Teera Ayfey Kumida Daacho
1Ubbaa Haariya Goday tana hara qoncethi bessis; hessika, teera ayfey kumida daacho bessis.2I taako, “Amoxe, neeni ay be7ay?” yaagidi oychis. Taani, “Teera ayfey kumida daacho be7ayis” yaagas. Goday taako, “Ta asaa Isra7eele wursethay gakis; hizape guye taani enta seeronna aggike” yaagis.3Ubbaa Haariya Goday, “He gallas kawo keethan yexiya yethay yeehon laametana; asa ahi dumma dumma bessan wodhana; yeehoy waasoy bayna si77i gidi yegetana” yaagees.4Hinteno, metootanchota un7etheysato, biittan de7iya manqota dhaysanaw koyeysato, haysa si7ite!5Hinte, “Nuuni kathaa bayzanaw ageena xeero ba7aaley awude aadhane! Qassi nuuni nu zal7iya doomanaw Sambaati awude aadhane! Nuuni kathaa guuthaban makidi, daro miishen bayzana. Qassi wordo mizaanen asaa cimmana.6Manquwa biran, metootanchuwa waatha caamman shammana; qassi harqo giste muruuto giste gaten bayzana” yaageeta.7Yayqoobi iya sunthan ceeqetiya Goday, Xoossay, haysada yaagidi ba huuphen caaqis: “Taani enti oothida iita ooso ubbaa dogike.8Hessa gaason biittay yarkees; asa ubbay yeekees. Nayle shaafay kixidi keyeysadanne wodheysada biitta ubbay qaaxananne simmi wodhana” yaagis.9Ubbaa Haariya Goday, “He gallas taani awa seeta gallas wulisana; gallasaa qamisana.10Taani hinte ufaysa baaliya azzanon, hinte yethaa yeehon laammana. Mexi issi na7i hayqin yeekiya asada, hinte hinte huuphiya meedetidi kayo ma7o ma7anada, hintena oothana. He gallasaa wursethay daro camo gidana” yaagees.11Ubbaa Haariya Goday, “Heko, taani biitta ubbaa bolla kosha yeddiya wodey yaana. He koshay kathi woyko haatha kosha gidonashin, si7anaw Godaa qaala dhayo kosha gidana.12Asay dolohape wuloha gakanaw, pudehape dugeha gakanaw woxeretana. Enti Godaa qaala koyanaw yaanne haanne woxana, shin demmokona.13He gallas yegelssa geela7otinne wolqaama panthati saamon piqi gaana.14Samaare eeqatara caaqidaysati, ‘Daana xoossay ero!’ yaageysati, ‘Barsaabe xoossay ero’ yaageysati kundana. Enti zaari dendokona” yaagees.