Devid ọmaana Mẹphiboshẹt
1Iwa Devid ọbọbh bi, “Ọnọng manda wani otzim orikhi k'ẹhọhmmọr cha Saul, kwa kaam mfha nsi ọphyaam nnang k'eho cha Jonatan o?”2Wa ọkhaam ọtzọhmnọng kw'om-okkeri ẹhọhmmọr cha Saul kw'okpen Ziba, kw'iwa bẹ ayeri anang Devid. Ọvaar Devid ọbọbh-ẹ bi, “Kọ wọ akpen Ziba o?” Obhina bi, “O o, kaam ọtzọhmnọng kwọ wọ e.”3Iwa ọvaarnọng ọbọbh bi, “Ọnọng manda wani otzim orikhi k'ẹhọhmmọr cha Saul, kwa kaam mfha nsi ọphyaam f'Ibinọkpaabyi nnang o?” Ziba obhina ọvaarnọng bi, “Nnwa kw'ijinọng kwa Jonatan otzim orikhi kẹ e, kẹ ọrẹkh-ọrẹkhi e.”4Ọvaarnọng ọbọbh bi, “Owobh man?” Ziba obhina bi, “Kẹ owobh ka Lo-Debar ttara Makir, nnwa kw'ijinọng kw'Amiyẹl.”5Mẹ wọ e, ọvaar Devid ọtzọhm bẹ ka Lo-Debar k'ọhọhm kwa Makir, k'ode nnwa kw'Amiyẹl bi, bẹ atza atzim-ẹ akwu.6Mada Mẹphiboshẹt kw'ode nnwa kw'ijinọng kwa Jonatan kwa Saul obhoni opyiri, ọrakha ọnang ọvaar Devid ikpokpobha. Devid oyer-ẹ bi, “Mẹphiboshẹt!” Obhina bi, “Itta kwaam, kaam ọtzọhmnọng kwọ wọ e.”7Devid oben-ẹ bi, “Oning-ọ ojor, kaam ńsi ọphyaam nnang-ọ k'eho ch'atte Jonatan. Kaam ḿbiri mkpa nnam ndọkha irerek s'atte kw'ideden saul, biphyir ńnang-ọ, kọ am-abira achi ọchattọhk k'ọgbaakha kwaam ttara kaam, k'ogbe kpenamkpen.”8Mẹ wọ, Mẹphiboshẹt ọrakha k'ikpokpobha, oben bi, “Kaam ọtzọhmnọng kwọ nde mach'anyi o, kw'asi ọphyaam-dema mva anang inọng-dukhi macha kaam o?”9Mẹ wọ, ọvaarnọng oyeri Ziba kw'ode ọtzọhmnọng kwa Saul, ọgbaakh-ẹ bi, “Kaam nkk'ọttọhk kpenamkpen fa Saul kw'ode itta kwọ ọmaana ẹhọhmmọr chẹ biphyir ọbọhk ntta nnang nnwa-mmona kw'itta kwọ.10Kọ ọmaana va pọ p'ijinọng, ọmaana atzọhmnọng pọ áyaabha owoni ánang-ẹ, ifha ọchattọhk owobha fa nnwa-mmona kw'itta kwọ óm-ochi. Mẹphiboshẹt kw'ode nnwa-mmona kw'itta kwọ óm-ochi ọchattọhk ttar-m k'okpokkoro kwaam.” (Wa Ziba ọkhaam va p'ijinọng chi, ttara atzọhmnọng ẹrọbh.)11Iwa Ziba oben ọvaarnọng bi, “Ọtzọhmnọng kwọ ósi-osi mach'itta kwaam, kw'ode ọvaarnọng obeni.” Mẹ wọ, Mẹphiboshẹt ochi ọchattọhk k'okpokkoro ttara ọvaar Devid mach'ọvaar-nnwa kw'ijinọng.12Iwa Mẹphiboshẹt ọkhaam ijinọnọnga kw'okpen Mika. Wa anọng p'arukhi k'ẹhọhmmọr cha Ziba biphyir ade atzọhmnọng pa Mẹphiboshẹt.13Iwa Mẹphiboshẹt oruk ka Jẹrusalẹm; da iwa om-ochi ọchattọhk k'okpokkoro kw'ọvaarnọng. Iwa kẹ ọrẹkh-ọrẹkhi.