1Paul sia Derbe le Lystra theng hi: taciang, en vun, nungzui khat om a, a min sia Timothy kici hi, a nu sia Judah mi hi a, thu um mi a hihi; ahihang a pa sia Greek mi a hihi:2Lystra le Iconium a om suapui te in Timothy sia phatson mama uh hi.3Timothy sia Paul in tonpui nuam ahikom in a vunteap tansak hi, banghangziam cile tua kiim a om Judah mite theampo in a pa sia Greek mi hi, ci he uh hi.4Amate khuapi tatuam te ah a pai uh kawm in, Jerusalem ah a om sawltak te le upa te in zui tu le kepcing tu in a khensat uh thu sia, a pai na uh khua tatuam te ah ap uh hi.5Tua ahikom pawlpi te upna sungah kho uh a, nisim in khang uh hi.
Macedonia Pan Sapna
6Tu in amate Phrygia le Galatia ngam a kantan zawk uh ciang in, Tha Thiangtho in Asia ngam ah Pathian thuhil tu khak hi,7Mysia ngam a thet zawk uh ciang in, Bithynia ngamsung ah paisawm uh hi: ahihang Thaa in a pai tu uh oai ngawl hi.8Taciang amate Mysia ngam kantan uh a, Troas theng uh hi.9Tua zan in Paul in mangmu hi; Macedonia mi khat ding a, Macedonia ah hongpai tan a, kote hong hu tan, ci in ngen hi.10Paul in a mangmu zawkpo ciang in, Macedonia ah lungdamna thupha tangko tu in Topa in hong sam hi, ci thiangtak in tel ka hi uhkom, pai tu in ka hanciam uh hi.
Lydia in Jesus Um
11Tua ahikom Troas pan in ngunkuang taw ka pai uh a, Samotracia ah a tangtan in ka pai uh hi, taciang a zingciang in Neapolis ka theng uh hi;12Tua mun pan in Macedonia ngamkhen sung pan khuapi lianbel Philippi ka theng uh hi, Philippi khua sia Rome te in ngamkeak in a ukna ngam a hihi: tua khuapi sungah tawlkhat sung ka om uh hi.13Sabbath ni in ngunhui khuapi ah ka pai uh hi, thungetna mun ah ka to uh a, hongpai numei te ka paupui uh hi.14Taciang Lydia a kici Thyatira khua mi, puan sandup a zuak numei khat om a, ama sia Pathian bia khat a hihi: ama in Paul i thuhilna te ngai tu in Topa in a thinsung honsak hi.15Ama le a innkuanpui te tui a ki phum zawk uh ciang in, Topa tungah muantak hi, ci in nong mu uh ahile, ka inn ah hongpai tavun a, tua mun ah hong taam tavun, ci in hong sam a, hong thum hi.
Paul le Silas Philippi Thongsung Ah
16Thungen tu ka pai uh ciang in, a sungah maisang thu sonkhol theina thaa nei a, a to te atu in dangka tampi a ngasak naseam numei no khat in hong muak hi:17Ama in Paul le kote nung pan in hongzui a, hi mite sia ngupna lampi hong lak tu a sangbel Pathian i sal te a hi uh hi, ci in au hi.18Taciang ama in hibang in ni tampi sung vawt hi. Ahihang Paul a thin-uk in le-et a, tua thaa kungah, Jesus Christ min taw hi numei sung pan pusuak tu in thu kong pia hi, ci hi. Tuahun laitak lian in pusuak hi.19A to te in dangka tampi nga natu lametna om nawn ngawl hi, ci a mu uh ciang in Paul le Silas te man uh a, thukhen zum ulian te kungah kai uh hi.20Taciang ulian te kungah paipui a, hi Judah mite in i khuapi nasiatak in buaisak hi,21Ko Rome mite in ka san thei ngawl uh le ka zui ngawl uh ngeina te hil hi, ci uh hi.22Taciang mihonpi te hong ding tek uh hi: taciang ulian te in zong a puan uh eaukeaksak uh a, Paul le Silas te vel tu in thupia uh hi.23Amate in nasiatak in a sat zawk uh ciang in, thonginn sungah khia uh a, thong cing pa in phatak a cin natu in vaitha hi:24Thu a vaithak thonginn cingpa in, thonginn doi sungah khumsuk a, a peang te uh peangkol bul in koi hi.
Thong Cingpa in Jesus Um
25Zan laitak in Paul le Silas te thungen uh a, Pathian pok na lasa khawm uh hi: taciang thongtak te in ngai uh hi.26Thakhatthu in zin nasiatak hong ling a, thong innbul te ki lok hi: tasia pociang in kongkha te a vekpi in ki hong siat a, a ki hen na uh theampo zong ki sut siat hi.27Thongcingpa hong khanglo a, kongkha te a ki hong a mu ciang in, thongtak te taisiat zo sa a, a namsau dok in, ama le ama ki tha sawm hi.28Ahihang Paul ngingtak in au a, nangma le nangma ki vawtsia heak in: banghangziam cile ka vekpi in hi mun ah ka om nginge uh hi, ci hi.29Tuazawkciang in thongcingpa in mei ngen a, hong bingbung hi, taciang ling vadil kawm in hongpai a, Paul le Silas te mai ah bok hi,30Taciang amate pusua a, ka topa te awng, ngupna ka nga natu in bang ka vawt tu ziam? ci hi.31Amate in, Topa Jesus Christ um in a, nangma le na innkuanpui te in ngupna na nga tu uh hi, ci uh hi.32Taciang Paul le Silas te in ama innsung ah a omte theampo tungah Topa thuhil uh hi.33Tua zan in thongcingpa in amate pusua a, a liamma uh te silsak hi; taciang ama le a innkuanpui theampo tui ki phum pai uh hi.34Saul le Silas sia ama inn ah ciapui a, amate mai ah anlui hi, taciang ama le a innkuanpui theampo in Pathian um uh a, lungdam mama uh hi.35A zingciang in, ulian te in palik mang te sawl a, tua mihing te pusua vun, ci hi.36Taciang thongcingpa in Paul kungah, ulian te in note sam tu in mi sawl hi; tua ahikom tu in pusuak vun a, thinnuamtak in pai vun, ci hi.37Ahihang Paul in amate tung ah, kote sia Rome ngammi hi napi, mawsiatna om ngawlpi kilangtak in hong sat a, thong hong taksak hi; tu in kuama heak ngawl in hong hawlkhia nuam ziam? hi thei ngawl hi; ahihang amate hongpai ta hen a hong suatak tahen, ci hi.38Taciang palik mang te in hi thu a ulian te kungah son uh hi: taciang amate Rome ngam mi hi, ci a zak uh ciang in, ulian te patau mama uh hi.39Taciang amate hongpai uh a, Paul te thum uh hi, taciang suatak uh a, tua khuapi sung pan pusuak tu in sawl uh hi.40Amate thong sung pan pusuak uh ah, Lydia te innsung ah tum uh hi: taciang suapui te a mu uh ciang in heneam uh a, paikik uh hi.