'Amuxi4hch_wb2

1'Ikɨ niuki xeme xekeneu'eni, wakaitsixi Watsani miemete,Tsamariya hɨriyaritsie xemu'uwa,haweri memɨ'anene xemɨwananaimameta tixaɨtɨ memɨkatehexeiya,yɨkɨnama mɨpaɨ xemɨtewakɨhɨawe:«Xeketatenahapaniri tepanu'ieni».2Yawé naimekɨmɨyɨwe mɨpaɨ kanaineni kemɨtipatsiekɨ:«Tukari kanaye'amɨkɨ xeme xenuiwaritsie, 'imatɨrieka miemekananuhaniemɨkɨ tepɨa 'utakeitsitɨarietɨ.3Kuraru haxawakaku xekananetɨariekuni yu'utɨa xeheu'utɨ,Heximuni hɨriyaritsie xekanitiyunitɨariekuni—Yawé mɨpaɨ kanaineni—.
4»Xekenehu Weteri mana 'axaxeketeneyurieka.Kirikari xekenehu manata yaxeikɨa 'axaxeketeneyurieka,ximeri xeketenemawatɨweni,meta hairieka tukaritsie tamamata hetsiemieme xeime xekeneyetuayani.5Paa mukuxanariyarie xekenetitaiyani pamɨpariyutsi mawariyari mɨhɨkɨtɨnikɨmeta hipame xeketeniwarutaxatɨa mawari memɨyetuanikɨ kememɨteyuwaɨriya.Yaxeketeneuyuri yunaitɨ 'ixaheritsixi yamemɨtehetimanikɨ,mɨkɨ xeme mɨxenakekɨ—Yawé naimekɨmɨyɨwe mɨpaɨ kanaineni—.

'Ixaheritsixi kememɨkateyuwaɨriya

6»Ne haaka nekaniutixuawitɨani naitsarie xekiekaritetsie,paa memɨkakwakakɨ yanepɨtiuyuri xemukutetɨkatsie.Mɨyatɨtɨ, xeme nehetsɨa xepɨka'u'axɨa—Yawé mɨpaɨ kanaineni—.
7»Ne yanepɨtiuyuri mɨkakawiyekɨkepauka meuyewekai 'akuxi haika metseri mɨtika'itsanatɨtsie.Xeime kiekariyaritsie pukawiyexɨ,xaɨtsieta hawaikɨ,xeime 'etsarita xeikɨa pukawiyexɨ,xaɨtsie pɨka'ukawiyexɨ, 'ayumieme pɨtiutiwa.8Hau'erietɨ mekaneu'uwakaitɨni tsepa kemɨ'ane kiekaritsie teɨteri haa mekuwautɨwetɨ,peru yaxeikɨa mepɨteheuharikukai.Mɨyatɨtɨ, xeme nehetsɨa xepɨka'u'axɨa—Yawé mɨpaɨ kanaineni—.
9»Wa'etsaripa 'utsikari wahekɨ nepɨwaru'uximatɨa meta mɨtitiwanikɨ,'utsikari naime mepɨteheukuxɨxɨa waharawerita meta kaxie memɨwa'etsatsie,wapiní meta wahuriwu.Mɨyatɨtɨ, xeme nehetsɨa xepɨka'u'axɨa—Yawé mɨpaɨ kanaineni—.
10»Waɨkawa 'uximatɨarika nepenɨ'a'Ekipitu hepaɨ.Temari 'aixɨa memɨ'anene 'ixiparakɨ nepɨwarukwi,wakawayutsixi yunaitɨ meputiwiyarie.Yanepɨtiuyuri yutsurita memi'ɨkwekɨmɨkite wa'ɨakariyari.Mɨyatɨtɨ, xeme xepɨkanetsihaye'eri—Yawé mɨpaɨ kanaineni—.
11»Ne nepɨxe'uka'unaxɨTsuruma meta Kumuxa hepaɨ,tɨɨyari xeikɨa xepuyuhayewaxɨ tai mihayewaxɨ hepaɨ.Mɨyatɨtɨ, xeme xepɨkanetsi'aye'eri―Yawé mɨpaɨ kanaineni―.
12»'Ixaheri, 'ayumieme hikɨta nepɨmetika'enitsitɨani,yanemɨtiyurienikɨ,'Ixaheri, keneyukuha'aritɨwani, 'akakaɨyari pemanunakekɨ».
13Ne nekanihɨkɨtɨni hɨri nemɨtiwewiwa,meta 'eka nemunenetɨwa,ne nekanihɨkɨtɨni tewi kemɨtiyurieni nemihekɨata,meta hekɨariya yɨriya nemunenetɨwa,meta kwie heima nemuyeika:Yawé Kakaɨyari Naimekɨmɨtɨrɨkaɨye nekatinitewaka.
expand_more
Search