1Anina ma Ananias awana Saphaira maiteni ai doa navanavana i gimarei.2Ma airuaḡa i vianina tagogi da mane navanavana i nuanei, ma Ananias mane navanavana i naiei da Apasol awari i terei.3Anina ma Peter tauna i vitaravirevirei, “Ananias aiwai aubaina Satan u vianinei da au oram i rui ma Arua Vivivireina u morui, ma doa u gimagimarei manena navanavana u nuanei?4Doa lamna tam ḡarimei da uta gimarei bo eḡa. Ma maranai u gimarei lamna manena tam ḡarimei da uta verenei, aiwai aubaina nota apoapoena au oram i rui? Tam eḡa rava awarina uta moru, wate God awarina u moru.”5Maranaina Ananias wei riwana i nononori, tauna i peu da iʼraḡe. Anina ma nelara i rui da tupuana i umai ma i naiei da i doboi. Ma aiavoi da wei riwana i nonori i rovo kaua.7Taui eḡa ita mae guratana, ora tonuḡa nanare ma awana i nei, aiwai i tupua eḡa ita aramanei.8Ma Peter wavine i paridadanei, “Abe uta riweu, tam awam Ananias maiteni doa o gimagimarei maiana anina wei bo?” Ma tauna i paribelei, “Ee, doa maiana anina nai.”9Ma Peter i riwa, “Aiwai aubaina taumi o vianina da Bada Aruana ota raudadani? Nelarai awam i dobodoboi ma inanai au metaeta da tam maiteni ina avara-opunem.”10Maratagogi wavine Peter au ae karena i peu da iʼraḡe. Maranai nelara i rui au numa ma i ʼnanai da wavine iʼraḡe, anina ma i avara-opunei da awana au ririvana i doboi.11Lamna maranaina ekalesia anatapui, ma rava aiavoi da wei riwana i nonori i rovo kaua.
Apasol rava maḡamaḡaui i vilawani
12Ma Apasol mataira ma aniba kauai maḡamaḡaui i kaukauei rava awari. Ma tauvitumaḡana Solomon ana au lovelove i vivitagogiei.13Wate rava ḡelaui ai au boru ruina i rovoei, wate rava taui i vivirana-kauei.14Wate nelara ma waivine maḡamaḡaui Iesu awarina i vitumaḡana ma tauvitumaḡana ai au boru i ruirui.15Ma lamna aubaina rava ai rava doridoriai i avavara-opunei au eta ma ai au animatave i vimataveni, da Peter inii ita vodadani bo eḡa da ḡouna taui ita ḡouni da ita lawana.16Ma melagai ḡelaui Jerusalem au ririvana ravai maḡamaḡaui ai rava doridoriai, ḡelaui arua-apoapoei i ruiruinia i neiai ma anatapui i vilawani.17Anina ma pirisi ḡeḡetelarana ma ana rava mai Sadusi anatapui orai unura i oai.18Ma Apasol i pani, ma panipani au numana i terei.19Wate waguvarai Bada ana anela i nei da panipani numana metaetana i votawanei, ma taui i taravaina-opunei ma i riwei,20“Ona rui tempol au orana, ona mairi ma lawana vouna riwana anatapuna rava ona pariverei.”21Anela i ririwei nanare, taui au tempol i rui ma rava viararamanai i vikarei. Nai maranai pirisi ḡeḡetelarana ana rava maiteni i ḡetai ma boru ḡaeḡaena e ḡoreḡorei Sanhedrin i terei. Ma rava i paritawanei au panipani numana da Apasol ita neiai awari.22Taui panipani au numana i ḡeta ma i baina-avei, ma i naeme da i vieḡa.23I pa, “Panipani numana anina i gudu-kauei, ma tauvipaipai au metaeta i maimairi; wate maranai tauai metaeta a votawanei lamna eḡa aiai kampa.”24Maranai tempol taupainina ai bada ma pirisi babadai wei riwana i nonori, taui i vinuanaina da aiwai i tupua.25Ma rava tagogi i nei ma i riwa, “Ona rautaniḡana! Nelara panipani au numana o teretereia, taui au tempol e maimairi ma rava e viviararamani.”26Anina ma tempol taupainina ai bada, ma babada ḡelaui maiteni i nae ma Apasol i neiai. Taui i rovo ma eḡa ita egari mepa da rava ḡaimei ita ravi.27Ma Apasol i neiai boru ḡeḡetelarana au naoi, ma pirisi ḡeḡetelarana taui i vitara-virevirei.28I pa, “A riwana-guratemi da wei ravana au wavana avena ota viararamana, wate ami viararamana i tua da Jerusalem i oai. Ma wei ravana tarana wavuna tauai o vereverelai.”29Ma Peter Apasol ḡelaui aubai i vitauvibabani i pa, “Tauai God ana voteletelei ma eḡa rava.30Taumi Iesu au korosi o tuparatui ma o viraḡeni, wate amamata ai God Tauna i vovaimairini.31Ma marina Tauna God au oiena e kiakiala, Tauna Bada ma Tauvilawana, Da mai Israel ai ḡoʼapoapoe ina rupeni, ma ai ḡoʼapoapoe ina nota-tawanei.32Ma tauai Arua Vivivireina maiteni wei kauai anatapui mataielai a inanai. Ma nanare God Arua Vivivireina i paritawanei rava votelatelai awari.”33Taui wei babanina i nonori ma amloi i ḡaiḡai kaua, ma i ḡoei da Apasol ita viraḡeni.34Wate Pharisi ma tarawatu badana wavana Gamaliel, rava anatapui wei ravana e vivivirei. Tauna Sanhedrin boruna au orana i mairi, ma rava i riwei da Apasol i opunei au doa mara aburuna ava.35Anina ma ana rava i riwei, “Mai Israel, ona inana kaua ma muriai da aiwai wei ravai awari ona kauei.36Mara tagogi oroto wavana Theudas viḡavia i vikarei ma i kauana-melei da tauna rava ḡaeḡaena, ma rava ai maḡa 400 nanare tauna i votaḡotaḡoi. Ma maranaina tauna i viraḡeni ana tauvotaḡotaḡo i vilamonei ma aiwai anatapuna kampa i kwa.37Wate tauna au murina oroto Galiliei wavana Judas i ḡeta, census au marana ma rava maḡamaḡaui tauna i votaḡotaḡoi, ma tauna maiteni i viraḡeni, ma ana tauvotaḡotaḡo i vilamonei.38Lamna aubaina a ririwemi da wei ravai ona voteretawanei! Mepa da taui ai nola ravei, amapo ina peu.39Wate mepa da Godei, taumi eḡa tagotagogina da wei ravai ona viḡaei, taumi mepa da God o viviḡaviei.”40Taui Gamaliel ana babani i voteletelei. Ma Apasol i riwei da i rui, ma i wipiei i kwapui ma i viḡaei da Iesu wavanei ina jima, ma i paritawanei da i nae.41Aubaina i aramanei da God taui i vinei da Iesu wavana aubaina ina vinuapoapoe. Anina ma Apasol ana nuaiaii Sanhedrin i opu-tawanei,42Taui mara patapatana tempol au orana ma au numa God riwana aiaina i raraugugulei ma i viviararamana da Iesu tauna Keriso.