1Pol, Sailas ma Timoti: Getu atatal laa sin xan matenaanua Moroaa in Tesalonika lalon Moroaa xida Mom ma Orong Iesu Karisito.2Amiimiilam ma malina a laa sin gim xaal sin Moroaa iwaa xida Mom ma Orong Iesu Karisito.
Tinabel axaau ma ningning
3Getu na tigiri putsangi axaau sin Moroaa ngali gim, nagetu no taamat ma ga suk tutiik amuina nagim tinaalnge tii lo tsiktsik buxa ma biaa titii gim ta etitii engen gim tii suk tsik buxa.4Biaabi labatina xan no matenaanua Moroaa getu paraak taman nagim tilwatwat lalon tinaalnge sin abia no mamaet araraa gim tii se xaao taman ma no xonkonon gim tii tsigaii.5Balawaa no maarang asen we xan ininte Moroaa a tutiik ma gim ba tsap tutiik sin xan Maradaan Moroaa biaa gim tii se xaao taman sosong.6Moroaa a tutiik: naba xisi mulangen mamaet sin abia di, di tii tali mamaet sin gim.7Ma na aiaawisi gim biaa gim ta saaen mamaet ma sin getatuul bula. Balawaa naba tsap sin leng Moroaa naba ta asen Orong Iesu nan balalangit lalon ie ta rarar mii xan no angelo xoror.8Naba tali sosong sin abia no inaman di ta xap atii Moroaa ma di ga xap long amusili xan inesaait mamainaang Orong Iesu.9Moroaa naba asosongi di sin abia maulam tsaxa ta xap xa xapkap ina ma na tilbanti di nan no matan Orong ma sin abia matmirmir ina xan xoror Iesu.10Sin abia leng, naba ta xaalame, xan no inaman pat di ba aminaalami ma langaari sin ia, labatina abia di, di tii se taltaalnge. Ma balawaa a todomien gim amuina gim tii se taltaalnge sin getu tii paare leng sin gim.11Gim na adodomi, getu tigiri sausawit ngali gim. Ngali iwaa nagetu Moroaa naba xoxoti gim malen gim tutiik pupua sin xan ililei. Ma biaa sin xan xoror watwat naba xosor puaa nagim no tinaxaa axaau, ma no maarang araraa gim tii xosaraa, sin nagim tinaalnge.12Getu sawit ngalibi no inaman di ba aminaalami iesan xida Orong Iesu amuina sin sawe ta se xosaraa sin gim. Ma Moroaa naba aminaalami gim. Naba xosaraa abia amuina sin xan amiimiilam xida Moroaa ma Orong Iesu Karisito.