2 Timoote2sav_wbt

Soldaariŋ Kiristaani

1Ini kaɗ nga ɗa kuɓkiŋ ngo Timoote, ɓaatka hatil ŋ baahohi Kooh baahoh ɗa, ŋ niki fu nik ŋ Kiristaani Yeesu.2Ini fu kerah ho jangɗoheeɗa ŋ fiki seede laayiɗ, dengkohaa ɓi ɓo' oolkuuɗ, ɓi namana min jangiɗ ɓi ɓo' wiiriis.3Teyɗuka ɓakiŋ ɗa ŋ miskiɗi findi soldaar baahiɗ ŋ soldaar ciŋ Kiristaani Yeesu.4Soldaar waaɗ ne yi adgoh ɗe neɓu nga ɗe ɗah, a taambkohanɗi in ciŋ kipes ki.5Te leberoh waaɗ saah ɗah, a hey taambe in ci leber nakoh.6Panguk guuroh miskiɗ lool, tahha po a yi joy koc rahas ɓakiŋ ɗe ŋ ruundiɗ ci.7Liiɓa baahiɗ ŋ ini ŋ woo ɗa, Heɗi hey ɗa one fu min inah in ci ŋ woo ceem jen.

Naandsuka Yeesu Kiristaa yi hulit

8Liiɓa ŋ Yeesu Kiristaa, findi ŋ yegɗohee ɗu wa wi ŋ woyee ɗu Yegɗohiŋ Muci. A puloh ŋ cuuɓiŋ Dawuuda, a kaaniɗ, a hultiɗuusa.9Yegɗoheem weɗ tah ho raak miskiɗ po ŋ ceenu haa tumoh moɗaaɗi. Waaye woo kiŋ Kooh ceenuuɗi.10Weɗ tah ho muñee miskiɗ ci jen sagu ɓooɓi Kooh kooɗ ne ɓa min rahas muci ŋ niki ɓa nik ŋ Kiristaani Yeesu ; ɓa nam yakɗu po faw.11Woo kii wooriɗ :
Ɓoo kaan na ɗe ɗah,ɓoo hey pese na ɗe.12Ɓoo muñ ndengɗukee ɗah,ɓoo hey nguurke na ɗe.Ɓoo taasuk ɗe ɗah,a hey ɓoo name taasuk.13Ɓoo faɗ ini ɓoo woo ɗah,a risan tum ini a woo,laam a minɗi taas haf ce.
14In ceem ceɗ fu joy naandsoh. Ŋ fiki Kooh, woya ɓi na taastiɗohe ŋ ini kaɗ ŋ toksiŋ woo ci, ɓa faɗ ineem. Wa raakɗi njiriñ, ɗal yahroh ɓi na sikɗuke.

Pangkohi neɓ Kooh

15Ndengɗuka po fu neɓ Kooh findi pangkoh baahiɗ, yi na supkeeɗi ŋ ini a na haɓɗe, yi na jangɗohe hooliɗ woo kiŋ keeh ki.16Kina ɓaah ŋ woo mbalay, ci hunɗi na kos. Ɓi na tume ineem uupan uup us Kooh.17Woo ciŋ ɓa mandan na puusi minɗi faɗ wi na ɓaatke ɓaatuk kaɗe. Himene na Fileet ɓaah ŋ ɓooɓeem.18Ɓa usiɗ keeh ki ŋ ini ɓa na woye ne kosiɗ ci hultiɗ po ƴutiɗ ; ŋ ineem ɓa ɗii yahroh kosiŋ ɓum.19Waaye ɓooɓi Kooh tufkiɗ, kosiŋ ɓa ndengiɗ tir findi atoh ci raan taɓah. Woo kii fiisuusa nga ca : « Heɗi inhiɗ ɓi a raak. » Na woo kii : « Ɓo' nu woo ne a ɓaah ŋ Heɗi ɗah, a wortukaat in nu nik in baahaaɗi ɗah ! »20Ŋ ɗooƴ kahan yakiɗ, e pangkoha haɓɗohuuɗ urus na haalis dong nik nga haa, wa namiɗ raak pangkoha haɓɗohuuɗ ndooɗ na ɗok. Cum njirñiɗkoha ŋ ceeke, cum njirñiɗkoha ŋ in ci ƴin ƴin ci.21Ɓo' nu hooliɗ haf ce ŋ in ci baahaaɗiici ɗah, a mandan na pangkohaani hoolɗu wuu Kooh, wi eɗu cir. A hey raakɗe heɗ ce njiriñ, te a hey mine panguk panguk baahiɗ nu nik.22Nupa waaɗ-waaɗ ci baahaaɗiici kikomaaki na waaɗɗukohee ɗa. Ndengɗuka po fu nik ɓo' yurhiɗ, fu min oolku, fu waaɗ ɓooɓi, fu raak jam na ɓa. Pesoha ɗaa na ɓi na kiime Heɗi na keeñ hooliɗ.23Sanga taastiɗoh ci naandohaaci, dofohaaci, fu inhiɗ ne ca na ɓeke lahtoh.24Te ñaamiŋ Heɗi joyɗi lahtoh. A joy joy baah ŋ ɓooɓi jen, a min jangɗoh, a min muñɗoh ;25a kuƴsee ɓi na taasee ɗe na yeeɓuk, ya ɓa inah andi Kooh onanɗi ɓa ɓa ɓoƴsoh pesohaaɗ po ɓa inah keeh ki.26Ŋ ineem ɓa hey dokke ŋ sagoociŋ ɓa, ɓa fus ŋ fiir ciŋ Seytaani yi ambee ɓa ñaam te a tumɗukoheeɗa ɓa waaɗ-waaɗiŋ ɗe.
expand_more
Search