Řexdayem n rrusul4rif_lti
Buṭrus d Yuḥanna zzat i Jmaɛet Tameqqrant n Wudayen
1Am tuɣa ssawařen awařen-a ak-d řgens, xeccen-dd xasen ikehhanen ak-d Iṣaduqiyyen d imeqqranen x Zzawect Tameqqrant,2minzi tuɣa xeyyqen xasen aṭṭas, maɣar nitni tuɣa sseřmaden řgens u ttbarrḥen tanukra zi taddart n imettinen s Lmasiḥ.3Ssarsen xasen ifassen uca ḥebbsen ten ař tiwecca nnes, minzi tuɣa tewḍa-dd tmeddit.4Aṭṭas zeg inni isřin awař-a umnen u řqedd n yeryazen yiweḍ-dd ɛřaḥař xemsa-ařaf.5Tiwecca nnes munen imeqqranen d imɣaren n řgens d imseřmaden n idlisen di Urcalim,6uřa d Ḥannan, arrays n ikehhanen, d Qayafa d Yuḥanna d Aliksandir d marra inni tuɣa dd-iqqarṣen zi řaǧ n imeqqranen n ikehhanen.7Umi ten ssbedden di řwesṭ, sseqsan ten: “S man jjehd niɣ s man isem i teggim aya?”8Řexdenni inna asen Cimɛun Buṭrus iccuren s Arruḥ Iqeddsen: “Sřem, a imeqqranen n řgens d imɣaren n taddart n Israil!9Mařa ass-a nettwaḥkem zzaywem x řxar i ittwaggen i umehřuc, s min zi idweř weryaz-a iggenfa,10ittxeṣṣa ad tessnem kenniw d marra řgens n Israil belli aryaz wanita ibedd zzatwem iṣeḥḥ s Yisem n Yasuɛ Lmasiḥ Nnaṣiri, wenni tṣellbem, maca wenni dd-issnekkar AREBBI zi taddart n imettinen, wah, aqa zzayes ibedd aryaz-a zzatwem iṣeḥḥ.11D wa d Aẓru nni temmenḍarem kenniw, a ibennayen, maca Netta aqa idweř d aẓru Azeǧif n teɣmart.12Asenjem war iǧi s ijjen bnadem nneɣni, minzi war din Isem nneɣni sadu ujenna i zi ɣa nettwassenjem.”13Řami sřin awařen i ssiwřen Cimɛun d Yuḥanna s bṭayṭay, uca ufin belli nitni war ǧin d imusnawen n Wedlis niɣ d iwdan inni iřemden aṭṭas, aqa tbehten uca ɛeqřen belli nitni tuɣa aten ak-d Yasuɛ.14Nitni ẓrin bnadem i tuɣa d aneɛḍab uca idweř iggenfa, ibedd akidsen, uca war ufin min ɣa inin x man aya.15U awarni řami umuren maḥend ad ten ssuffɣen barra i Jmaɛet nsen Tameqqrant, mcawaren ak-d wayawya, nnan:16“Min ɣa negg s iryazen-a? Minzi aqa iban-dd mliḥ i marra imezdaɣ n Urcalim belli řeɛřamet temsar s ufus nsen, war nzemmar ad tt nenkar.17Maca ḥima war ittwabarreḥ řexbar-a ktar jar weydud, ejj aneɣ ad ten nessiggʷed ḥima war ssiwiřen ɛemmarṣ ɛawed deg Yisem-a, uřa ak-d ijj n bnadem.”18Xas uca řaɣan-dd xasen, umuren ten maḥend war ssiwiřen war sseřmiden ɛemmarṣ ɛad deg Yisem n Yasuɛ.19Maca Cimɛun Buṭrus d Yuḥanna arrin-dd xasen, nnan asen: “Ḥekmem kenniw, ma iḥiqq zzat i AREBBI maḥend ad nseř ktar i kenniw x AREBBI,20minzi war nzemmar ad neqqim war nessiwiř x min neẓra u x min nesřa.”21Maca nitni ssiggʷeden ten ɛad ktar, xenni jjin ten ad raḥen, ařami war ufin min zi ten i ɣa ɛaqben zi ssibbet n iwdan, minzi marra iwdan tuɣa ssemɣaran di AREBBI x min imsaren,22minzi aryaz i dayes ittwagg řeɛřamet-a n ugenfi, tuɣa ɣares ktar zi arebɛin n iseggʷusa.Taẓaǧit n řmuminin23Awarni řami d asen arxun, ruḥen nitni ɣar aytmatsen uca xebbaren ten s marra min d asen nnan imeqqranen n ikehhanen d imɣaren n řgens.24Umi sřin aya, ssgeɛɛden tmijja nsen ɣar AREBBI s dmam d ijjen, nnan: “A SIDI, Cek d AREBBI wenni iggin ajenna d temmurt d řebḥur d marra min dayes,25Cek d Wenni innan s Arruḥ Iqeddsen s uqemmum n umsexxar nnec Dawud:
‘Mayemmi ɣewwɣen řegnus u mayemmi xarrṣen řegnus di min ixwan?26Aqa kkaren ijeǧiden n ddunect, uca inni ɣarsen teǧa ṣṣulṭa mcawaren ḍidd n SIDI u ḍidd n Lmasiḥ nnes.’27Minzi s tidett aqa Hirudus d Punṭiyus Pilaṭus d řegnus d ibarruten n Israil munen x Mmic nnec amqeddas Yasuɛ, wenni umi tmesḥed,28ḥima ad ggen marra min tuɣa izwar ineyyec ufus nnec d ccwar nnec ad yiři.29Ɛad řexxu, a SIDI, xzar ɣar usiggʷed nsen uca ewc i imsexxaren nnec ḥima ad ssiwřen s wawař nnec s taryast,30am tesswiẓẓḍed afus nnec i usgenfi u ḥima ad din iřint timegga jehdent d řeɛřamat d řeɛjayeb deg Yisem n Mmic nnec amqeddas: Yasuɛ.”31Awarni řami kemmřen taẓaǧit d tkessit s řmeɛruf, inhezz wemcan i di tuɣa munen, u marra dewřen ccuren s Arruḥ Iqeddsen, ssawařen s Wawař n AREBBI s teryast.
Beddu n Tmesmunt n Yasuɛ Lmasiḥ32Uca řɣaci n yinni yumnen tuɣa s řeɛmar d uxarreṣ d ijjen uca uřa d ijj war iqqar belli min tuɣa ɣares aqa i netta weḥḥdes, maca nitni carcen di kuřci jar asen.33Tuɣa rrusul nni cehhden s yijj n jjehd imɣar x tnukra n Yasuɛ Lmasiḥ uca yiweḍ-dd arḍa imɣar x marra nitni.34War tuɣi jar asen uřa d ijj dayes řexṣeṣ, minzi marra inni ɣar iǧa iyyaren niɣ tudrin zznuzan ten, uca ttawyen-dd ttaman n min zznuzan,35ssrusan t ɣar iḍaren n rrusul. Nitni bḍan zzayes i kuř ijj ɛlaḥsab min tuɣa iḥwaj.36Yusuf wenni umi řaɣan rrusul Bar-Nabas, min ixs ad yini ‘mmis n ufewwej’, netta zi teqbič n Lawi, yusa-dd zi tegzirt n Qubrus,37tuɣa ɣares ijj n iyyar, izzenz i-t uca yiwi-dd tmenyat, issars i-tent ɣar iḍaren n rrusul.