Řwaɛd zi jjihet n Zzawect Tameqqrant i ɣa tᵉttwabna zi Suliman
1Umi iqqim ujeǧid di taddart nnes u SIDI tuɣa igga as řehna zi marra řɛedyan nnes i d as dd-innḍen, imsar,2aqa inna ujeǧid i unabi Natan: “Xzar, necc zeddɣeɣ deg ict n taddart n ukeccuḍ n tcejjart n tengelt, maca Ttabut n AREBBI třeḥḥef sadu tajartiřt n uqiḍun.”3Natan inna i ujeǧid: “Uyur waha, egg marra min ɣarek deg wuř nnec, maɣar SIDI akidek.”4Di ǧiřet nni imsar aqa iffeɣ wawař n SIDI ɣar Natan, inna:5“Uyur, ini i umsexxar inu, i Dawud: ‘Ammu i iqqar SIDI: Ma texsed ad ayi tebnid ict n taddart, maḥend ad dayes zedɣeɣ?6Ɛemmarṣ war zdiɣeɣ deg ict n taddart zeg wass umi dd-ssgeɛɛdeɣ ayt n Israil zi Miṣra ař ass-a, maca durryeɣ deg ijj n Uqiḍun, deg ict n Tzeddiɣt.7Mani ma uyureɣ ak-d ayt n Israil, ma Necc ssiwřeɣ ɛemmarṣ uřa s yijj n wawař i yict zi tqebbař n Israil tinni i umureɣ ad arwesen řgens inu Israil, u nniɣ: Mayemmi war d ayi tebnim ict n Taddart n ukeccuḍ n tcejjart n tengelt?8Xenni řexxu, ammu i ittxeṣṣa ad tinid i umsexxar inu, i Dawud: Ammu i iqqar SIDI n řɛeskarat: Necc iwyeɣ-dd cek zi řkuri, zi ḍeffar n wuǧi, maḥend ad tiřid d řḥakem x řgens inu, x Israil.9Mani ma tuyured, ǧiɣ Necc akidek u qḍiɣ x marra řɛedyan nnec zzat i wudem nnec. Necc ggiɣ ac ijj n isem d ameqqran am yismawen n imeqqranen nni iǧan x temmurt.10Necc neyyceɣ ijj n wemcan i řgens inu, i Israil, uca ẓẓuɣ t din, maḥend ad izdeɣ deg wemcan nnes, war ittwanhezzi ɛad u war t ḥeṣṣaren ɛad ayt n řmuɛṣiyyet am deg umezwaru,11zeg wass nni ggiɣ Necc řquḍat x řgens inu Israil. Necc wciɣ ac řehna zi marra řɛedyan nnec uca řexxu ad ac isscen SIDI, aqa SIDI ad ac igg ict n taddart.12Řami ttwakemmřen wussan nnec uca ad tegged ad tareyyḥed jar řejdud nnec, ad dd-ssekkareɣ zzariɛet nnec i dd-itteffɣen zi daxeř nnec u Necc ad ssmetneɣ tagelda nnes.13Netta ad ibna ict n taddart i Yisem inu u Necc ad ssmetneɣ řɛarc n tagelda nnes i řebda.14Necc ad iřiɣ d Babas i netta u netta ad yiři i Necc d mmi. Mařa netta iffaryeḍ, ad t arebbiɣ s weɛmud d teyyita n tarwa n bnadem.15Tamexsiwt inu icewwaren war zzayes tᵉttxennes am mammec ttessxenseɣ tt x Cawul i x tt kkseɣ zzat i tiṭṭawin nnec.16Taddart nnec d tgelda nnec ad ttwassmetnent zzat i wudem nnec i řebda, řɛarc nnec ad iqqim ibedd i řebda.’”17Natan issiweř ɣar Dawud nican ɛlaḥsab awařen-a u ɛlaḥsab marra řewḥiy-a.18Xenni yudef ujeǧid Dawud uca iqqim zzat i wudem n SIDI, inna: “Min ɛniɣ necc, Sidi inu, SIDI, u min teɛna taddart inu aqa Cek tnedhed ayi-dd ař danita?19Di tiṭṭawin nnec d man aya marra ɛad drus, a Sidi inu SIDI, maca řexxu tessiwřed ɛad x taddart n umsexxar nnec deg wussan iggʷejen i dd ittasen. D man aya d taɣuri d tidett i bnadem, a Sidi inu, SIDI!20Min d ac i ɣa yini Dawud ɛad ktar? Cek tessned amsexxar nnec, a Sidi inu, SIDI!21Di ṭṭweɛ n wawař nnec u ɛlaḥsab uř nnec aqa teggid marra planu imɣaren wanita, ḥima ad tessargbed amsexxar nnec.22X uya Cek d ameqqran, a Sidi inu SIDI, maɣar war din iǧi uřa d ijj am Cek u war din iǧi uřa d ijj n AREBBI mɣir Cek ɛlaḥsab marra min nesřa s imezzuɣen nneɣ.23Man wen i iǧan am řgens nnec, am Israil, ayenni n řgens x temmurt i ɣar iraḥ AREBBI ḥima ad t ifdi i Yixef nnes d řgens, u ḥima ad igg i Yixef nnes ijj n Yisem, u ḥima ad awem igg ict n řxedmet d tameqqrant uřa d tmegga d timeqqranin i temmurt nnec zzat i wudem n řgens nnec nni tefdid i Yixef nnec zi Miṣra, zi řegnus u zeg irebbiten nsen.24Cek teggid řgens nnec Israil d ijj n řgens i Yixef nnec i řebda. Cek, a SIDI, aqa Cek tdewřed d AREBBI i nitni.25Xenni řexxu, SIDI AREBBI, ejj awař nni tessiwřed x umsexxar nnec u x taddart nnes ad ibedd i řebda u egg am mammec tessiwřed.26Ejj Isem nnec ad ittwassemɣar i řebda, ad inin: ‘SIDI n řɛeskarat ijehden aqa-t d AREBBI x Israil!’, uca iři ad tᵉttwassemten taddart n umsexxar nnec Dawud zzat i wudem nnec.27Maɣar Cek, a SIDI n řɛeskarat, AREBBI n Israil, aqa tessargbed deg imezzuɣen n umsexxar nnec, tennid: ‘Necc ad ac ssbeddeɣ ict n taddart!’ X uya tusa-dd deg wuř n umsexxar nnec maḥend ad iẓẓaǧ taẓaǧit-a ɣarek.28Xenni řexxu, a Sidi inu, SIDI, Cek d AREBBi nni uca awařen nnec d tidett u Cek tessiwřed s marra tcuni-ya ɣar umsexxar nnec.29Xenni řexxu, mařa tusa ac-dd x řxaḍar, barek taddart n umsexxar nnec, ḥima ad tiři zzat i wudem nnec i řebda, minzi Cek, a Sidi inu, SIDI, tessiwřed aya u s lbaraka nnec ad tᵉttwabarek taddart n umsexxar nnec i řebda.’”