'Amuxi9hch_wb2

'Auxɨwirieka kemɨtiunierixɨ

1Hikɨ Ti'aitame nekaniuxeiya mawari taiyame 'aurie 'uweme, mɨkɨ mɨpaɨ kaniutayɨni:«Keneutihutsuna memanutakɨkatsie mituikatɨkamuwatayuanikɨ,wahetsie mɨkaxɨrienikɨ 'etsipepetɨ.Kemɨ'ane memuyuhayewa 'ixiparakɨ nekaniwakwimɨkɨ.Xewitɨ pɨkayuta'una,nixewitɨ 'ayenieretɨ pɨkayuhayewa.2Tsepa mɨki teukiyata 'upaitɨ memɨyuti'awietaxɨ,muwa nepɨwaratihapani.Tsepa muyuawitsie paitɨ memanutikɨ,manata nepɨwarakaxɨrieni.3Tsepa Kaximeru hɨriyaritsie memuyuti'awietaxɨ,mana nepɨwatiwauni nepɨwatiwiya.Tsepa menetsimakatɨ haramara tetɨatapai memɨyuti'awietaxɨ,mana kuu nepɨta'aitɨani mɨwatikenikɨ.4Tsepa mɨwaraye'unie mɨwarehapa xeikɨa,mana nepɨtita'aita 'ixiparakɨ memɨkwi'iwakɨ.'Axanewayurienike meta 'aixɨa nemɨkawayuriekakɨ,nepɨwaxeiyani».
5Yawé naimekɨmɨyɨwe, Naimekɨmɨtɨrɨkaɨye,kwie kanikumaɨwani, mɨkɨ kaneukupenikeni.Kanitiyeikani meta kanikayeikani kwieNiru hayari hepaɨ, 'Ekipitu muyeka,meta mana memɨteye'uwa meyuhiwerietɨ mekanakɨkani.6Kakaɨyari yuparatsiyu kaniutawewieni muyuawitsiemeta kwiepa tsutɨmeyari kaniutsutɨani,haa haramaratsie mieme kaniutahɨawenihikɨ kanitayeuriwani kwiepa:Yawé katinitewaka.
7«Yawé mɨpaɨ kanaineni:'Ixaheritsixi, ¿tamɨ xemenehetsiemieme 'etiupetsixi wahepaɨ xekate'ane?¿Tamɨ 'ixaheritsixi 'Ekipitu nekatiwarayewitɨ,Kɨretatsie piritsiteutsixi wakwiepa,meta Kixi tsiriyutsixi wakwiepa nekatiwarayewitɨ?8'Ayumieme Yawé naimekɨmɨyɨwe'ena kwiepa 'axakemɨtiyɨane kanitaniereni.Nekaniwarakumaweriyamɨkɨ kwiepa Kakuwu nuiwarimama,tsepa yunaime nekawaruyuri,»Yawé mɨpaɨ kanaineni.9Nekatinita'aitamɨkɨ 'ixaheritsixi memɨtikatsienikɨyunaime nuiwarite watsata,xiekari manuyekatsieni hepaɨ tikatsemetsie,xewitɨ tete kapitɨarietɨ kwiepa mɨkaweni.10'Ixiparakɨ mekanikwi'iwakuniyunaitɨ 'axamemɨteyurie neteɨterima,yunaitɨ mɨpaɨ memutiyuane:“Tame mɨkɨ 'uximatɨarika tahetsie pɨkanuanihatsuaku tɨma tahetsie pɨkaye'ani”.

'Ixaheri kemɨtihekwatɨarieni

11»Mɨkɨ tukaritsie nekanenukuketɨamɨkɨRawiri kiiya matiwe.Kemɨtiukatsitsini 'aixɨa nekaniyurimɨkɨ,mɨti'u'uni 'aixɨa nekatinitiyurimɨkɨ'aixɨa nekatinitiyurimɨkɨ meripaitɨ kemɨti'anenekai,12mɨkɨ wapiini katinayeimɨkɨ 'Erumi mɨtiyuhayewameta hipame nuiwarite memɨnetsimate,»Yawé mɨpaɨ kanaineni, mɨpaɨ katiniyurimɨkɨ.13»Yawé mɨpaɨ kanaineni: Tukari kanamieni,kemɨ'ane mukwietsanane mɨ'itsanane kananuku'aximɨkɨmeta kaxie mɨketsinane, mɨ'ene panuku'axe.Naitɨ hɨritetsie winu makaka paneikatɨkani,naitsarie mayeweweritsie puhapaneni.14'Aixɨa nekaniwayurimɨkɨ neteɨterima 'ixaheritsixi, tawarita nekaniwa'atɨamɨkɨmɨkɨ kiekarite mu'u'uni 'aixɨa mekanitiyuriekunimana mekanikutekuni.Kaxie mekanika'ekuni meta winuyari mekani'iekakuni,yuharaweri mepexeiyani meta mana mɨtiukaxuxuawereni mepɨtekwaka.15'Ixaheri yukwietsie nepɨka'iteɨta,para hatsuakuri mɨkahahunarienikɨ yukwieyaritsie nemiyetuiritsie»,Yawé 'akakaɨyari mɨpaɨ kanaineni.
expand_more
Search