Dawiti Yihuda Bolla Kawotis
1Hessafe guye, Dawiti, “Yihuda katamatape issuwa boo?” yaagidi Godaa oychis. Goday, “Ee, ba” yaagis. Dawiti, “Awu boo” yaagidi oychis. Goday, “Kebroona ba” yaagidi zaaris.2Dawiti ba nam7u macheta, Izira7eele Aknahoomanne kase Naabala machiw Qarmeloosa Abigiya ekidi Kebroona katamaa bis.3Dawiti baara de7iya asatanne enta soo asa ubbaa ehin, Kebroonaninne iya heeran de7iya katamatan de7idosona.4Yihuda asati Kebroona katamaa yidi, Dawita tiyidi Yihuda bolla kawothidosona. Dawiti Yaabesa Galada asay Saa7ola moogidaysa si7ida wode,5I ase kiittidi, “Hinte hinte godaa Saa7ola moogida gisho he keehatethas Goday hintena anjo.6Goday siiquwanne tumatethaa hintew qonciso; taanika ha keehatetha gisho hintew lo77o kushe zaarana.7Hiza minnite; xaalite; hinte goday Saa7oli hayqis. Yihuda asay tana tiyidi, banta bolla kawothidosona” yaagis.Nam7u Keethata Giddon De7iya Ola
8Saa7ola tora moconay Neera na7ay Abeneeri Saa7ola na7aa Iyabuste ekidi, Mahinayma geetetiya bessaa efis.9Iya Galadan, Aseeran, Izra7eelan, Efreeman, Biniyaameninne Isra7eele biitta ubban kawothis.10Saa7ola na7ay, Iyabustey Isra7eele bolla kawotiya wode iyaw oytamu laythi; I nam7u laythi kawotis. Gidoshin, Yihuda asay Dawita kaallidosona.11Dawiti Kebroonan Yihuda bolla laapun laythinne bagga kawotis.12Neera na7ay Abeneerinne Saa7ola na7ay Iyabuste asay Mahinaymape Gaba7oona bidosona.13Xaruya na7ay Iyo7aabinne Dawita asay Gaba7oona olla haatha matan entara gahetidosona. Issi cugay olla haathaafe hefinthan uttin, issi cugay hafinthan uttis.14Abeneeri Iyo7aabako, “Ane hintefenne nuupe panthati dendidi, nu sinthan oleto” yaagis. Iyo7aabi, “Ero, dendidi oleto” yaagis.15Hessa gisho, Biniyaamepe Saa7ola na7aa Iyabustes tammanne nam7u asati keyidi, Dawitas eqida tammanne nam7u asatara ola gahetidosona.16Issoy issoy ba morkiya huuphiya oykidi, mashshan miyen caddis; hessada hannidi laatamanne oydday hayqidosona. Hessa gisho Gaba7oonan de7iya he bessay Mashsha biitta geetetis.17He gallas wolqaama ola oletidi, Dawita asay Abeneeranne Isra7eele asaa xoonis.18Xaruya nayti heedzay Iyo7aabi, Abisinne Asaheeli he bessan de7oosona; Asaheeli woshi7eda eeson woxidi,19Asaheeli Abeneera ushachi woyko haddirsi goonna yedethis.20Abeneeri guye simmidi, “Asaheela, nenee?” yaagidi oychis. Asaheeli, “Ee tana” yaagis.21Abeneeri, “Ushachi woyko haddirsi simmada, asatape issuwa oykada iya ola miishiya eka” yaagis. Shin Asaheeli iya yedetheysa aggonna ixis.22Qassika Abeneeri, “Taani nena sa7ara gathada oythonna de7ishin, tana yedetheysa agga! Nena wodhada taani ne ishaa Iyo7aaba som7uwa waatada xeellanee?” yaagidi waassis.23Shin Asaheeli iya yedetheysa aggonna ixis. Hessa gisho, Abeneeri toora guye yeddidi, Asaheela uluwa caddin tooray zokora kanthidi keyis. Asaheeli he bessan kundidi hayqis; Asaheeli hayqida bessaa gakida asa ubbay yan eqis.24Shin Iyo7aabinne Abisi Abeneera gooddidosona; awi wulliya wode Gaba7oona mela biittako efiya ogiyan Gaadape sintha baggara de7iya Ama zumako gakidosona.25Biniyaame asay Abeneerako shiiqidosona; issi cuga medhidi issi zumaa bolla eqidosona.26Abeneeri Iyo7aaba xeegidi, “Merinaw oletishe daaneyee? Haysa wursethay camo gidanaysa neeni erikii? Ne asay, banta ishata gooddeysa aggana mela ayis odikii?” yaagis.27Iyo7aabi, “De7o Xoossay ero! Neeni odonnaba gidiyako ta asay ba ishata sa7i wontana gakanaw goodda aggokona” yaagis.28Iyo7aabi moyze punnin asa ubbay essis. Isra7eeleta zaari goodibookona woyko olibookona.29Abeneerinne iya asay he qamma kumethi hemetidi Araba gadha gakidosona. Yordaanose shaafa pinnidi, Betroona kanthidi Mahinayme yidosona.30Iyo7aabi Abeneera gooddeysa aggidi, ba asa ubbaa issi bessi shiishidi xeelliya wode, Asaheela gujonna Dawita asaape tammanne uddufun asi pacis.31Shin Dawita asay Abeneerara de7iya Biniyaame kochatape heedzu xeetanne usupun tammu asi wodhidosona.32Asaheela aha ekidi, Beeteleme kataman de7iya iya aawa duufon moogidosona. Iyo7aabinne iya asay qamma kumethi hemetidi sa7i wontiya wode Kebroona gakidosona.