እስራኤለይ ፆሳኮ ስምቤና
1ህንተኖ፥ ባሳነ ሚዛታዳ ሞዳ ሳማረ ማጫሳቶ፥ ሀይሳ ስእተ! ህንተ ማንቆታ ኡንኤታ፤ መቶታንቾታ ዋየታ። ህንተ አዝናታኮ፥ “ኑስ ኡሽ እምተ” ያጌታ።2ኡባ ሃርያ ጎዳይ ሀይሳዳ ያግድ፥ ባ ጌሻተን ጫቅስ፥ “ህንተ ማንፃቆን ኦይከትድ ጎሸታና ጋላስነ ህንተፈ አትዳ ጉት ማንፃቆን ኦይከትድ ብያ ሞሎዳ ሀናና ጋላስ ያና።3ህንተ ኡባይ ድርሳ ፆኤራ ጎሸትድ፥ ከይድ፥ አርሞነ ሆለታና” ያግስ ።4“ህንተኖ፥ እስራኤለ አሳዉ፥ቤተለ ብድ ናጋራ ኦተ፤ጋልጋላ ብድ ናጋራ ጉጅድ ኦተ።ዎንታ ዎንታ ህንተ ያርሹዋ ያርሽተ፤ሄን ጋላስ ጋላስ ህንተ አስራታ ኤህተ።5ህንተ ኦናዉ ዶሰይ ሄሳ ግድያ ግሾ፥እርሾ የግድ ኡክዳ ኦይ ፁግድ፥ ጋላታ ያርሹዋ ያርሽተ።ህንተ ህንተ ዶሳን እምያ እሙዋ ግሾ፥ ኦቶርትድ አዋጅተ” ያጌስ ኡባ ሃርያ ጎዳይ።6“ህንተ ካታማ ኡባን ታኒ ኮሻ የዳዳ፥ ሀር አቶሽን ህንተ አቻን ጋያባ ይሳስ፤ ሽን ህንተ ሄሳን ታኮ ስምበከታ።7ካ ጫክያ ዎደይ ጋካናዉ ቡሮ ሄ አጌን ደእሽን፥ ታኒ ህንተዉ እራ ተቃስ። ታኒ እስ ካታማን እራ ቡክሳዳ ሀራ ካታማን ቡኮናዳ ድጋስ፤ እስ ጎሻን ቡክስ፤ ሀራ ጎሻይ ቃስ እራ ይድ መልስ።8ሄሳ ግሾ፥ ናምኡ ዎይኮ ሄ ካታማ አሳይ ሃ ኡያናዉ እስ ካታማ ብዶሶና፤ ሽን አልቦኮና። ሄሳንካ ህንተ ታኮ ስምበከታ” ያጌስ ጎዳይ።9“ታኒ ህንተ ካ ቦላ ሀርገ የዳስ፤ ህንተ አታክልትያ፥ ህንተ ዎይንያ ህንተ ባላስያነ ህንተ ሻማሆ ኡባ ቦለይ ምስ፤ ሽን ህንተ ሄሳንካ ታኮ ስምበከታ” ያጌስ ጎዳይ።10“ታኒ ግብፀ አሳ ቦላ ጋዶ የድዳይሳዳ፥ ህንተ ቦላ ጋዶ የዳስ። ህንተ ፓን ናይታ ማሻን ዎስ፤ ህንተ ፓራት ድኤታና መላ ኦስ። ህንተ ሞ አሀ ፅንቆን ኡላስ፤ ሽን ህንተ ሄሳንካ ታኮ ስምበከታ” ያጌስ ጎዳይ።11“ሶዶመነ ጋሞራ ካታማታ ይስዳይሳዳ ህንተፈ ዳሮታ ይሳስ፤ ህንተ ታማፐ አትዳ ዱንቻ መላ፤ ሽን ሄሳንካ ህንተ ታኮ ስምበከታ” ያጌስ ጎዳይ።12ሄሳ ግሾ፥ “እስራኤለ አሳዉ፥ ታኒ ህንተና ሀይሳዳ ኦዳ ሴራና። ታኒ ህንተና ሀይሳዳ ኦዳ ሴራና ሀንያ ግሾ፥ እስራኤለ አሳዉ፥ ህንተ ፆሳራ ጋሄታናዉ ጊግተ” ያጌስ ጎዳይ።13ደረታ ጊግስዳይ፥ ጫርኮ መዳይ፥ባ ዎዛና ቆፋ አሳስ ቆንጭሰይ፥ጋላሳ ፖኡዋ ማን ላመይ፥ቢታ ቃ በሳታ ቦላ ሄመተይ፥እያ ሱንይ ጎዳ፥ ኡባፈ ዎልቃማ ፆሳ።