Read Amɔɔsi 3

Amɔɔsi3tbz_sim

Kuyie ncɑummɛ̀ ku kɔbɛ Isidɑyɛɛribɛ

¹Díndi Isidɑyɛɛribɛ kéntɛ́nɛ̀ mí ndi Yiɛ̀ nKuyie ndi nɑ́ɑ́ ntì, díndi n dènnɛní bɛ̀ Esibiti:²Ibotí imɔu miɛkɛ n tɑ̃ɑ̃tɛ́ dím̀bɛ,dɛɛ̀ te kɛ̀ n yóó yṹɔ̃́ ndi tomɛyɛi ndi dɔɔri mɛ̀ɛ̀ kó dimɑ̀ɑ̀ kpɛ́í.

Kuyie mpɑ̃ɑ̃nɑ́ɑǹtì nɑ́ɑǹtò bɑ́ɑ́ nɑ kɛ í mbɛ́i Kuyie nhò nɑ̀kɛ́ tì

³Kɛ̀ ti Yiɛ̀ nKuyie mbɛ́i nkɛ dɔ̀:Kɛ̀ bɛnìtìbɛ̀ bɛ̀dɛ́bɛ̀ í wɛ̃nnɛ́ dinùùbɛ̀ bo nnɛíɑ̀?⁴Dicìrícìrì ɔ̃ɔ̃ í nhũntɛ kutúúkù miɛkɛkɛ í yɑ̀ dì bo pĩ́ ndɛ̀.Dicìrícìrìbii bɑ́ɑ́ kuɔ́ nkutɑ̃dènkù miɛkɛkɛ í pĩ mmùmɑmù.⁵Tɛnɔ̀tɛ̀ í yóó sɔ̃́ntɛ́ kɛ́tɑ ticùɔ̀tì miɛkɛkɛ í yɑ̀ mudiì.Timɑ́tì í yóó sɔ̃́ntɛ́ kɛ́tɑ̃ũkɛ̀ dɛ̀mɑrɛ̀ í nɑ ti miɛkɛ.⁶Ditɑ̃tɛheù bo kuɔ́ ndihɛì miɛkɛ kɛ̀ kufɔ̃wɑɑ́mbɑ́ɑ́ pĩ́ mbɛnìtìbɑ̀ɑ̀?Mɛyɛi mbo tuɔ̀kɛní dihɛì mɑrìkɛ̀ ti Yiɛ̀ nKuyie nyí mɛ̀ duɔ́nnɑ́ɑ̀?

⁷Mí ndi Yiɛ̀ nKuyie nhɔ̃ɔ̃ í ndɔ̀ɔ̀ tìmɑtì kɛ í ketɛ́ kɛ duɔ́ nkɛ̀ m pɑ̃ɑ̃nɑ́ɑǹtì nɑ́ɑm̀bɛ̀ tì nɑ̀kɛ́.

⁸Kɛ̀ dicìrícìrì ũntɛwe mbo yĩ́ kufɔ̃wɑɑ́ nyí ò pĩ?Kɛ̀ ti Yiɛ̀ nKuyie nyĩ: Bɛ́i!We mbo ncĩ́ɛ̃́kɛ́ kɛ bɑ́ɑ́ bɛ́i nku pɑ̃ɑ̃nɑ́ɑǹtì?

Kuyie nnɑ̀kɛ́mɛ̀ Sɑmmɑrii ɛì yóó pɔntɛmɛ̀

⁹Kɛ̀ ti Yiɛ̀ nKuyie mbɛ́i nkɛ dɔ̀:Pĩɛ̃kɛ́nɛ̀ Asidɔti kó sikpɑ̀ɑ̀tìcɛ̃́ĩ nɛ̀ Esibiti kpɛsi,kɛ́duɔ́ nkɛ̀ bɛ̀ɛ tíí nSɑmmɑrii tɑ̃rɛ̀ ĩ́nkɛ̀,kɛ́yɑ̀ dikɔnkɔɔ̀nnì dìì bo o miɛkɛnɛ̀ bɛ fɛ̃́ũnko mɛ̀ɛ̀ botí bɛtɔbɛ̀.¹⁰Sɑmmɑrii ɛì kɔbɛ í dɔɔri dɛ̀ɛ̀ sìɛ́,bɛ̀ dɔ̀rimukɛ yoti bɛ kpɑ̀ɑ̀tìcɛ̃́ĩ miɛkɛ bɛ̀ fèkɛ dɛ̀.Mí ndi Yiɛ̀ nKuyie, mmíì mɛ nyɛ̃.¹¹Nɛ̀ dɛ kpɛ́í ndi dootitɔbɛ̀ yóó di cɛ̃tinnɛmukɛ́pɔntɛ di wɛ̃rímúkɛ́hɛí dɛ̀ɛ̀ bo di kpɑ̀ɑ̀tìcɛ̃́ĩ miɛkɛ.

Isidɑyɛɛribɛ bɛ̀ɛ̀ bo Sɑmmɑrii bɛ kó mɛdɛɛtímɛ̀ bo nyóù

¹²Dicìrícìrì ɔ̃ɔ̃ pĩ́ nfɛpìèfɛ̀kòo pecɛ̃nti fietɛ mɛ̀ɛ̀ botí yɛkpɑ́ɑ̀ nyoo ditoò kũ̀nnì,n yóó mɛ ndɛɛtɛ́ Isidɑyɛɛribɛ bɛ̀ɛ̀ bo Sɑmmɑriikɛ kɑri yɛkɑ̀rɛ̀ diɛyɛ̀ ĩ́nkɛ̀ yoo dɛ tɛ̃ĩ̀ mbìɛ̀.

Kuyie ncɑummɛ̀ Betɛɛdi ɛì kɔbɛ