Řexdayem n rrusul3rif_lti
Asgenfi n ijj n uneɛḍab
1D man aya imsar umi geɛɛden Cimɛun Buṭrus d Yuḥanna jmiɛ ɣar Zzawect Tameqqrant di tsaɛɛet n tẓaǧit tenni d wiss tesɛa, ixs ad yini d třata awarni ḍḍhur.2Xzar, tuɣa din ijj n weryaz d aneɛḍab zeg uɛeddis n yemmas, arbun t inni innumen ad t-i-dd-awyen, ssɣiman t ɣar tewwart n Zzawect Tameqqrant umi qqaren ‘Tawwart Taṣebḥant’, ḥima ad ittar ṣṣedqet zeg inni ittadfen ɣar Zzawect Tameqqrant.3Aqa wa, umi iẓra belli Cimɛun d Yuḥanna ttadfen ɣar Zzawect Tameqqrant, ittar zzaysen ḥima ad as wcen ict n ṣṣedqet.4Cimɛun ak-d Yuḥanna nḍaren dayes tiṭṭawin, nnan as: “Xzar dayneɣ!”5Netta iqceɛ daysen, ittraja ad zzaysen iṭṭef ca.6Inna as Cimɛun: “Nnuqart d wureɣ war ɣari ǧin, maca min ɣari d man aya i d ac ɣa wceɣ s Yisem n Yasuɛ Lmasiḥ Nnaṣiri! Kkar, tuyured!”7Iṭṭef i-t zeg ufus nnes afusi uca issnekkar i-t. Řexdenni menɛen iḍaren nnes d ticeɛbin nnes,8uca ingez uca ibedd x iḍaren, iggur uca yudef akidsen ɣar Zzawect Tameqqrant, iggur, ineggez, issemɣara di AREBBI.9Marra řgens iẓra i-t iggur, issemɣara di AREBBI.10Ssnen iwdan aqa netta d wenni tuɣa ittɣiman ittettar kuř ass ɣar Tewwart n Zzawect Tameqqrant umi qqaren ‘Taṣebḥant’ uca nitni dewřen ccuren s wedhac d utebhet x min d as imsaren.11Am tuɣa aryaz aneɛḍab ittcebbar di Cimɛun d Yuḥanna, dduqqzen xasen marra iwdan ɣar useqqif ak-d ukulwar d ipilaren, umi qqaren ‘aseqqif n Suliman’, tbehten.12Umi iẓra Cimɛun aya, iṭṭef deg wawař, inna asen: “A iryazen, iḥenjiren n Israil, min kenniw ideɛwen tᵉttbehtem s uya? Mayemmi dayneɣ tejɛarem axmi s jjehd n yixef nneɣ niɣ s ṣṣulṭa n yixef nneɣ narra i-t iggur?13AREBBI n Ibrahim d Isḥaq d Yaɛqub, AREBBI n řejdud nneɣ, aqa issɛuǧa Mmis Yasuɛ wenni tsellmem u tmenḍarem zzat n wudem n Pilaṭus wenni tuɣa xas iḥkem s ijj n řḥukm iseggden u tuɣa ixs ad as yarxu.14Maca kenniw aqa temmenḍarem Amqeddas d Amseggad, tzawgem ad awem immewc aryaz aqettař.15Aqa tenɣim Azeǧif n Tudart, wenni dd-issnekkar AREBBI zi taddart n imettinen, aqa neccin marra d řechud x man aya.16S l’iman deg Yisem nnes, aqa issejhed u issgenfa Netta wa, wenni tᵉttwařam, tessnem t. L’iman dayes aqa iwca as agenfi-ya zzatwem marra.17Řexxu, a aytma, ssneɣ, aqa teggim aya s tqubbanect, am mammec i ggin uřa d imeqqranen nwem.18Ammu aqa ikemmeř AREBBI min tuɣa issizwar ixebbar xas s uqemmum n marra inabiyyen belli Lmasiḥ iggur ad iweddeb.19S uyenni tubem, tdewřem ɣar webrid ḥima ad awem ttwamesḥen ddnub nwem uca xenni ad dd-asen zzmanat n arraḥet zzat i wudem n SIDI,20uca Netta ad awem dd-issekk wenni iwejden i kenniw i man aya: Yasuɛ Lmasiḥ,21wenni ittxeṣṣa ujenna ad t iqbeř ař ukemmeř n zzmanat, n marra min xef tuɣa issawař AREBBI s uqemmum n marra inabiyyen nnes iqeddsen zi zzman.22Maɣar Musa inna:‘SIDI ad awem dd-issgeɛɛed ijj n Unabi am necc zeg wawmatwem. I Netta umi ɣa tesřem di marra mixef d awem i ɣa issiweř.’23Ad yiři belli kuř řeɛmar i war isřin ɣar Unabi nni, ad ittwasshellek zeg řgens.24Marra inabiyyen zi Camwil d marra inabiyyen nni i-t-i-dd-ixeřfen, aqa izwaren xebbaren x wussan-a.25Kenniw d ayt n inabiyyen u n Řɛahd i igga AREBBI ak-d řejdud nwem řami tuɣa iqqar i Ibrahim:
‘S zzariɛet nnec ad ttwabarkent marra tiqebbař n temmurt!’26Zic igga Netta Řɛahd nnes akidwem uca issekk-dd AREBBI řexxu Mmis maḥend ad awem ibarek, mařa ad tdewřem, ad tᵉtubem zi řɣar nwem.”