنغْ ثِيزَّا نّسْ ؤُ مِينْ زَّايسْ إِتّْوَاهذْمنْ، أَذْ ث أَرّغْ غَارْ ومْشَانْ نّسْ ؤُ نشّْ أَذْ ث بْنِيغْ عَاوذْ أَمْ ذڭْ وُوسَّانْ ن وشْحَاڒْ ؤُيَا،¹²مَاحنْذْ نِيثْنِي أَذْ وَارْثنْ مِينْ إِقِّيمنْ زِي إِذُومْ ذ مَارَّا ڒڭْنُوسْ إِ خْ إِتّْوَابَارّحْ س يِيسمْ إِنُو، إِقَّارْ سِيذِي ونِّي إِتّڭّنْ مَارَّا أَيَا.¹³خْزَارمْ، أَذْ د-أَسنْ وُوسَّانْ، إِقَّارْ سِيذِي، أَقَا ونِّي إِشَارّْزنْ أَذْ خَاسْ د-إِحَارْثْ ونِّي إِمجَّارنْ، ؤُ ونِّي إِڒبّْزنْ أَضِيڒْ س إِضَارنْ أَذْ خَاسْ د-إِحَارْثْ ونِّي إِسّْوِيژّْضنْ أَفُوسْ أَكْ-ذ زَّارِيعثْ، ؤُ إِذُورَارْ أَذْ تُّوشْرُورنْ س بِينُو ژمّنْ ث جْذِيذْ، ؤُ مَارَّا ثِيوْرِيرِينْ أَذْ سّفْينْثْ.¹⁴نشّْ أَذْ سّنْقڒْبغْ ثَامحْبَاسْثْ خْ ڒْڭنْسْ إِنُو إِسْرَائِيل ؤُ نِيثْنِي أَذْ بْنَانْ عَاوذْ ثِيندَّامْ إِ ثُوغَا إِتّْوَاهذْمنْ ؤُ أَذْ ذَايْسنْثْ زدّْغنْ ؤُ نِيثْنِي أَذْ ڭّنْ إِمَارْجَاعنْ ن ؤُضِيڒْ أَذْ ذَايْسنْ ژُّونْ ثِيزَايَارِينْ ؤُ أَذْ زَّايْسنْثْ سْونْ بِينُو، أَذْ ڭّنْ إِحْوِيشنْ أَذْ شّنْ ڒْغِيدْجثْ نّسْ.¹⁵نشّْ أَذْ ثنْ ژُّوغْ ذِي ثمُّورْثْ نْسنْ ؤُعمَّارْصْ عَاذْ أَذْ تّْوَاقڒْعنْ زِي ثمُّورْثْ نْسنْ نِّي إِ ذ أَسنْ وْشِيغْ، إِقَّارْ سِيذِي، أَربِّي نّشْ.“

عَامُوسْ 9 / rif_ati

ثَامژْرِيوْثْ وِيسّْ خمْسَا: ڒْحُوكْمْ أَنڭَّارُو

عَامُوسْ9rif_ati