1ሳኦላ ሶ አሳይነ ዳዊታ አሳይ ዳሮ ዎደ ኦለትዶሶና፤ ዳዊቲ ኦላን ምን ምን ብያ ዎደ ሳኦላ አሳይ ዳቡር ዳቡር ብስ።2ከብሮናን ዳዊታስ ናይት የለትዶሶና፤ እዝራኤለ አክናሆማ የልዳ ባይራ ናአይ አምኖና፤3ቃርመሎሳ አብግያ ካሰ ናባላ ማችያ የልዳ ክልኣብ ናምአን ናአ። ጋሹራ ካዋ ታልማያ ናእያ ማእካ የልዳ አበሰሎመይ ሄን ናአ።4ኦይዳንይ ሃግታ ናኣ አዶና፤ እቻሻንይ አብፃላ ናኣ ሳፋፃ።5ኡሱፑንይ ዳዊታ ማቸ ኤግል ናኣ ይትራኣማ፤ ሀ ናይት ኡባይ ከብሮናን የለትዶሶና።
አበኔር ዳዊታራ ጫቅስ
6ሳኦላ ሶ አሳራነ ዳዊታ ሶ አሳራ ኦለትያ ዎደ አበኔር ሳኦላ አሳ ቦላ ምን ምን ብስ።7ሳኦላስ እዮሄላ ናአ ግድዳ እርፅፎ ጌተትያ እስ ላገያ ደአዉሱ፤ እያቡስተይ አበኔራኮ፥ “ታ አዋ ላገራ አይስ አቃዲ?” ያግድ ኦይችስ።8አበኔር እያ ኦዳን ዳሮ ይሎትድ፥ “ታና ኔኒ ይሁዳኮ ስምዳ ጋታ ካና ጋድዬ? ታኒ ነ አዋ ሳኦላስ፥ እያ እሻታስነ እያ ዳቦታስ አማነታዳ ደአስ፤ ነናካ ዳዊታስ አዳ እማብከ። ሽን ሀእ ኔኒ ታና ሀ ማጫሰ ግሾ ሞታሳ!9ፆሳይ ዳዊታስ ኦና ግድ ጫቅዳ ቃላ ታኒ ፖሎና እፅኮ፥ ፆሲ ታና ፕርዶ።10ሳኦላ ኮቻፈ ካዎተ ዎስስድ፥ ዳነፐ በርሳበ ጋካናዉ እስራኤለ ቦላነ ይሁዳ ቦላ፥ ዳዊታ አራታ ምንናዉ ጎዳይ ጫቅስ” ያግስ።11እያቡስተይ አበኔራስ ያይዳ ግሾ ሀራ ቃላ ፖግቤና።12አበኔር ዳዊታኮ፥ “ቢታይ ኦሴ? ኔኒ ታራ ጫቃ፤ እስራኤለ አሳ ኡባይ ኔኮ ስማና መላ ታ ነና ማዳና” ያግድ አሰ ኪትስ።13ዳዊቲ፥ “ሎኦ! ታ ኔራ ጫቃና። ሽን ታኒ ነና እስባ ኦይቻይስ፤ ኔኒ ታና በአናዉ ያ ዎደ ሳኦላ ናእዉ መልኮሎ ኤኮና ዮፓ” ያግስ።14ሄሳፈ ጉየ፥ ዳዊቲ ሳኦላ ናአ እያቡስተኮ፥ “ፄቱ ፍልስፄመታ ቃራታዳ ኮይታ ኦዳ እምዳ ታ ማችዉ መልኮሎ ታዉ እማ” ያግድ አሰ ኪትስ።15እያቡስተይ አሰ ኪትድ እ አዝና ላዉሻ ናአ ፓልፅኤላፐ ከስ ኤክስ።16እ አዝናይ ብራቅማ ካታማ ጋካናዉ ዬክሸ እ ጌዶ ካልስ። አበኔር እያኮ፥ “ጉየ ሶ ባ” ያግን አደይ ጉየ ስሚድ ብስ።17አበኔር እስራኤለ ጭማታኮ ብድ፥ “ዳዊቲ ህንተ ቦላ ካዎታና መላ ዳሮ ዎደ አሞትደታ።18ሀእ ፖልተ! ጎዳይ፥ ‘ታ አሳ እስራኤለ፥ ፍልስፄመታ ኩሸፐነ ኤንታ ሞርከታ ኡባ ኩሸፐ ታ አይልያ ዳዊታ ባጋራ አሻና’ ግዳይሳ ሀሳይተ” ያግስ።19አበኔር ብንያመ ኮቻታስ ሄሳ ኦድስ። እስራኤለ አሳይነ ብንያመ አሳ ኡባይ ኦናዉ ኮይዳ ኡባ ዳዊታስ ኦዳናዉ አበኔር ከብሮና ብስ።20አበኔር ባራ ላታሙ አስ ኤክድ፥ ከብሮና ብን፥ ዳዊቲ እያዉነ እያ አሳስ ግብራ ጊግስስ።21አበኔር ዳዊታኮ፥ “ኤንቲ ኔራ ጫቃና መላነ ነ ዎዛናይ አሞትያ ኡባ ነ ሃራና መላ ታ ባዳ እስራኤለ አሳ ካዋስ ታ ጎዳስ ሺሻና” ያግስ። ያግን ዳዊቲ አበኔራ ሞይዝድ ሳሮ የድስ።እዮኣብ አበኔራ ዎስ
22ሄ ዎደ ዳዊታ አሳይነ እዮኣብ ኦላፐ ዳሮባ ድእድ ስምዶሶና። ሽን ዳዊቲ እያ ሳሮ ባ ግድ የድዳ ግሾ፥ አበኔር ከብሮናን ዳዊታራ ዴና።23እዮኣብነ እያራ ደእያ ኦላንቾት ጋክያ ዎደ አሳይ፥ “ኔራ ናኣ አበኔር ካዋ ዳዊታኮ ይን፥ ካዎይ እያ የድን ሳሮ ብስ” ያግድ ኦድዶሶና።24ሄሳ ግሾ፥ እዮኣብ ካዋኮ ብድ፥ “ሄስ ዋንድ ሀንዴ? አበኔር ኔኮ ይን፥ አይስ የዳዲ? ሄኮ እ ብክችስ!25ኔራ ናአይ አበኔር ነና ጭማናዉ፥ ኔኒ ገልያሶነ ከያሶ በአናዉነ ኔኒ ኦያ ኡባ ኤራናዉ ይስ” ያግስ።26እዮኣብ ዳዊታ ስንፈ ከይድ፥ አበኔራ ጌዶ ኪታ የድን፥ ኤንቲ እያ ሲራ ኦላ ሃ ማታፐ ጉየ ዛርዶሶና፤ ሽን ዳዊቲ ሄሳ ኤረና።27አበኔር ከብሮና ስሚድ ይዳ ዎደ እዮኣብ እያራ ዱማ ኦደታናዉ ኮይዳ ዳንስድ ድርሳ ፐንግያኮ ደእያ ክፍልያነ እያ ኤፍስ። ባ እሻ አሳሄላ ሱ ዛራናዉ አበኔራ ኡሎን ጫድን አበኔር ሄ በሳን ሀይቅስ።28ዳዊቲ ጉየፐ ሄሳ ስእዳ ዎደ፥ “ታንነ ታ ካዎተይ ኔራ ናኣ አበኔራ ሱ ግሾ ጎዳ ስንን መርናዉ ኦይሸቶኮ።29እያ ሱይ እዮኣባነ እያ አዋ ሶ አሳ አቾ፤ ማዱን ደእያ አስ ዎይኮ ጎጋ ሀርገይ ደእያ አስ ዎይኮ ዎበ አስ ዎይኮ ማሻን ሀይቅያ አስ ዎይኮ ኮሻትያ አስ እዮኣባ ኮቻን ዮፖ” ያግስ።30ጋባኦናን ከይዳ ኦላን ባንታ እሻ አሳሄላ አበኔር ዎዳ ግሾ፥ እዮኣብነ እያ እሻ አብስ አበኔራ ዎዶሶና።31ዳዊቲ እዮኣባነ እያራ ደእያ አሳ፥ “ህንተ ማኡዋ ዳክተ፤ ባና ቆልተ፤ አበኔራ ሀላ ስንን ዬክተ” ያግስ። ካዎ ዳዊቲ ሀላ ካልድ ዱፎ ብስ።32አበኔር ከብሮናን ሞገትስ፤ ካዎይ ባ ቃላ ቁ ኦድ ዱፎን ዬክስ፤ አሳ ኡባይ ዬክዶሶና።33ካዎይ አበኔራስ፥“አበኔር ኤያ አሳዳ ሀይቃናዉ በሲ?34ነ ኩሸይ ቃሸትቤና፤ነ ቶሆይ ሳንላታን ኦይከትቤና።አስ ኢታ አሳ ኩሸን ሀይቀይሳዳ ሀይቅስ”ያግድ ዘሌልስ። አሳ ኡባይ አበኔራስ ዛሪድ ዬክዶሶና።35ሄ ጋላስ ዳዊቲ ካ ማና መላ አሳይ እያ ሾቢዶሶና። ሽን ዳዊቲ፥ “አዋ አይፈይ ደእሽን፥ ካ ዎይኮ ሀራባ ባርኮ ፆሲ ታና ፕርዶ” ያግድ ጫቅስ።36ካዎይ ኦዳባ አሳ ኡባይ በእድ ኡፋይትዶሶና፤ ቱማካ ካዎይ ኦዳባ ኡባይ አሳ ኡፋይስስ።37ሄሳ ግሾ፥ ሄ ጋላስ ዳዊታ አሳይነ እስራኤለ አሳ ኡባይ ካዎይ ኔራ ናኣ አበኔራ ዎስቦናይሳ ኤርዶሶና።38ካዎይ ባ አይለታኮ፥ “እስራኤለ ቢታን ግታ አስነ ሀላቅ ሀይቅዳይሳ ህንተ አኬከከቲ?39ታኒ ፆሳይ ትይዳ ካዎ ግድኮካ፥ ታኒ ዳቡራንቾ፤ ሀይሳቲ ፃሩያ ናይት ታ ቦላ ምንዶሶና፤ ኢታ ኦዳይሳታስ ጎዳይ ኤንታ ኦሱዋዳ ዛሮ” ያግስ።