1Adwong Teopilo, ï bukna na cön, acöö ïë köp kïbëc na yam Yecu öcakö tio ëka pwonyo,2naka othuno ï nïnö n'etero ën ködë ï polo, kinge mïö cïk kï tëkö ka Tipo Naleng both ëkwëna mërë na yam öyërö.3Kinge can mërë, Yecu obedo ka nyuthere bothgï wang na pol më moko nï ën eut na kwö. Ën obedo ka nen bothgï pï nïnö pyer angwën nakun twakö köp ï kom ker k'Obanga.4Ï karë mörö acël, na ën onwongo tye ka cem ködgï, ën öcïkögï nï, “Kür ïya unu kï ï Jerucalem, ëntö kür unu pï mïc n'Apapna öcïkërë më mïö, na un iwinyo unu an abedo ka twakö.5Jon yam obatica kï pii, ëntö odong nïnö na nönök na un ebino baticawu kï Tipo Naleng.”
Etingo Yecu ï wi polo
6Ï karë n'ëkwëna örwatërë gïnï kanya acël, openyo gïnï Yecu nï, “Rwoth, ï karë ni ënë in ibino dwökö kï löc both jö më Icarael?”7Yecu okobo bothgï nï, “Ba obedo nï un myero inge karë onyo nïnö n'Apap öyübö kï twër mërë.8Ëntö ibino unu nwongo tëkö, ka Tipo Naleng obino ï komwu, ëka un ibino bedo ecaden-na ï Jerucalem, ï Yudea kïbëc, ï Camaria, ëka ï ajiki më lobo.”9Kinge na dong okobo köp ni, etingo Yecu malö na gïn thon nënö, ëka pöl ökanö ën ökö kï ï wang-gï.10Ëkwëna ka Yecu onwongo öcïkö wang-gï malö ï pöl na ën tye ka cïdhö, athura cwö arïö ocung ï ngetgï n'oruko gïnï böng na tar.11Gïn okobo nï, “Un jö më Galilaya, pïngö icung unu nakun itye ka nënö unu malö ï pöl? Yecu ni, n'etingo ökö malö ï wi polo kï bothwu, bino dwogo dökï ï yore nön acël na un ïnënö ën tye ka cïdhö ködë ï wi polo.”
Ëyërö Matiya më leeno ka tyën Yuda
12Cë gïn dong öcakö dök yo Jerucalem kï ï wi kidi n'ecwodo nï Kidi më Jeituni, na cwöcwök kï Jerucalem, bor mërë röm kï woth më nïnö acël më Cabït k'Eyuda.13Ï karë na gïn othuno, öcakö ïdhö gïnï ï öt na malö kanya gïn onwongo bedo gïnï ïë cön. Jö n'onwongo ute gïnï kany nön ënë Petero, Jon, Yakobo ëka Anderiya, Pilipo ëka Tomaci, Batulumayo ëka Matayo, Yakobo wod k'Alipayo, Cimon na yam obedo ï kin jö na mïtö löckën, ëka Yuda wod ka Yakobo.14Gïn kïbëc rïbërë kanya acël jwijwi kï mon ï lëga ëka Maria aya ka Yecu, ëka kï utmego mërë.15Ï karë nön Petero öya ocung ï kin jö n'oye ï kom Yecu Kiricito(na welgï römö mia acël kï pyer arïö)16ëka okobo nï, “Utmegona, Cöc na Leng myero ocobere kakarë na yam cön Tipo Naleng ötwakö pïrë kï ï dhö Daudi ï kom Yuda, n'obino ötëlö jö n'ömakö Yecu.17Yuda onwongo obedo dhanö acël ï kinwa ëka önywakö ködwa tic ni.”18(Yuda obino öwïlö pwodho kï cïlïng na ën onwongo kï kom tïm mërë na rac, kanya ën opodho acelawic cë ïë öbarë ökö ëka jamïë oukere yökö kïbëc.19Köp ni owinyere both jö kïbëc na bedo gïnï ï Jerucalem, ëka pwodho nön ecwodo kï lëbgï nï Akeldama, na tyën köp mërë nï, “Pwodho më Remo.”)20Petero ömëdërë nakun kobo nï, “Köp ni ëcöö ï buk më Jabuli,“ ‘Wëk unu pacö mërë ödök wi obur,ngat mörö kür obed ïë.’Ëka dökï nï,“ ‘Ngat nökënë olee tic mërë më tëla.’21Dong pï manön bër ëyër kï kin jö ni dhanö n'obedo kï onu ï karë kïbëc na Rwoth Yecu obedo ka wïrë ï kin onu,22cakërë kï ï batica ka Jon naka ï nïnö n'etero kï Yecu malö kï kin onu. Ngat mörö n'ebino yërö bino rïbërë ködwa më bedo acaden më cer ka Yecu.”23Ëka dong gïn otuco nyïng jö arïö: Yocepu n'ecwodo nï Barcaba (n'ecwodo thon nï Yucito) ëka Matiya.24Cë gïn dong öcakö lëga nï, “Rwoth, in ingeo cwiny ngat acëlacël. Nyuth nïwa kï kin jö arïö ni ngat na in ïyërö25më bedo akwëna ëk olee tic ni na Yuda öwëkö ëka öcïdhö ödök cen ï kabedo mërë.”26Cë gïn dong öcakö bolo kwir, ëka kwir opodho ï kom Matiya, ëmëdö ën dong ï kom ëkwëna apar acël.