ሳበእ ዳዊታ ቦላ ደንድስ
1ብንያመ ኮቸ ግድዳ ብክራ ናአይ ሳበአ ጌተትያ መቶ መያ አደይ ያን ደኤስ። ሄ አደይ ሞይዘ ፑንድ፥ “ኑስ ዳዊታራ ግሾይ ባዋ! እሰየ ናኣራ ኑስ ላት ባዋ! እስራኤለ አሳዉ፥ ኡባይ ህንተ ሶ ሶ ገልተ!” ያግስ።2እስራኤለ አሳ ኡባይ ዳዊታ አግድ፥ ብክራ ናኣ ሳበኤራራ ብዶሶና። ሽን ይሁዳ አሳይ ዮርዳኖሰፐ የሩሳላመ ጋካናዉ አጎና ባንታ ካዋ ካልዶሶና።3ዳዊቲ የሩሳላመን ደእያ ባ ጋ ስምዳ ዎደ፥ ካዎ ጋ ናጋና መላ አሽዳ ታሙ ላገታ ኤፍድ እስ ኬን ናግስድ ዎስ። ኤንታዉ ኮሽያባ እሚስ፥ ሽን ኤንታራ አቅቤና። ኤንቲ ሄ ኬን ናገትድ፥ ሀይቃና ጋካናዉ አምኦ ግድድ ደእዶሶና።4ካዎይ አማሳኮ፥ “ይሁዳ አሳ ኡባ ሄ ጋላሳን ታዉ ፄጋዳ ሺሻ፤ ነካ ኤንታራ ሺቃ” ያግስ።5አማስ ይሁዳ አሳ ፄጋናዉ ብስ፤ ሽን ካዎይ ግዳ ጋላሳን ስማናዉ ዳንዳእቤና።6ዳዊቲ አብሳኮ፥ “ሀእ ብክራ ናኣ ሳበእ አበሰሎመፐ አድ ኑና ቆሀና። ነ ጎዳ ኦላንቾታ ኤካዳ ኔኒ እያ ጌዶ ካላ። ሄስ ሀኖና እፅኮ እ ግምበትዳ ካታማታ ደምድ ኑፐ ከስ ኤካና” ያግስ።7እዮኣባ አሳይ፥ ካዋ ናገይሳትነ ምኖ ኦላንቾት ኡባይ አብሳራ ብክራ ናኣ ሳበአ ጌዶ ካላናዉ የሩሳላመፐ ከይድ ብዶሶና።8ኤንቲ ብድ ጋባኦናን ደእያ ዎጋ ዛላ ጋክያ ዎደ አማስ ኤንታራ ጋሄታናዉ ይስ። እዮኣብ ኦላ ማኡዋ ማእ ኡትስ፤ ባ ፄሳን ማሻ ዳንጭስ። እ ታንግሽን እያ ማሻይ ሾሁዋፐ ከስ ኤክድ ዎስ።9እዮኣብ፥ “ታ እሻዉ፥ ነ ሳሮ ደአይ?” ያግድ፥ አማሳ ዬራናዉ ባ ኡሻቻ ኩሽያን እያ ቡቻ ኦይክስ።10ሽን አማስ እዮኣባ ሀድርሳ ኩሽያን ደእያ ማሻ በእቦና ግሾ፥ እያፐ ናገትቤና። እዮኣብ እያ ኡሉዋን ጫድድ ማራጭያ ቢታን ዛዝስ። አማስ እስ ጫቻን ሀይቅዳ ግሾ ዛር ጫድቤና። እዮኣብነ እያ እሻ አብስ ብክራ ናኣ ሳበአ ጌዶ ካልዶሶና።11እዮኣባ አሳፐ እሶይ አማሳ አሀ ማታን ኤቅድ፥ “እዮኣባ ዶሰይነ ዳዊታባ ግድያ ኦንካ እዮኣባ ካሎ” ያግስ።12አማስ ሱን ኢትድ ኦግያስ ግዶን ኩንድድ ዝንእስ። ኦላንቾት ኡባይ ይድ፥ ሄ በሳን ኤቅዳይሳ ሄ አደይ በእድ፥ አማሳ አሀ ኦግያፐ ሾቃን ጎች ከስድ፥ እያ ቦላ ማኦ የግስ።13አማሳ ኦገፐ ድግዳፐ ጉየ፥ ብክራ ናኣ ሳበአ ጌዶ ካላናዉ ኦላንቾት ኡባይ እዮኣባራ ብዶሶና።14ሳበእ እስራኤለ ኮቻታ ቢታራ ካንድ፥ አቤል-ቤት-ማእካ ካታማ ጋክስ። በራታ ቢታራ ካንሽን፥ አሳ ኡባይ ሺቅድ እያ ካልዶሶና።15እዮኣባራ ደእያ አሳይ ጋክድ፥ ሳበእ ደእያ አቤል-ቤት-ማእካ ካታማ ተቅዶሶና። ኤንቲ ካታማ ግምብያስ ጉየ ባጋራ ቢታ ዶርዶሶና። እዮኣባራ ደእያ አሳይ ግምብያ ላላናዉ ቆፆሶና። ኤንቲ ቆፅሽን፥16ካታማፐ እስ ጭንጫ ማጫስ ኤንታ ፄጋዳ፥ “ስእተ! ስእተ! ብድ፥ እዮኣባ ፄግተ። ታኒ እያዉ ኦዳናባይ ደኤስ” ያጋሱ።17እ ማጫሴኮ ይን፥ እያ፥ “ኔኒ እዮኣቤ?” ያጋዳ ኦይቻሱ። እዮኣብ፥ “ኤ፥ ታና” ያግስ። ማጫስያ፥ “ታኒ ነ አይልያ ግያባ ስአ” ያጋሱ። እዮኣብ፥ “ታኒ ስአይስ” ያግስ።18ማጫስያ፥ “በን ዎደ አሳይ፥ ‘ነ ኦይሻስ አብኤላ ካታማ ባ’ ጊኮ ኦድ ዉሬስ።19እስራኤለ ግዶን ሳሮነ አማንያ አስ ኑና። እስራኤለ ቢታን አዮ ግድዳ ካታምዉ ኔኒ ይሳናዉ ቆፓሳ። ኔኒ ጎዳ ላታ ቢታ አይስ ይሳናዉ ኮያይ?” ያጋሱ።20እዮኣብ፥ “ሄስ ታፐ ሃኮ! ካታማ ይሶይ ዎይኮ ላለ ታፐ ሃኮ!21ኑ ቆፋይ ሄሳ ግደና። ደረይ ዳርያ ኤፍሬማ ቢታን ብክራ ናኣ ሳበአ ጌተትያ አደይ ካዋ ዳዊታ ቦላ ደንድስ። ሄ አድያ ታዉ እምተ፤ ታኒ ካታማ የዳዳ ባና” ያግስ። ማጫስያ፥ “እያ ሁጵያ ግምብያ ቦላራ ነዉ ሆላና” ያጋሱ።22ሄሳፈ ጉየ፥ ማጫስያ ባ ጭንጫ ዞርያራ አሳኮ ባሱ። አሳይ ብክራ ናኣ ሳበአ ቆፐ ቃንፅድ ሁጵያ እዮኣባስ ሆልዶሶና። ያትን፥ እዮኣብ ሞይዘ ፑንን አሳ ኡባይ ካታማፐ ከይድ፥ ባ ሶ ሶ ብን፥ እዮኣብ ካዋኮ የሩሳላመ ስምስ።23እዮኣብ እስራኤለ ኦላንቾታ ኡባ ሀላቃ ግድሽን፥ ዮዳሄ ናአይ ባናያስ ዳዊታ ናገይሳታ ሀላቃ።24አዶንራም ዎልቃ ኦሶ ኦይሳታ ሀላቃ ግድሽን፥ አህሉዳ ናአይ እዮሳፍፅ ሀንዳባ ፃፈይሳ።25ሱስ ዋና ፃፈ ግድሽን፥ ሳዶቅነ አብያታር ካህነ።26ቃስ ያእራ አደይ እርክ ዳዊታ ካህነታፔ እሱዋ።